Buaileann an tAire Troy le hÁrachas Éireann
- Foilsithe: 10 Feabhra 2025
- An t-eolas is déanaí: 15 Aibreán 2025
Bhuail Robert Troy, an tAire Stáit um Sheirbhísí Airgeadais, Comhair Chreidmheasa agus Árachas, le hÁrachas Éireann, an comhlacht ionadaíoch do thionscal árachais na hÉireann, chun plé a dhéanamh ar fhreagairt na hearnála árachais d’éilimh atá ag eascairt as Stoirm Éowyn.
Ag labhairt dó faoin bhforbairt, dúirt an tAire Troy:
“Ó ceapadh mé, tá sé mar phríomhthosaíocht agam tacaíocht a thabhairt do dhaoine aonair, do ghnólachtaí agus do phobail in Éirinn tar éis an mhórdhamáiste a rinne Stoirm Éowyn. Chuir mé in iúl an athuair go bhfuil an Rialtas ag súil leis go ngníomhóidh árachóirí ar bhealach práinneach, éifeachtúil agus cothrom chun tacú le sealbhóirí polasaí a ndearna Stoirm Éowyn difear dóibh.
“Leanfaidh mé le dul i dteagmháil le hárachóirí chun a chur ina luí orthu go bhfuil sé ríthábhachtach go gcomhlíonfadh siad a n-oibleagáidí agus go soláthródh siad réiteach éileamh atá sofhreagrúil agus cothrom agus a thugann soiléire agus cinnteacht dóibh sin a ndearnadh difear dóibh.”
Tá sé comhaontaithe ag an Aire Stáit Troy agus ag Árachas Éireann leanúint le caidreamh a dhéanamh le chéile chun faireachán a dhéanamh ar dhul chun cinn agus chun a chinntiú go bhfaighidh na sealbhóirí polasaí lena mbaineann an tacaíocht is gá gan moill mhíchuí.
Nótaí
Bhuail an tAire Troy le Moyagh Murdock, Príomhoifigeach Feidhmiúcháin Árachas Éireann Déardaoin, an 6 Feabhra 2025, chun plé a dhéanamh ar fhreagairt an tionscail árachais do Stoirm Éowyn. Cruinniú tionscnaimh a bhí sa chruinniú sin, a tionóladh tar éis an tAire Troy a cheapadh mar Aire Stáit um Sheirbhísí Airgeadais, Comhair Chreidmheasa agus Árachas.
Réamhlíon na nÉileamh agus Réamhchostas na nÉileamh a thuairiscigh baill d’Árachas Éireann
An 31 Eanáir, d’iarr Árachas Éireann léargas ar a chuid baill ar líon na n-éileamh agus ar chostas na n-éileamh a rinneadh idir tús na stoirme agus an 31 Eanáir.
Chuir Árachas Éireann in iúl go bhfuil sé tábhachtach a thabhairt faoi deara ar dtús go bhfuil an staid seo fós ar siúl. Ní bheidh líon ná costas na n-éileamh sin ionadaíoch do líon deiridh na n-éileamh, go háirithe ós rud é nach bhfuil aon chumhacht ná aon seirbhísí Idirlín ag roinnt sealbhóirí polasaí go fóill, a fhágann nach bhfuil siad in ann teagmháil a dhéanamh lena n-árachóirí. Táthar ag súil leis go dtiocfaidh méadú ar na figiúirí sin sna seachtainí atá romhainn.
Líon Iomlán na n-éileamh amhail an 31 Eanáir: 14,099
Costas Iomlán na nÉileamh: Cé gurbh é €116 mhilliún an réamhfhigiúr iomlán amhail an 31 Eanáir, d’fhéadfadh costas iomlán na stoirme a bheith cothrom le €150-200 milliún.