Pleanáil Oiriúnaithe Earnála

Sa Phlean Gníomhaithe ar son na hAeráide, leagtar amach gníomhartha ar fud gach earnála den tsochaí lena gcinnteofar go gcomhlíonfaimid ár ngealltanais aeráide don bhliain 2030, rud a chuirfidh ar an mbóthar ceart sinn chun astaíochtaí glan-nialasacha a bhaint amach faoin mbliain 2050.

Ar áireamh sa Phlean tá bearta oiriúnaithe aeráide chun a chinntiú go mbeidh an Stát in ann daoine a chosaint ar éifeachtaí diúltacha an athraithe aeráide in Éirinn agus bearta chun teorainn a chur le haon damáiste a dhéanfar.

Leis na bearta sin, cuirtear leis an gCreat Náisiúnta Oiriúnaithe, agus seacht roinn rialtais i mbun 12 Phlean Oiriúnaithe Earnála a ullmhú:

• Talmhaíocht, Foraoiseacht agus Bia Mara
• Bithéagsúlacht
• An Oidhreacht Thógtha agus Seandálaíochta
• Bonneagar Iompair
• Líonraí Leictreachais agus Gáis
• Líonraí Cumarsáide
• Bainistíocht Riosca Tuile
• Cáilíocht an Uisce agus Bonneagar Seirbhísí Uisce
• Sláinte

Sainaithnítear i ngach Plean na príomhrioscaí atá ann ar fud na hearnála agus an cur chuige atá á ghlacadh chun dul i ngleic leis na rioscaí sin agus chun athléimneacht in aghaidh an athraithe aeráide a fhorbairt don todhchaí. Forbraíodh iad trí phróiseas pleanála oiriúnaithe sé chéim a chur i bhfeidhm, ar próiseas é atá tuairiscithe sna Treoirlínte Pleanála Earnála le haghaidh Oiriúnú don Athrú Aeráide ar fhoilsigh an Roinn Comhshaoil, Aeráide agus Cumarsáide iad.

Áirítear gníomhartha lena ndéantar na nithe seo a leanas leis na pleananna:

• an t-oiriúnú a phríomhshruthú isteach i bpríomhphleananna agus príomhbheartais earnála
• sainaithint a dhéanamh, agus tuiscint a ghnóthú, ar na príomhleochaileachtaí, na príomhrioscaí agus na príomhdheiseanna atá roimh earnálacha sonracha agus ar mhór-rioscaí a théann i bhfeidhm ar roinnt earnálacha difriúla
• a chinntiú go ndéantar pleanáil straitéiseach éigeandála a dhíonadh ó thaobh na haeráide de
• faisnéis a shainaithint agus a bhailiú faoi na costais agus na tairbhí a bhaineann leis an oiriúnú laistigh d’earnálacha sonracha
• cur leis an acmhainn atá ann laistigh d’earnálacha chun déileáil leis an athrú aeráide
• sainaithint a dhéanamh ar na príomhbhearnaí taighde atá ann laistigh dá n-earnálacha agus aghaidh a thabhairt ar na bearnaí sin
• feabhas a chur ar chomhordú leis an earnáil rialtais áitiúil
• córais chuí faireacháin agus fíorúcháin a fhorbairt laistigh d’earnálacha