Comhairliúchán ar bhainistíocht fearainn barrleibhéil tíre (ccTLD) na hÉireann

Is é cuspóir an chomhairliúcháin seo tuairimí a iarraidh ar chreat beartaithe bainistíochta le haghaidh bhainisteoir ainmnithe na hÉireann ar an bhfearann barrleibhéil tíre (ccTLD) .ie. Cinnteoidh sé sin go mbíonn an fearann .ie ag freastal ar riachtanais an phobail Idirlín in Éirinn agus go mbainistítear an fearann ar bhealach atá comhsheasmhach le hionchais an rialtais agus an phobail.

Is ag Éirinn atá fearann barrleibhéil tíre bríomhar a bhfuil meas air. Tá ról tábhachtach ag bainisteoir an fhearainn barrleibhéil tíre .ie maidir le cobhsaíocht agus prionsabail an chórais ainmneacha fearainn agus sláine ár bhfearainn barrleibhéil tíre a chinntiú.

Aithníonn an Roinn Comhshaoil, Aeráide agus Cumarsáide go bhfuil rannpháirtíocht éifeachtach ó gach geallsealbhóir – lena n-áirítear an tsochaí shibhialta, an lucht léinn, an pobal teicniúil, agus an earnáil phríobháideach – ag teastáil chun a chinntiú go mbeidh an tIdirlíon ina theicneolaíocht thairbheach oscailte do gach duine den tsochaí i gcónaí.

Is é cuspóir an chomhairliúcháin seo téarmaí agus coinníollacha a bhunú don bhainisteoir ainmneacha fearainn ar chlárlann fearann .ie na hÉireann. Leagfar amach iontu na príomhcheanglais agus na príomhphrionsabail nach mór do bhainisteoirí ar an bpíosa ríthábhachtach bonneagair teileachumarsáide seo iad a ghlacadh.

Tá an comhairliúchán ag iarraidh tuairimí ar na nithe seo a leanas:

• an creat is cuí le haghaidh an fearann barrleibhéil tíre .ie a bhainistiú
• conas a chinntiú go gcuireann ionchais an rialtais agus an phobail bonn eolais faoi oibriú agus cinntí bhainisteoir an fhearainn barrleibhéil tíre .ie
• straitéisí maolaithe chun aghaidh a thabhairt ar rioscaí amach anseo do shlándáil agus cobhsaíocht an fhearainn barrleibhéil tíre .ie

Is féidir leat freagraí a sheoladh i bhformáidí Microsoft Word nó PDF trí ríomhphost a chur chuig CyberConsult@decc.gov.ie

nó le casadh an phoist chuig:

An Rannán Cibearshlándála, Beartais Idirlín agus Pleanála Éigeandála

An Roinn Comhshaoil, Aeráide agus Cumarsáide

Teach Tom Johnson

Bóthar Haddington

Baile Átha Cliath 4

D04 K7X4

Luaigh d’ainm, nó ainm d’eagraíochta, i líne an ábhair.

Is é 5.30pm Dé hAoine an 14 Feabhra 2025 an uair dheiridh a ghlacfar le haighneachtaí.

Táimid tiomanta do dhul i dteagmháil le geallsealbhóirí ar bhealach soiléir, oscailte agus trédhearcach. Féadfaidh aon duine nó eagraíocht aighneacht a dhéanamh i ndáil leis an gcomhairliúchán seo. Breithneoimid na haighneachtaí uile agus an t-aiseolas ar fad sula bhfoilseoimid na leaganacha deiridh den chreat bainistíochta.

Beidh do fhreagra ar an gcomhairliúchán seo faoi réir na nithe seo a leanas:

• an tAcht um Shaoráil Faisnéise, 2014
• na Rialacháin um Rochtain ar Fhaisnéis maidir leis an gComhshaol, 2007 go 2018
• an tAcht um Chosaint Sonraí, 2018

Freagraí a fhoilsiú

Féadfaimid a bhfuil sna haighneachtaí uile a gheofar mar fhreagra ar ár gcomhairliúchán a fhoilsiú ar ár suíomh Gréasáin. In imthosca den sórt sin, cuirfimid sonraí pearsanta agus faisnéis atá íogair ó thaobh na tráchtála de in eagar (bainfimid iad) roimh fhoilsiú.

Leag béim ar aon fhaisnéis atá íogair

Agus freagra á thabhairt agat ar an gcomhairliúchán seo, leag béim go soiléir ar na háiteanna ina gcuimsítear i do fhreagra aon fhaisnéis nár mhaith leat go n-eiseofaí í faoi Shaoráil Faisnéise nó faoi Rochtain ar Fhaisnéis maidir leis an gComhshaol ná go bhfoilseofaí í ar shlí eile. Is féidir na nithe seo a leanas a bheith i gceist leis sin:

• faisnéis phearsanta
• faisnéis atá íogair ó thaobh na tráchtála de
• faisnéis rúnda

Léigh ár bhFógra Príobháideachta Sonraí

Ba mhaith linn d’aird a tharraingt ar ár bhFógra Príobháideachta Sonraí, rud ina mínítear na nithe seo a leanas:

• conas agus cén uair a bhailímid sonraí pearsanta
• cén fáth a mbailímid iad
• conas a chaithimid leis an bhfaisnéis sin
• na cearta atá agat i ndáil le bailiú faisnéise pearsanta
• conas a fhéadfaidh tú na cearta sin a fheidhmiú