Breis is €410 milliún i mbearta cosanta sóisialta mar chuid de thacaíochtaí costais maireachtála an rialtais

• breis is €410 milliún i dtacaíochtaí cosanta sóisialta breise
• ocaíocht costais maireachtála €200 d'fhaighteoirí leasa shóisialaigh fadtéarmacha, lena n-áirítear iad siúd a fhaigheann an Íocaíocht Teaghlaigh i bhFostaíocht (ÍTF)
• íocaíocht chnapshuime bhreise dar luach €100 do Shochar Linbh in aghaidh an linbh
• méadú aonuaire dar luach €100 sa Liúntas Éadaí agus Coisbhirt don Scoilbhliain Nua
• leathadh amach leanúnach Chlár na mBéilí Scoile Teo

D'fhógair an tAire Coimirce Sóisialaí, Heather Humphreys, sonraí inniu faoi phacáiste leasa shóisialaigh dar luach €410 milliún chun tacú le teaghlaigh, pinsinéirí, cúramóirí agus daoine faoi mhíchumas.

Leagann na bearta a fógraíodh inniu, chomh maith leis an €2.2 billiún de thacaíochtaí i mBuiséad 2023, béim ar thiomantas leanúnach an rialtais aghaidh a thabhairt ar an gcostas maireachtála méadaithe a bhíonn ar dhaoine a bhraitheann ar íocaíochtaí leasa shóisialaigh agus ar theaghlaigh i bhfostaíocht.

I measc na mbeart a fógraíodh inniu:

• íocaíocht chnapshuime €200 le híoc i mí Aibreáin le daoine a bhfuil íocaíochtaí leasa shóisialaigh fadtéarmacha á bhfáil acu. Íocfar é seo le príomhfhaighteoirí na n-íocaíochtaí a fhaigheann Bónas na Nollag
• íocaíocht €200 d'fhaighteoirí Íocaíocht Teaghlaigh i bhFostaíocht nach bhfuair an chnapshuim ar a bpríomhíocaíocht, le híoc i mí Aibreáin

- íocfar aon chnapshuim €200 amháin, fiú má fhaigheann duine níos mó ná íocaíocht leasa shóisialaigh cháilitheach amháin

• gheobhaidh daoine a fhaigheann sochar linbh cnapshuim €100 in aghaidh an linbh bhreise i Meitheamh 2023
• íocaíocht €100 bhreise do gach leanbh a bhfuil Liúntas Éadaí agus Coisbhirt don Scoilbhliain Nua le híoc leo in 2023
• agus an tábhacht a bhaineann leis an gClár Béilí Scoile i mbéilí cothaitheacha a chur ar fáil do leanaí á aithint aici, dúirt an tAire Humphreys go raibh sé ar intinn aici leathadh amach na mBéilí Scoile Teo a chur i gcrích do gach bunscoil DEIS agus scoileanna speisialta atá fágtha i mbliana agus tá sé i gceist aici cead a lorg an scéim a leathnú amach i mbunscoileanna nach scoileanna DEIS iad.

NÓTAÍ BREISE

• íocaíocht chnapshuime €200 le híoc i mí Aibreáin leo siúd a fhaigheann íocaíochtaí leasa shóisialaigh fadtéarmacha:

- dlite le híoc i mí Aibreáin 2023

- i measc na bhfaighteoirí tá na grúpaí céanna a fuair Bónas na Nollag in 2022 lena n-áirítear iad siúd atá ar íocaíochtaí Cuardaitheora Poist nó Sochar Breoiteachta ar feadh níos mó ná 12 mhí, agus daoine a fhaigheann Íocaíocht Teaghlaigh i bhFostaíocht.

Nóta: Déanfar aon íocaíocht amháin in aghaidh an phríomhfhaighteora.

• Sochar Linbh

- cnapshuim aonuaire €100 do gach leanbh a n-íoctar sochar linbh ina leith

- dlite le híoc i Meitheamh 2023

• Liúntas Éadaí agus Coisbhirt don Scoilbhliain Nua

- dáta cur chun feidhme: Meitheamh 2023

- íocfar íocaíocht bhreise €100 freisin in 2023, do gach leanbh a n-íoctar an Liúntas Éadaí agus Coisbhirt don Scoilbhliain Nua ina leith

- i gcás leanbh atá idir 4-11 bhliain d'aois, íocfar €260 leo agus íocfar €385 leo siúd atá 12 – 22 bhliain d'aois.