Cuireann an tAire Chambers fáilte roimh chríochnú an idirbhirt aischeannaigh scaireanna €500 milliún le AIB

“Tá críochnú an idirbhirt aischeannaigh scaireanna seo le AIB ina bheart dearfach eile do AIB agus don Stát araon. Normalaíonn sé arís eile an caidreamh idir an dá pháirtí ar mhaithe leis an mbanc a thabhairt ar ais faoi lánúinéireacht phoiblí ar deireadh. Tá an Rialtas seo den tuairim go fóill gurb ionann an bhaincéireacht agus gníomhaíocht ar cheart don earnáil phríobháideach í a sheoladh, tríd is tríd, agus gur cheart na cistí cáiníocóra a úsáideadh chun tacú leis an earnáil baincéireachta a aisghabháil anois agus úsáid níos táirgiúla a bhaint astu, amhail soláthar seirbhísí poiblí a fheabhsú agus cabhrú linn sárú a dhéanamh ar an líon mór dúshlán atá romhainn faoi láthair agus a bheidh romhainn sa todhchaí, lena n-áirítear i réimsí amhail tithíocht agus bonneagar poiblí.

Mar thoradh ar chríochnú an idirbhirt seo, laghdaigh scairsheilbh an Stáit in AIB ó 24.88% go 22.04%, agus aisghabhadh €500m eile ónár n-infheistíocht sa bhanc. Is é an praghas a fuarthas ar an idirbheart seo an praghas scoir is airde a fuarthas ó AIB ó mhí Feabhra 2018 amach. Sealbhófar na fáltais ón idirbheart seo laistigh den Chiste Infheistíochta Straitéisí d’Éirinn le linn dom a scrúdú conas is fearr is féidir iad a úsáid chun tairbhe don Stát.

Is cothrom le thart ar €16.6bn anois atá an méid iomlán a tugadh ar ais don Stát ónár n-infheistíocht in AIB. Rinneadh dul chun cinn suntasach ar ár scairsheilbh in AIB a laghdú ó thart ar 71% i dtús na bliana 2022 go thart ar 22.04% inniu. Tá an Stát ar an scairshealbhóir is mó in AIB go fóill, agus leanfaidh mé le measúnú a dhéanamh ar dheiseanna eile chun scaireanna a dhíol de réir mar a thagann siad chun cinn.”