Labhraíonn an tAire Chambers faoi fhoilsiú na gcuntas náisiúnta ráithiúil

“Cé go n-aithním an laghdú ar OTI sa dara ráithe den bhliain, níl OTI ina thomhas úsáideach maidir le measúnú a dhéanamh ar chaighdeáin mhaireachtála cónaitheoirí intíre, mar gheall ar an ról ollmhór a imríonn an earnáil ilnáisiúnta inár ngeilleagar. Tá an laghdú ar OTI ina léiriú ar chineál luaineach na gníomhaíochta san earnáil ilnáisiúnta.

“I gcás an gheilleagair intíre, tháinig laghdú ar Éileamh Modhnaithe Intíre – an mhéadracht is fearr liom a úsáid chun feidhmíocht gheilleagrach na hÉireann a thomhas – ar bhonn ráithiúil, ach tháinig fás dearfach 1.5 faoin gcéad air ar bhonn bliantúil.

“Tá áthas orm a fheiceáil gur rannchuidigh caiteachas tomhaltóirí go dearfach leis an bhfás sin, agus méadú 1.3 faoin gcéad ag teacht ar thomhaltas ar bhonn bliantúil. Léiríonn an fás ar chaiteachas tomhaltóirí, na figiúirí láidre státchiste a eisíodh inné agus neart ár margaidh saothair an riocht measartha sláintiúil atá ar ár ngeilleagar intíre faoi láthair.

“Ag breathnú romhainn, tá maolú suntasach tar éis teacht ar bhoilsciú, agus meastar go mbeidh sé ar chonair chobhsaí sa ghearrthéarma. Cabhróidh sé sin le fíorioncaim a mhéadú, rud ar cheart go dtacódh sé le tuilleadh fáis ar ár ngeilleagar intíre sa dara leath den bhliain.

“Foilseoidh mo Roinn réamhaisnéisí nuashonraithe maicreacnamaíocha agus fioscacha mar chuid den Bhuiséad go luath an mhí seo chugainn. Cinnteofar le Buiséad 2025 go leanfaimid le tacaíocht a thabhairt do theaghlaigh, oibrithe agus gnólachtaí agus le hinfheistiú inár seirbhísí poiblí agus inár mbonneagar poiblí chun sinn a ullmhú do na dúshláin atá romhainn faoi láthair agus a bheidh romhainn sa todhchaí.”