Ainmníonn an tAire Donohoe beirt Stiúrthóirí Neamhfheidhmiúcháin ar Bhord Bhanc Aontais Éireann

D'fhógair Paschal Donohoe TD, an tAire Airgeadais agus Caiteachais Phoiblí agus Athchóirithe, inniu (Dé Luain) go bhfuil Ann O’Brien Uasal agus Raj Singh Uasal á n-ainmniú ar bhord AIB Group plc.

Ag trácht ar na ceapacháin dó, dúirt an tAire Donohoe:

Chuir an Roinn Airgeadais agus an tSeirbhís um Cheapacháin Phoiblí próiseas cuimsitheach follasach ar bun sa bhliain 2018 d'fhonn iarrthóirí leis an gcumas cuí a aimsiú a d'fhéadfadh an tAire a ainmniú ar an mbord ag na trí bhanc ina bhfuil scaireanna ag an Stát, eadhon, Banc Aontas Éireann, Banc na hÉireann agus Permanent TSB. Éilítear, ar an gcéim deiridh den phróiseas, go ngnóthaíonn na hiarrthóirí a roghnaítear aontú rialaitheoireachta trí phróiseas measúnóireachta Bhanc Ceannais na hEorpa a shásamh i ndáil le Feidhmiúlacht agus Cuibheas.

Tugann an fógra seo ón Aire an próiseas ceapacháin maidir le Banc Aontas Éireann chun críche agus beidh fógraí eile maidir le stiúrthóirí Neamhfheidhmiúcháin a ainmniú in Permanent TSB agus i mBanc na hÉireann á ndéanamh i rith na míonna seo romhainn de réir mar a thugtar na próisis ina leith sin chun críche.

Nóta don Eagarthóir:

• Tugadh gealltanas faoi Chlár an Rialtais Comhpháirtíochta stop a chur le Stiúrthóirí Leasa Poiblí (PID) nua a cheapadh sna bancanna agus leasú a dhéanamh ar an bpróiseas trína gceaptar daoine arna n-ainmniú ag an Stát ar bhoird na mbancanna as seo amach.
• Ní dhearnadh aon cheapachán nua arna ainmniú ag an Aire* a chur ar aghaidh chuig na bancanna seo ón mbliain 2010 i leith agus níor ceapadh aon Stiúrthóir Leasa Poiblí nua ó rinneadh na ceapacháin tosaigh an tráth ar tharla ráthaíocht na mbancanna. Níl aon duine ainmnithe ar na boird ag na bancanna sin faoi láthair ó chuaigh na stiúrthóirí deireanacha a bhí ar bhord AIB agus ar bhord BOI ar scor ag deireadh na bliana 2017 – féach an tábla thíos.
• Is de bhun chearta an Aire ina scairshealbhóir dó i ngach ceann de na bancanna atá ceapacháin á ndéanamh anois seachas de bhíthin na cumhachta a leagtar ar an Aire faoin Acht um Fhorais Creidmheasa (Tacaíocht Airgeadais) mar a bhíodh i gceist maidir le Stiúrthóirí Leasa Poiblí. Is féidir leis an Aire, de bhun na gcearta sin, suas le beirt stiúrthóirí a cheapadh ar bhord AIB agus ar bhord PTSB agus aon stiúrthóir amháin a cheapadh ar bhord Bhanc na hÉireann.
• I rith na bliana 2018 a cuireadh tús leis an bpróiseas trínar roghnaíodh na daoine a ainmníodh. Rinneadh na rólanna a fhógairt go poiblí agus iarrthóirí a mheas agus a ainmniú trí chomórtas oscailte follasach arna eagrú ag an tSeirbhís um Cheapacháin (PAS) agus ag an Roinn Airgeadais. Rinne painéal measúnóireachta ar comhaltaí neamhspleácha le saineolas suntasach maidir leis an tionscal ba mhó a bhí air athbhreithniú agus measúnóireacht ar na hiarrthóirí chomh maith lena gcur faoi agallamh agus chuir an painéal liosta le chéile ina dhiaidh sin de na hiarrthóirí oiriúnacha. Roghnaigh an tAire Airgeadais na hiarrthóirí tosaíochta ina dhiaidh sin arís. Bhí ar an mbeirt iarrthóirí tosaíochta ina dhiaidh sin arís dul faoi mheasúnóireacht an ECB maidir le hOiriúnacht agus Cuibheas.
• Is den tábhacht go dtabharfaí chun aire gur gá, i ndáil le haon ghnás ceapacháin nua maidir le stiúrthóirí bainc, an aird chuí a bheith ar an éagsúlacht faoi leith atá idir sin agus a dtagann i gceist maidir le ceapacháin ar bhoird Stáit. Tugtar san áireamh na coinníollacha a leagtar síos faoi scáth Réimeas Oiriúnachta agus Cuibhis an Bhainc Ceannais/SMA agus an gá atá le réimse fairsing saineolais a bhaineann le heintitis mhóra rialáilte i dtimpeallacht rialúcháin atá ag éirí níos casta.
• Beidh fógraí eile maidir le stiúrthóirí Neamhfheidhmiúcháin a ainmniú in Permanent TSB agus i mBanc na hÉireann á ndéanamh i rith na míonna seo romhainn de réir mar a thugtar na próisis ina leith sin chun críche
• Seo a leanas na dátaí ceapacháin agus na dátaí scoir nó deireadh téarma maidir leis na Stiúrthóirí Leasa Poiblí ar fad a ceapadh in AIB, BOI agus PTSB:

