From Department of Children, Equality, Disability, Integration and Youth
Published on
Last updated on
Sheol an Roinn Leanaí agus Gnóthaí Óige Díospóireacht Polasaí Oscailte maidin inniu maidir le hUchtú Oscailte nó Leath-Oscailte a chur ar fáil in Éirinn.
I ndíospóireacht an lae inniu, dírítear ar na ceisteanna a bhaineann le huchtú oscailte nó leath-oscailte a chur ar fáil in Éirinn. Tá athbhreithniú agus comhairliúchán á dhéanamh ag an Roinn maidir leis seo, faoi leasú ar an Acht Uchtála (Leasú) 2017.
Tá ionadaithe ó ghrúpaí éagsúla i láthair ag an ndíospóireacht; ó Ranna Rialtais, Tusla - An Ghníomhaireacht um Leanaí agus an Teaghlach, Údarás Úchtála na hÉireann, an earnáil pobail agus dheonach, grúpaí ionadaíocha lena n-áirítear eagraíochtaí a chuireann cearta agus tuairimí leanaí chun cinn agus an saol acadúil. Is í an tOllamh Elsbeth Neil ón Ollscoil East Anglia an príomhchainteoir. Rinne sí maoirseacht ar staidéar fadaimseartha ar theagmháil iar-uchtú. Sa staidéar sin, leanadh grúpa de theaghlaigh uchtála agus breithe a bhí os cionn 18 mbliana d'aois.
Tá an díospóireacht seo ar cheann amháin de réimse bearta atá pleanáilte chun dul i dteagmháil le páirtithe leasmhara faoin gceist seo. Chomh maith leis an Díospóireacht Polasaí Oscailte, tá ceistneoir comhairliúcháin poiblí ar fáil ar shuíomh gréasáin na Roinne.
Dúirt an tAire:
"Ba chóir go mbeadh cur chuige leanbhlárnach i bhfeidhm agus ceist an uchtaithe oscailte nó leath-oscailte á plé againn; is dóigh liom go bhfuil gach duine ar aon intinn faoi sin. Is eachtra thar a bheith tábhachtach é uchtú i saol linbh. Nuair atá cinntí á ndéanamh, tá sé tábhachtach go dtugtar tús áite do leas an linbh. Nílimid ach ag tosú leis an gceist seo a phlé in Éirinn, agus mar sin tá sé ríthábhachtach go bhfaighidh muid tuairimí ó pháirtithe leasmhara, chun fáil amach faoi céard a oibreoidh go maith do leanaí agus do theaghlaigh".
Déanfar tuarascáil ar uchtú oscailte nó leath-oscailte a chur ar fáil in Éirinn a chur i gcrích agus a chur os comhair Thithe an Oireachtais i Samhain 2019.
CRÍOCH