Fáiltíonn an tAire Chambers roimh thorthaí láidre an gheilleagair intíre sa tríú ráithe

“Tá áthas orm neart leantach a fheiceáil sa gheilleagar intíre sa tríú ráithe den bhliain 2024. Tháinig méadú 1.3 faoin gcéad ar Éileamh Modhnaithe Intíre – an mhéadracht is fearr liom a úsáid chun feidhmíocht gheilleagrach na hÉireann a thomhas – ar bhonn ráithiúil, agus tháinig fás láidir bliantúil 4 faoin gcéad air.

“Rud tábhachtach, ba de chineál leathan a bhí an fás ar bhonn bliantúil, agus caiteachas tomhaltóirí (1.7 faoin gcéad) agus infheistíocht mhodhnaithe (10.4 faoin gcéad) araon ag déanamh rannchuidiú dearfach. Tá an fás daingean sin ag teacht le neart ár margaidh saothair agus leis na figiúirí láidre státchiste a eisíodh inné. Le chéile, léirítear leis na méadrachtaí uile sin gur fheidhmigh an geilleagar go láidir i mbliana.

“Cé gur údar misnigh iad na figiúirí atá á n-eisiúint inniu, is figiúirí cúlbhreathnaitheacha iad. Go deimhin, tá an t-ionchas eacnamaíoch ag éirí níos éiginnte, agus is léir gur rioscaí ar an taobh thíos atá i bhformhór na rioscaí agus gur rioscaí seachtracha atá sna rioscaí is práinní. Mar gheilleagar beag, oscailte agus thar a bheith domhandaithe, tá Éire an-soghonta i leith aon mheath ar an timpeallacht sheachtrach.

“I mbeagán focal, is rioscaí iad sin nach bhfuil aon smacht díreach againn orthu – dá réir sin, ní mór dúinn díriú ar na nithe a bhfuil smacht againn orthu a bhainistiú. Go háirithe, ní mór dúinn leanúint lenár maoláin fhioscacha a fhorbairt, le hinfheistiú inár ndaoine agus inár mbonneagar, agus lena chinntiú go mbeidh an geilleagar iomaíoch i gcónaí. Cabhróidh sé sin lena chinntiú go mbeimid sa riocht is fearr is féidir chun aghaidh a thabhairt ar dhúshláin amach anseo.