• Ainmniúchán de chuid an Rialtais (seachas ceapachán mar Stiúrthóir Leasa Poiblí) a bhí i gceist an tráth ar ceapadh an Dr Michael Somers ar bord AIB an 14 Eanáir 2010 faoi théarmaí infheistíocht €3.5bn an NPRFC i Scaireanna Tosaíochta i mBanc Aontas Éireann i mí Bealtaine 2009. Rinneadh a athcheapadh faoi dhó ina dhiaidh sin.

**Tháinig deireadh le téarma Joe Walsh ina stiúrthóir nuair a d'éag sé i mí na Samhna 2014

Cuntais Beathaisnéise:

Ann O’Brien

Tá breis agus 30 bliain caite ag Ann i dtionscal na seirbhísí airgeadais. Fuair sí ollscolaíocht i gColáiste na hOllscoile, Baile Átha Cliath agus i gColáiste na Tríonóide, Baile Átha Cliath. Le fiche bliain anuas, bhí Ann i gceannas ar bhearta casta maidir le comhairleoireacht bainistíochta i gcuid mhór de na heagraíochtaí baincéireachta agus urrúis is mó ar domhan. Post mar Phríomhoifigeach le Deloitte i Nua-Eabhrac an post is deireanaí bhí ag Ann mar a ndearna sí fónamh ar feadh 10 mbliana. As Éirinn ó dhúchas í agus tá tréimhsí caite aici freisin ag obair agus ina cónaí sa Ríocht Aontaithe, i Lucsamburg agus sa Fhrainc.

Raj Singh

Tá taithí ceithre bliana déag agus fiche ag Raj ag obair ar chúrsaí gnó, priacail agus rialála in eagraíochtaí ollmhóra seirbhísí airgeadais, lena n-áirítear baincéireacht idirnáisiúnta, tráchtála, phríobháideach agus tomhaltóireachta ar feadh seacht mbliana déag agus tréimhse chomh fada céanna i gcuibhreannais airgeadais, i gcomhlachtaí athárachais, i gcomhlachtaí árachais agus i mbun bainistíocht sócmhainní. Rinne an tUasal Singh fónamh roimhe seo ina stiúrthóir neamhfheidhmiúcháin ar bhiúró náisiúnta creidmheasa agus ar dhá fhoras airgeadais a dhéantar a thrádáil go poiblí chomh maith le tréimhsí a chaitheamh ar an mBord ag cuid mhór de na fochomhlachtaí móra baincéireachta, árachais, athárachais agus bainstíochta sócmhainní ag na cuideachtaí a raibh sé ag obair iontu. Áirítear ar na cuideachtaí sin Standard Life Aberdeen plc, Accedere AG, Swiss Reinsurance Company LTD, Allianz SE agus Citigroup. Tá sé faoi láthair ina Phríomhoifigeach Riosca agus ina chomhalta den Choiste Feidhmiúcháin le EFG International, grúpa príobháideach baincéireachta san Eilvéis. Saoránach de chuid na Stát Aontaithe é Raj atá ina chónaitheach sa Ríocht Aontaithe agus san Eilvéis.

CRÍOCH