Seicliosta cáipéisíochta nuair atá iarratas a dhéanamh agat ar Shochar Cuardaitheora Poist

Nuair a chuireann tú iarratas isteach ar Shochar Cuardaitheora Poist, ní mór duit cáipéisí ar leith a thabhairt leat.

Glactar le do phas nó do cheadúnas tiomána mar fhianaise aitheantais.

Mura bhfuil pas nó ceadúnas tiomána agat, ba chóir duit cáipéisí eile atá agat a thabhairt leat, cáipéis ar bith ar a bhfuil grianghraf díot inti ach go háirithe.

D'fhéadfadh go nglacfaí leis na cáipéisí seo a leanas chomh maith: cárta creidmheasa, cárta dochair, cárta leighis, cárta aitheantais aoise, cárta aitheantais oibre, cárta ballraíochta club.

Ní ghlactar leis na nithe seo a leanas mar fhianaise aitheantais:

• Teastais bhreithe nó bhaiste
• Billí nó litreacha pearsanta

Ní féidir cinneadh a dhéanamh maidir le d'iarratas go dtí gur féidir d'aitheantas a chruthú

D'fhéadfaí go n-iarrfaí ort fianaise ar do sheoladh a thaispeáint. Ba chóir duit aon cheann de na cáipéisí seo a leanas a thabhairt leat:

• Billí a seoladh chugat le déanaí, ó chomhlachtaí fóntais mar shampla; leictreachas, fón (líne talún nó fón póca), gás, teilifís chábla, muirir dramhaíola srl.
• Ráitis/comhfhreagrais a seoladh chugat le déanaí, ó bhainc, cumainn fhoirgníochta, comhair chreidmheasa, comhlachtaí cártaí creidmheasa nó institiúidí airgeadais eile
• Litreacha a seoladh chugat le déanaí, ó chomhlachtaí árachais, údaráis áitiúla, ranna rialtais nó ó na Coimisinéirí Ioncaim
• Leabhar cíosa údaráis áitiúil, comhaontú morgáiste nó léasaithe

Nóta: is éard is cáipéis a eisíodh le déanaí ná cáipéis ar eisíodh í le 2 mhí anuas. Is gá go mbeadh na doiciméid bhunaidh amháin i gceist, ní ghlacfar le cóipeanna de na doiciméid.

Má tá amhras maidir le do sheoladh, ní íocfar Sochar Cuardaitheora Poist leat go dtí go ndéanfar do sheoladh a chruthú.

Ní mór duit na doiciméid agus an t-eolas seo a leanas a thabhairt leat chomh maith:

Nuair a chuireann tú iarratas isteach ar Shochar Cuardaitheora Poist, ní mór duit na doiciméid seo a leanas a thabhairt leat:

• Do Chárta Seirbhísí Poiblí (mura bhfuil cárta agat, iarrfar ort clárú chun cárta a fháil agus tú ag cur isteach ar Shochar Cuardaitheora Poist)
• D’Uimhir Phearsanta Seirbhíse Poiblí
• Sonraí maidir leis an bhfáil atá ort chun a bheith ag obair agus maidir le hiarrachtaí ar bith atá déanta agat chun fostaíocht a lorg. Litreacha, mar shampla, a sheol tú chuig fostóirí agus freagraí ar bith a fuair tú
• Sonraí ioncaim
• Sonraí ioncam do chéile/do pháirtí (más cuí)
• Sonraí faoi do leanaí
• Fianaise aitheantais - tuilleadh eolais thíos
• Fianaise ar do sheoladh - tuilleadh eolais thíos

Má chuirtear ar iomarcaíocht tú, ní mór duit cáipéisíocht a thabhairt leat ina sonraítear d'íocaíocht iomarcaíochta. Má tá tú le híocaíocht ar luach níos airde ná an íocaíocht reachtúil iomarcaíochta a fháil, ba chóir duit litir a thabhairt leat ó d'fhostóir ina sonraítear an méid íocaíochta iomarcaíochta atá á bhfáil agat. Má tá d'iarratas ar íocaíocht iomarcaíochta i mbun socraithe, ba chóir duit iarratas a chur isteach ar Shochar Cuardaitheora Poist fós. Nuair a gheobhaidh tú d'íocaíocht iomarcaíochta, ní mór duit scéal a chur chuig an tIonad Intreo áitiúil nó chuig an Oifig Bhrainse Leasa Shóisialaigh.

Má tá tú á leagan as ar bhonn sealadach, ní mór duit litir a thabhairt leat ó d'fhostóir ina sonraítear na nithe seo a leanas:

• Gur leagadh as tú gan pá
• An lá deireanach inar oibrigh tú
• Céard is cúis leis an leagan as
• An tréimhse ama ina bhfuiltear ag súil go mbeidh tú leagtha as

Má tá do laethanta oibre á laghdú, ní mór duit litir a thabhairt leat ó d'fhostóir ina sonraítear na nithe seo a leanas:

• Gur laghdaíodh do laethanta oibre ar bhonn sealadach
• Cé mhéad laethanta oibre a bhíodh agat in aghaidh na seachtaine
• Cé mhéad laethanta oibre a bhíonn agat in aghaidh na seachtaine anois
• Laghdú do phá