An Fóram Geallsealbhóirí maidir le Stóráil Leictreachais

Foilsíodh an Creat Beartais um Stóráil Leictreachais d’Éirinn sa bhliain 2024. Áirítear leis deich ngníomh Rialtais atá le cur i gcrích. Tugtar an gealltanas seo a leanas i nGníomh #4 den Chreat Beartais um Stóráil Leictreachais: “Fóram a thionól le haghaidh grúpa leathnaithe geallsealbhóirí, lena n-áirítear comhlachtaí reachtúla, príomhionadaithe tionscail agus grúpaí acadúla/sainleasa.”

Aithníonn an rialtas seo go bhfuil sé ríthábhachtach go mbeadh cur chuige comhordaithe ag na geallsealbhóirí uile i leith ról na stórála leictreachais in Éirinn chun go mbeadh córais stórála leictreachais in ann a spriocanna a bhaint amach.

Is é cuspóir an ghnímh beartais seo caidreamh a dhéanamh leis an bpobal, leis na soláthraithe seirbhíse agus le geallsealbhóirí eile maidir leis an ról tábhachtach a imríonn Córais Stórála Leictreachais sa líonra eangaí náisiúnta.

Cuireadh Gníomh #4 chun feidhme i mí na Samhna 2024 nuair a d’óstáil an Roinn Aeráide, Fuinnimh agus Comhshaoil an chéad Fhóram Geallsealbhóirí maidir le Stóráil Leictreachais. Leis an imeacht, tugadh rannpháirtithe ó raon leathan earnálacha le chéile. Ina measc sin bhí comhlachtaí reachtúla iomchuí, príomhionadaithe tionscail, grúpaí acadúla/sainleasa agus ionadaithe don phobal i gcoitinne ar thopaic na stórála leictreachais. Ba iad seo a leanas na haidhmeanna a bhí leis an bhfóram:

1. An t-eolas is deireanaí agus an dul chun cinn ar an mbeartas rialtais a chomhroinnt agus a phlé
2. Fóram a éascú ina mbeadh na geallsealbhóirí uile in ann a gcuid léargas agus saineolais a chomhroinnt
3. Sainaithint a dhéanamh ar thopaicí, dúshláin agus bacainní atá ábhartha do chórais stórála leictreachais
4. A chinntiú go n-éisteann an Roinn leis na tuairimí ó raon leathan geallsealbhóirí

Sa tuarascáil seo ar an bhfóram, tugtar léargas ar an imeacht, lena n-áirítear na rannpháirtithe, an comhthéacs, an t-ábhar agus na torthaí. Bainfear leas aisti chun fóraim geallsealbhóirí sa todhchaí maidir le stóráil leictreachais a mhúnlú.