Tuarascáil Bhliantúil 2024

Tá Tuarascáil Bhliantúil 2024 de chuid na Roinne Coimirce Sóisialaí foilsithe anois.

Tá ról ríthábhachtach ag an Roinn maidir le tacú le daoine aonair, teaghlaigh agus pobail ar fud na hÉireann. Is é ár misean rannpháirtíocht ghníomhach agus cuimsiú gníomhach sa tsochaí a chur chun cinn trí raon leathan tacaí ioncaim, seirbhísí fostaíochta agus clár cuimsithe sóisialta.

Tugann an tuarascáil sonraí faoin obair shuntasach a rinneadh i rith na bliana. In 2024, bhí an caiteachas iomlán cothrom le €26.99 billiún. Cuireadh pacáiste tacaíochtaí breise €2.6 billiún ar fáil faoi Bhuiséad 2025, a raibh sé mar aidhm leo brúnna costas maireachtála a mhaolú trí mheascán d’íocaíochtaí cnapshuime agus méaduithe ar rátaí seachtainiúla cosanta sóisialaí.

Ar na buaicphointí a bhí ann i rith na bliana, bhí:

• Tacaíochtaí méadaithe do phinsinéirí, cúramóirí, daoine faoi mhíchumas agus teaghlaigh ar ioncam íseal.
• Leathnú ar Chlár na mBéilí Scoile, a cuireadh breis is 1,000 scoil leis agus a rinne an réiteach do rochtain uilíoch i ngach bunscoil ó mhí Aibreáin 2025.
• Seoladh an chláir phíolótaigh um Béilí Samhraidh chun cuidiú le dul i ngleic le hocras i rith na laethanta saoire, ag tacú le suas le 40,000 leanbh leochaileach le tosú i rith shamhradh 2025 i gcomhpháirtíocht leis an Roinn Oideachais.
• Tabhairt isteach an Deontais do Naíonáin Nuabheirthe, a aithníonn na costais bhreise a bhíonn le sárú ag teaghlaigh a bhfuil leanaí nua acu.
• Síneadh incháilitheachta Sochair Linbh chuig leanaí 18 mbliana d’aois agus athruithe reachtaíochta chun cothabháil leanaí a eisiamh ó thástáil acmhainní.
• Dul chun cinn ar athchóirithe móra beartais, lena n-áirítear tabhairt isteach
  Shochar Pá-Choibhneasa do Chuardaitheoirí Poist agus achtú Acht an Chórais Uathrollaithe Coigiltis Scoir, a réitíonn an bealach do sheoladh Mo Chiste don Todhchaí in 2026.
• Seirbhísí feabhsaithe do dhaoine faoi mhíchumas, lena n-áirítear seoladh an Chláir nua WorkAbility: Inclusive Pathways to Employment Programme, agus athsheoladh an Chláir Obair agus Rochtain a chuireann tacaíocht airgeadais ar fáil chun daoine faoi mhíchumas a fhostú. Rinneadh eagraíocht atá cairdiúil le cárta JAM den Roinn in 2024 agus cuireadh tús le rolladh amach Seomraí Ciúine in ionaid Intreo.