Tugann an tAire Dara Calleary dearbhú do shealbhóirí tí maidir le tacaíocht leanúnach dóibh siúd atá buailte ag Stoirm Éowyn

• Tacaíocht Chúnaimh Dhaonnúil ar fáil d’úinéirí tí atá buailte ag Stoirm Éowyn
• Tacaíocht airgeadais ar fáil do dhaoine nach bhfuil aon soláthar cumhachta nó uisce acu
• Tá oifigigh Leasa Pobail ar fáil ar fud na tíre chun cabhrú leo
• Tá iomlán de €316,000 íoctha go dtí seo le haghaidh 1,613 éileamh

Thug an tAire Coimirce Sóisialaí, Dara Calleary, dearbhú d’úinéirí tí maidir le tiomantas leanúnach na Roinne tacaíocht a thabhairt do gach úinéir tí atá buailte ag Stoirm Éowyn tríd an Scéim Tacaíochta um Chúnamh Daonnúil.

Tá an íocaíocht airgeadais éigeandála um Chúnamh Daonnúil ar fáil d’úinéirí tí díreach tar éis teagmhas drochaimsire. Tá sé ar fáil d’úinéirí tí i gceantair atá buailte nach bhfuil aon soláthar cumhachta nó uisce acu agus áirítear leis tacaíocht chun íoc as cóiríocht mhalartach más gá.

Glacann an roinn cur chuige a bhfuil trí chéim ag baint leis, chuici féin, agus í ag tabhairt aghaidhe ar imeachtaí éigeandála:

Soláthraíonn Céim 1 íocaíochtaí tacaíochta éigeandála bia, éadaí agus earraí pearsanta díreach i ndiaidh na heachtra. Ní dhéantar tástáil ioncaim ar na híocaíochtaí seo agus go ginearálta baineann siad le bia agus éadaí riachtanacha bunaithe ar riachtanas láithreach na ndaoine aonair a bhfuil tionchar orthu.

Tacaíocht do Chóiríocht Mhalartach (nach ndéantar tástáil ioncaim uirthi)

Tá tacaíocht nach bhfuil de réir tástála ioncaim ar fáil faoi Chéim 1 den Scéim um Chúnamh Daonnúil le haghaidh costais chóiríochta malartacha.

1. Daoine gan chumhacht a bhfuil lóistín eile faighte acu i.e óstán, Leaba is Bricfeasta.

Tá tacaíocht airgeadais le costas na leaba agus bricfeasta den chóiríocht ar fáil trí HAS. Iarrfar ar an duine deimhniú a sholáthar maidir leis an áirithint/admháil.

2. Daoine gan chumhacht atá fós le cóiríocht eile a fháil acu m.sh. óstán, Leaba is Bricfeasta.

Tá tacaíocht airgeadais le costas na leaba agus bricfeasta den chóiríocht ar fáil trí HAS. Beidh ar an duine an lóistín a chur in áirithe/a shocrú agus deimhniú a sholáthar faoin áirithint/admháil.

3. Daoine a d’aimsigh agus a d’íoc as lóistín eile ar feadh tréimhse nuair a bhí siad gan chumhacht ach atá tar éis filleadh abhaile ó shin. Tá tacaíocht airgeadais le costas na leaba agus bricfeasta den chóiríocht ar fáil trí HAS. Iarrfar ar an duine deimhniú a sholáthar maidir leis an áirithint/admháil.

Nóta: Léireoidh an leibhéal tacaíochta a sholáthrófar rátaí réasúnta bunaithe ar infhaighteacht costais áitiúil.

Breithneofar tacaíocht airgeadais le costas na leaba agus bricfeasta den chóiríocht. Déileálfar le hiarratais ar thacaíocht le costas bia/béilí ar bhonn cás ar chás.

Tacaíocht d’Athchur Earraí agus Tacaíocht Airgeadais Fadtéarmach

Is féidir leis an Scéim Cúnaimh Dhaonnúil tacaíocht a sholáthar freisin d’athsholáthar earraí agus tacaíocht níos forleithne agus níos fadtéarmaí faoi na céimeanna éagsúla seo a leanas.

• Is éard atá i gceist le Céim 2 ná earraí bána, earraí troscáin bunúsacha agus earraí tí riachtanacha eile a athsholáthar.
• Is é Céim 3 ná an tacaíocht airgeadais níos fadtéarmaí a theastaíonn a aithint, lena n-áirítear plástráil, tirimlíneáil, athchur urlár, athshreangú leictreach agus péinteáil.

Tá tacaíocht ar fáil freisin chun earraí bána agus troscán bunúsach a athsholáthar agus chun damáiste do thithe a dheisiú. Is iad na teorainneacha ioncaim do chéim 2 agus 3 de na tacaíochtaí seo ná: €50,000 do dhuine singil; €90,000 do lánúin agus €15,000 in aghaidh an linbh chleithiúnaigh.

Féadfar leibhéal tacaíochta maolaithe nó laghduithe a sholáthar i gcásanna ina bhfuil ioncam teaghlaigh os cionn na dteorainneacha seo. Braitheann leibhéal na híocaíochta ar cé chomh trom agus atá an damáiste agus ar chumas duine na costais sin a íoc.

Tá an tSeirbhís Leasa Pobail ag obair go dlúth leis na húdaráis áitiúla agus tá Oifigigh Leasa Pobail ag tabhairt cuairte ar dhaoine ina dtithe nuair is gá chun tacaíocht a sholáthar.

Más gá d’aon úinéir tí atá buailte ag drochaimsir rochtain a fháil ar na tacaíochtaí seo, tá sonraí teagmhála éigeandála na Seirbhíse Leasa Pobail ar fáil anseo: Fógraí Custaiméara.

Sonraí teagmhála éigeandála Seirbhísí Leasa Pobail i gcaitheamh an deiridh seachtaine seo.

Beidh foireann na Seirbhísí Leasa Pobail ar fáil, de réir mar is gá, thar an deireadh seachtaine agus is féidir teagmháil a dhéanamh leis an tseirbhís ag

• Fón: 0818 60 70 80 ó 10am go 4.30pm Dé Sathairn, Dé Domhnaigh agus Dé Luain na Saoire Bainc (is d’éigeandálaí na Scéime Cúnaimh Dhaonnúil amháin an líne fhóin seo).
• Lasmuigh de na huaireanta seo, seol ríomhphost chuig mailto:HAS@welfare.ie Déantar monatóireacht ar gach ríomhphost.

Tá tuilleadh faisnéise faoin Scéim Cúnaimh Dhaonnúil ar fáil ag:

Scéim Cúnaimh Dhaonnúil.