Comhairliúchán Poiblí ar an Scéim Fóirdheontais Pá

Is mian leis an rialtas a chinntiú go dtugtar tacaíocht do dhaoine faoi mhíchumas ar mian leo agus atá in ann obair a dhéanamh agus go gcuirfear ar a gcumas é sin a dhéanamh.

Chun é seo a dhéanamh, ba mhaith leis an rialtas do thuairimí a fháil maidir le conas an Scéim Fóirdheontais Pá a fheabhsú. Seol do thuairimí chugainn faoi 5pm Dé hAoine 21 Iúil.

Scéim Fóirdheontais Pá

Tugann an Scéim Fóirdheontais Pá íocaíocht ar a dtugtar fóirdheontas d'fhostóirí san earnáil phríobháideach chun an costas a bhaineann le daoine faoi mhíchumas a fhostú a laghdú. Tá sé mar aidhm ag an scéim cur ar chumas daoine faoi mhíchumas a bheith neamhthuilleamaíoch (féinchothaitheach) mar chuid den lucht saothair.

Conas a oibríonn sé

Íocann an scéim fóirdheontas le fostóir má tá na scileanna don phost ag fostaí faoi mhíchumas, ach mar gheall ar a m(h)íchumas, táirgeann sé/sí thart ar 20% níos lú saothair gcomparáid le fostaí nach bhfuil faoi mhíchumas a dhéanann an obair chéanna san am céanna a leithdháiltear.

Sampla

Tá Carrie faoi mhíchumas agus oibríonn sí mar fhorbróir bogearraí i gComhlacht Néal, is féidir léi 10 líne de chód a scríobh i 3 uair an chloig.

Déanann Jessica, atá i gComhlacht Néal freisin, an obair chéanna. Níl sí faoi mhíchumas. Is féidir léi 12 líne de chód a scríobh i 3 uair an chloig. (20% níos mó ná Carrie).

Tá caighdeán an chóid a scríobhann Carrie agus Jessica mar an gcéanna, ach scríobhann Carrie níos lú línte mar go gcaithfidh sí éirí as a cathaoir go rialta de dheasca a deacrachta droma. Is féidir leis seo í a chur dá treoir rud a chiallaíonn nach féidir léi 12 líne a scríobh chomh tapa le Jessica.

Téarmaí fostaíochta

Nuair a cháilíonn duine faoi mhíchumas don Scéim Fóirdheontais Pá, caithfidh a c(h)onradh fostaíochta a bheith mar an gcéanna le hoibrithe eile den chineál céanna.

Sampla

Ag úsáid an tsampla thuas, caithfidh na téarmaí céanna a bheith ag Carrie agus Jessica ar nós laethanta saoire bliantúla (saoire), rátaí pá, agus mar sin de.

Caithfidh fad 21 uair an chloig ar a laghad a bheith leis an gconradh. Tá an rogha ag fostóir níos mó ná 39 uair an chloig oibre a thairiscint sa tseachtain, ach níl sé/sí ach i dteideal fóirdheontas ar 39 uair an chloig ar a mhéad a éileamh, agus chan níos mó ná sin.

Bealaí chun fostóirí a spreagadh chun níos mó daoine faoi mhíchumas a fhostú

Chun fostóirí a spreagadh chun níos mó daoine faoi mhíchumas a fhostú tá trí shraith fóirdheontais ann. Is féidir leis an bhfostóir tairbhe a bhaint as ceann amháin nó astu go léir ag an am céanna.

Sraith 1

Don chéad bheirt a fostaíodh, tabharfaidh an Roinn Coimirce Sóisialaí fóirdheontas €6.30 san uair don fhostóir do gach fostaí faoin scéim.

Sraith 2

Nuair a fhostaíonn fostóirí níos mó ná beirt faoi mhíchumas faoin scéim seo, íocfaidh an Roinn Coimirce Sóisialaí méid fóirdheontais níos airde leo. Ba cheart go gclúdódh fóirdheontas Sráith 2 na costais bhreise a bhaineann le níos mó ná beirt faoi mhíchumas a fhostú faoin scéim.

