Seirbhísí Aistriúcháin, Ateangaireachta agus Teanga Chomharthaíochta

Tá an roinn seo tiomanta seirbhísí aistriúcháin, ateangaireachta agus teanga chomharthaíochta a sholáthar de réir na Cairte Custaiméirí. Seo gealltanas chun seirbhís inrochtana, ghairmiúil, éifeachtach agus chúirtéiseach a sholáthar do chách.

Tá na seirbhísí aistriúcháin, ateangaireachta agus teanga chomharthaíochta seo a leanas á sholáthar do chustaiméirí uile na roinne nuair atá gá leo:

• ateangaire Teanga Chomharthaíochta Gaeilge
• faisnéis scríofa nó foirmeacha iarratais i mBraille, i bhformáid Fuaime, nó i gCló Mór
• seirbhís aistriúcháin do dhoiciméid atá de dhíth, maidir le hiarratas a dhéanamh, nó rochtain ar fhaisnéis maidir le scéim nó seirbhís
• seirbhís ateangaireachta teanga

Má theastaíonn aon cheann de na seirbhísí seo uait, déan teagmháil leis an Ionad Intreo is gaire duit, leis an Oifig Áitiúil nó Brainse nó leis an oifig atá ag déileáil le d’éileamh le do thoil.

Beidh foireann na Roinne sásta cabhrú leat teacht ar an tseirbhís atá uait.

Is féidir linn rochtain a sholáthar ar ár seirbhísí aistriúcháin, ateangaireachta agus teanga chomharthaíochta i ngach teanga. Is féidir lenár bhfoireann rochtain a fháil ar ateangaire teanga ar an bhfón chun cabhrú leat agus tú ag plé leis an roinn. Is féidir é seo a sholáthar in aon teanga. Is féidir linn ateangaire a sholáthar duit freisin trí fhíseán nó i bpearsa.

Cé gur féidir cabhair ó theaghlach nó cairde a labhraíonn Béarla nó aipeanna aistriúcháin a úsáid i gcúinsí áirithe (mar shampla, foirm iarratais a iarradh nó ceisteanna a chur a bhaineann le faisnéis shimplí ar nós uaireanta oscailte), níor cheart go mbraitear orthu le haghaidh rannpháirtíochta oifigiúla linn, ar nós cruinnithe nó agallamh.

Le fógra roimh ré, soláthróimid ateangaire d’aon rannpháirtíocht mar sin ar an bhfón, ar fhíseán, nó i bpearsa, d’aon teanga.

Is féidir linn ateangaire Teanga Chomharthaíochta Gaeilge a sholáthar duit freisin i bpearsa nó trí nasc físeáin.

Soláthraíonn an roinn seirbhís aistriúcháin ar dhoiciméid, ar iarratas, i gcás ina dteastaíonn na doiciméid sin chun tacú le d’iarratas. Áirítear leis seo aistriúcháin ar dhoiciméid go nó ó Bhéarla, Ghaeilge agus aon teanga eile, chomh maith le formáidí malartacha ar nós braille agus aistriúchán fuaime.

Is féidir linn freisin comhfhreagras ón roinn a aistriú duit, má theastaíonn sé uait.