Tá an tAire Humphreys ag tathant ar oibrithe gan a gcuid teidlíochtaí faoin Scéim Sochar Cóireála a chailleadh
- Foilsithe: 8 Lúnasa 2024
- An t-eolas is déanaí: 13 Lúnasa 2024
- Baineann beagnach 1.2 milliún leas as an scéim go dtí seo in 2024
- Maoiniú chun Áiseanna Éisteachta, Obair Fhiaclóireachta, Scrúduithe Radhairc agus Peiriúicí
- Scéim maidir le tabhairt ar ais d’oibrithe a íocann isteach sa chóras trína ranníocaíochtaí ÁSPC
- “Ná caill amach - Cuir do scrúdú sláinte in áirithe inniu!” – An tAire Humphreys
Tá an tAire Coimirce Sóisialaí, Heather Humphreys TD, tar éis oibrithe a spreagadh chun leas a bhaint as Sochar Cóireála a Roinne, scéim a thacaíonn le hoibrithe rochtain a fháil ar chóireálacha fiaclóireachta, radharc na súl agus éisteachta.
Faoin Scéim Sochar Cóireála, is féidir le duine cáiliú le haghaidh:
- Sochar fiaclóireachta – scrúdú béil bhliantúil saor in aisce agus íocaíocht €42 i dtreo scála agus snas, nó cóireáil pheiriadach, uair sa bhliain féilire. Má tá costas glantacháin nó cóireála peiriadach níos mó ná €42, ní mór don chustaiméir an t-iarmhéid a íoc - caidhpeáilte ag €15 ar scála agus snas. Níl aon teorainn ar an iarmhéid a ghearrtar ar chóireáil pheiriadach.
- Sochar optúil - tástáil radharc na súl in aisce gach 2 bhliain agus liúntas i leith spéaclaí, lionsaí tadhaill, lionsaí leighis agus deisiúcháin.
- Áiseanna éisteachta - Deontas uasmhéid de €500 in aghaidh na háise éisteachta gach ceithre bliana (€1,000 do phéire), chomh maith le deontas suas le €100 in aghaidh na cabhrach le haghaidh costas deisiúcháin gach ceithre bliana.
- Táirgí athsholáthair gruaige / peiriúicí– Deontas uasmhéid de €500 in aghaidh an táirge in aghaidh na bliana. Cabhraíonn an íocaíocht le daoine a d’fhulaing caillteanas gruaige mar gheall ar chóireáil ailse nó cineálacha áirithe alóipéice chun táirge athsholáthair gruaige a cheannach.
Ag labhairt inniu, dúirt an tAire Humphreys:
“Molaim go láidir do gach oibrí breathnú ar a gcuid teidlíochtaí faoin scéim Sochar Cóireála áit ar féidir leo leas a bhaint as scrúduithe fiaclóireachta saor in aisce, scrúduithe súl agus tástálacha éisteachta.
“Molaim go háirithe dóibh siúd atá faoi 25 bliain d’aois breathnú ar a dteidlíochtaí faoin scéim. In 2022, d’athraigh mé na ranníocaíochtaí árachais a theastaíonn d’oibrithe níos óige chun é a dhéanamh níos fusa dóibh cáiliú. D’aithin an t-athrú sin go bhfuil líon suntasach daoine óga ag dul isteach sa lucht saothair níos déanaí anois agus gur lú an seans go mbeidh an líon ranníocaíochtaí árachais shóisialaigh a theastaíonn chun leas a bhaint as an scéim Sochar Cóireála bailithe suas acu.
“Is éard atá i gceist leis an scéim seo ná rud éigin a thabhairt ar ais do dhaoine a oibríonn go dian agus a chuireann leis an gcóras le ranníocaíochtaí ÁSPC. Ba mhaith liom a chinntiú go bhfuil daoine ar an eolas faoi agus go mbainfidh siad leas as.
“Tá lúcháir orm tacú leis an scéim seo a dhéanann tairbhe do na milliúin oibrithe agus mholfainn do gach duine a bhfuil teidlíocht acu a chinntiú go bhfaigheann siad an leas iomlán as a ranníocaíochtaí ÁSPC.”
Miondealú ar Éilimh agus Caiteachas 2024 faoin Scéim Sochar Cóireála:
| Scéim | Éilimh go dtí seo (Iúil 2024) | Caiteachas go dtí seo (Iúil 2024) |
| Fiaclóireachta | 753,787 | €46,206,620.00 |
| Súl | 403,340 | €28,105,702.76 |
| Fearas Leighis (lena n-áirítear Gruaig & Áiseanna Éisteachta) | 20,454 | €17,286,716.59 |
| Iomlán | 1,177,581 | €91,599,039.35 |
Nótaí d'Eagarthóirí:
Faoin scéim Sochar Cóireála, soláthraítear seirbhísí fiaclóireachta, optúla agus cluas d’fhostaithe faoi árachas, do dhaoine féinfhostaithe agus do dhaoine ar scor, a bhfuil an líon riachtanach ranníocaíochtaí ÁSPC cáilitheacha acu. Is féidir le daoine leas a bhaint as raon cóireálacha, saor in aisce nó páirtmhaoinithe.
Ina theannta sin, is féidir le rannpháirtithe a d’fhulaing caillteanas gruaige mar gheall ar chóireáil ailse nó cineálacha áirithe alóipéice leas a bhaint as deontas €500 chun táirge athsholáthair gruaige a cheannach.
Chun cáiliú, ní mór do dhuine ar a laghad 260 ranníocaíocht ÁSPC a bheith íoctha ag Aicme A, E, H, P nó S, ó thosaigh sé/sí ag obair, agus 39 ranníocaíocht íoctha nó creidiúnaithe sa bhliain ranníocaíochta ábhartha ar a bhfuil an t-éileamh bunaithe. Is é 2022 an bhliain ranníocaíochta ábhartha d’éilimh a dhéantar in 2024.
Suas go dtí 2022, bhí orthu siúd idir 25-28 bliain d’aois a bheith i bhfostaíocht ar feadh 5 bliana chun cáiliú le haghaidh Sochar Cóireála. Laghdaíodh an tréimhse seo go 39 seachtain ó Aibreán 2022, rud a chiallaíonn gur laghdaíodh líon na ranníocaíochtaí ÁSPC a theastaíonn chun rochtain a fháil ar shochair chóireála don chohórt seo ó 260 go 39. Tá coinníollacha cáilitheacha modhnaithe ann freisin dóibh siúd atá os cionn 60 bliain a chiallaíonn, nuair a shásaítear iad, go gcáilíonn tú ar feadh do shaoil.
Tá tuilleadh faisnéise maidir leis an Scéim Sochar Cóireála agus a coinníollacha cáilithe ar fáil ag gov - Treatment Benefit Scheme (www.gov.ie)