Íocfar Sraith 2 mar seo a leanas

Sraith 3

Nuair a fhostaíonn fostóirí líon 25 duine nó líon níos mó daoine faoi mhíchumas faoin scéim seo, íocfaidh an Roinn Coimirce Sóisialaí €30,000 leo in aghaidh na bliana chun cabhrú leo íoc as an gcostas a bhaineann le hOifigeach Cúnaimh Fostaíochta a fhostú. Íocfar €30,000 do gach grúpa de 25 fostaí. Is féidir le fostóir íocaíochtaí a fháil do 5 Oifigeach Cúnaimh Fostaíochta, ach ní do níos mó ná sin.

Sampla:

Comhlacht Néal, tá 48 fostaí fostaithe aige faoin Scéim Fóirdheontais Pá. Chiallódh sé seo go bhfaigheadh Comhlacht Néal €9.45 san uair agus €30,000 i dtreo an chostais a bhainfeadh le hOifigeach Cúnaimh Fostaíochta a fhostú.

Comhlacht Solas na Gréine, tá 50 fostaí fostaithe aige faoin Scéim Fóirdheontais Pá. Chiallódh sé seo go bhfaigheadh Comhlacht Néal €9.45 san uair ar gach uair a oibríonn gach fostaí scéime agus €60,000 i dtreo an chostais a bhainfeadh le beirt Oifigeach Cúnaimh Fostaíochta a fhostú.

Is é ról an Oifigigh Cúnaimh Fostaíochta tacaíocht agus cúnamh a thabhairt d'Fhostaithe de chuid an Fhóirdheontais Pá ina n-ionad oibre. Ba cheart go ndíreodh obair an Oifigigh Cúnaimh Fostaíochta ar chúinsí pearsanta, sóisialta, sláinte nó teaghlaigh na bhfostaithe faoi mhíchumas, a d'fhéadfadh bac a chur rompu a bpoist a choinneáil.

Léigh tuilleadh faoin Scéim Fóirdheontais Pá

Cuirfidh an Roinn Coimirce Sóisialaí fáilte roimh dhá phríomhghrúpa daoine a gcuid tuairimí a roinnt ach iad an suirbhé ábhartha thíos a chomhlánú:

• fostóirí
• daoine faoi mhíchumas

Beidh gach freagra suirbhé glan gan ainm, ach d'fheadfadh go bhfoilseofaí gach tuairim ar ár láithreán gréasáin agus mar achoimre i dtuarascáil.

Is féidir aighneachtaí i scríbhinn ó dhaoine faoi mhíchumas, ó fhostóirí, ó ghrúpaí ionadaíocha agus ón bpobal i gcoitinne a chur isteach freisin.

Mura bhfuil teacht agat ar na suirbhéanna nó ar na haighneachtaí ar líne, tá an rogha agat ceann de na roghanna eile seo a leanas a roghnú:

• comhlánaigh an suirbhé le ball den fhoireann ar an bhfón ar an Luan agus ar an gCéadaoin idir 9am agus 11am nó 2pm agus 4pm ach glaoch a chur ar 01 7043606
• íoslódáil an teimpléad suirbhé nó aighneachta thíos, priontáil é, agus seol ar ais é chuig an seoladh poist thíos
• íoslódáil an teimpléad suirbhé nó aighneachta thíos, sábháil é, agus seol ar ais é chuig an seoladh ríomhphoist thíos. Cuir "Comhairliúchán SFP" ar líne an ábhair.

Suirbhé do Dhaoine faoi Mhíchumas

Comhlánaigh an suirbhé ar líne

Suirbhé d'Fhostóirí

Comhlánaigh an suirbhé ar líne

Teimpléad aighneachta

Comhlánaigh an aighneacht ar líne

Sula seolann tú aon aighneacht, tá sé tábhachtach an fhaisnéis phríobháideachais thíos a léamh mar d'fheadfaí go bhfoilseofaí d'aighneacht ar gov.ie

Agus machnamh á dhéanamh ar an gcur chuige is fearr chun an Scéim Fóirdheontais Pá a leasú, déanfaidh an Roinn Coimirce Sóisialaí dianscrúdú ar na freagraí go léir a fuarthas.

