Oifigeach Fiosrúcháin

Tá Oifigeach Fiosrúcháin ceaptha ag an Roinn chun gearáin a dhéantar faoi alt 38 den Acht um Míchumas a imscrúdú. Faoin Acht, tá dualgas ar gach comhlacht poiblí a chinntiú go gcuirtear rochtain iomlán ar a bhfoirgnimh agus ar a seirbhísí ar fáil do dhaoine faoi mhíchumas.

Féadfaidh tú gearán a dhéanamh má mheasann tú gur theip orainn forálacha Ailt 25 go 28 den Acht um Míchumas 2005 a chomhlíonadh.Déanfaidh ár nOifigeach Fiosrúcháin imscrúduithe go príobháideach agus soláthróidh sé tuarascáil ina luafar:

• má tá do ghearán bailí
• cé acu ar theip ar an roinn maidir le do ghearán nó nár theip
• agus i gcás inar tharla teip, leagfar amach sa tuarascáil na céimeanna atá le glacadh chun comhlíonadh amach anseo a chinntiú.

Cuirfear an tuarascáil seo ar fáil d’Ard-Rúnaí na Roinne agus don duine a rinne an gearán.

Chun gearán a dhéanamh faoi alt 38 den Acht um Míchumas, seol ríomhphost chuig: InquiryOfficer@welfare.ie

Ba chóir go mbeadh an t-eolas seo a leanas san áireamh i ngearán faoi alt 38 den Acht um Míchumas 2005:

• ainm, seoladh, uimhir theileafóin teagmhála agus seoladh ríomhphoist (má tá siad ar fáil)
• Cibé an raibh tú ag lorg rochtain ar fhaisnéis, ar sheirbhísí nó ar fhoirgneamh poiblí nó ar áit phoiblí
• An raibh rochtain á lorg agat duit féin nó ar son duine eile?
• cén chuid den Roinn Coimirce Sóisialaí (RCS) lena ndeachaigh tú i dteagmháil?
• Cén cineál oibre a bhí á lorg agat?
• cén chaoi agus cén fáth nach raibh an tseirbhís, an fhaisnéis, an áit phoiblí nó an foirgneamh inrochtana duit féin nó don duine a ndearna tú gearán thar a cheann nó thar a ceann?
• cén freagra a bhí ag an duine/na daoine a raibh tú ag déileáil leo?
• ar atreoraíodh thú chuig Oifigeach Rochtana?
• an ndearna tú gearán le Bainisteoir an RCS Áitiúil nó le Bainisteoir na Seirbhíse sular lean tú ar aghaidh leis an ngearán faoi alt 38 den Acht um Míchumas?
• Cén fáth a bhfuil tú míshásta leis an bhfreagairt nó leis na gealltanais?
• An bhfuil aon ghníomh eile á dhéanamh maidir leis an tsaincheist is ábhar don ghearán e.g. gearán leis an gCoimisiún um Chaidreamh san Áit Oibre faoin Acht um Stádas Comhionann?

Admhóidh an tOifigeach Fiosrúcháin go bhfuarthas do ghearán a luaithe agus is féidir, ach tráth nach déanaí ná cúig lá oibre tar éis é a fháil. Má theastaíonn imscrúdú, críochnóidh an tOifigeach Fiosrúcháin a dtuarascáil laistigh de 20 lá oibre ón bhfaisnéis riachtanach uile a fháil, lena n-áirítear faisnéis bhreise a iarrtar ar an ngearánaí. I gcás nach mbeidh tuarascáil iomlán ar fáil laistigh de 20 lá, seolfaidh an tOifigeach Fiosrúcháin freagra eatramhach chugat agus tabharfaidh sé nó sí le fios cathain a bheidh an tuarascáil ar fáil.

Má bhaineann do ghearán le haon saincheist eile, seol ríomhphost chuig CustomerServices@welfare.ie