Bainfimid úsáid as na freagraí chun a fháil amach an bhfuil an scéim ag comhlíonadh a cuid aidhmeanna. Bainfimid úsáid as na moltaí maidir le hathruithe nó forálacha nua mar léargais chun oibriú na Scéime Fóirdheontais Pá amach anseo a mhúnlú.

Beidh gach freagra suirbhé glan gan ainm ionas nach féidir le duine ar bith tú a aithint. Mar sin féin, má tá sé i gceist agat aighneacht i scríbhinn a sheoladh, iarrtar ort an fhaisnéis phríobháideachta thíos a léamh.

Foilseoimid tuarascáil ar an gcomhairliúchán ar gov.ie le hachoimre ar na haighneachtaí scríofa agus ar thorthaí an tsuirbhé.

Is comhairliúchán poiblí é seo, agus tá feidhm ag an Acht um Shaoráil Faisnéise 2014. Ciallaíonn sé seo gur féidir leis an Roinn Coimirce Sóisialaí aighneacht i scríbhinn a fhoilsiú ina hiomláine. Iarraimid ort ár Ráiteas Príobháideachais a léamh.

Chun cabhrú linn do phríobháideachas a chosaint, d'iarrfaimis ort gan faisnéis a chur ar fáil a bheadh:

• pearsanta
• íogair ó thaobh na tráchtála de
• aon rud nach mbeifeá ag iarraidh a chur ar fáil don phobal

(Áirítear le faisnéis atá íogair ó thaobh na tráchtála de faisnéis maidir le praghsáil, brabúis, smaointe nua nó eolas íogair tionscail.)

Mar sin féin, má roghnaíonn tú faisnéis atá íogair ó thaobh na tráchtála de a nochtadh,

Ainmnigh an t-ábhar go soiléir agus cuir in iúl dúinn:

• cén fáth a mbeadh sé íogair ó thaobh na tráchtála de
• cén fáth nár chóir é a fhoilsiú ná a chur ar fáil faoin Acht um Shaoráil Faisnéise

D'fhéadfaimis iarratas a fháil chun aighneacht a scaoileadh faoin Acht um Shaoráil Faisnéise, agus d'fhéadfadh go mbeadh orainn í a scaoileadh.

Sna cásanna seo, rachaimis i gcomhairle leat maidir leis an bhfaisnéis a bheadh pearsanta nó a shainaithníodh mar fhaisnéis a bheadh íogair ó thaobh na tráchtála de. Dhéanfaimis é seo sula socraímis:

• an aighneacht a scaoileadh – ina hiomláine
• cuid den aighneacht a scaoileadh (dhéanfaí sonraí áirithe a lándhúchan ionas nach bhféadfaí é a léamh)
• gan an aighneacht a scaoileadh

Cá fhad a choinneoidh sibh na haighneachtaí?

Coinneoimid na haighneachtaí go gcríochnófar an próiseas athbhreithnithe, lena n-áirítear cur i bhfeidhm aon mholtaí a nglactar leo.

Reachtaíocht ábhartha

Tá gach freagra ar an gcomhairliúchán seo faoi réir:

• An tAcht um Shaoráil Faisnéise
• An Rialachán Ginearálta maidir le Cosaint Sonraí (RGCS) 2016/679
• An tAcht um Chosaint Sonraí 2018

Is é 5pm Dé hAoine an 21 Iúil an spriocdháta chun do shuirbhé nó d'aighneacht a sheoladh.

Ríomhphost:DCPolicyConsultation@welfare.ie

Guthán:

01 704 3606

Seoladh:

Athbhreithniú SFP

An tAonad Polasaí um Míchumas agus Cúramóirí

Urlár a Ceathair

Áras Mhic Dhiarmada

Sráid an Stórais

Baile Átha Cliath 1

D01 WY03