English

Cuardaigh ar fad gov.ie

Preasráitis

Fógraítear Cistiú Tacaíochta Pobail is fiú €6 mhilliún do thionscadail sa Lár Tíre

  • Tabharfar an cistiú do thionscadail atá faoi stiúir ag an bpobal sa Lár Tíre – faoi Chlár Chiste an Aontais Eorpaigh um Aistriú Cóir

D’fhógair an tAire Darragh O'Brien gur dámhadh Cistiú Tacaíochta Pobail is fiú €6 mhilliún, beagnach, do 10 dtionscadal atá faoi stiúir ag an bpobal sa Lár Tíre faoi Chlár Chiste an Aontais Eorpaigh um Aistriú Cóir.

Dámhadh na tionscadail tríd an tríú glao iomaíoch le haghaidh tograí sa Scéim Tacaíochta um Straitéisí Áitiúla agus Réigiúnacha Eacnamaíocha. Tá an Scéim Tacaíochta um Straitéisí Áitiúla agus Réigiúnacha Eacnamaíocha á comhchistiú ag an rialtas agus ag an Aontas Eorpach trí chlár Chiste an Aontais Eorpaigh um Aistriú Cóir.

Ba é aidhm an ghlao seo ná Pleananna Áitiúla Eacnamaíocha agus Pobail a chistiú chun deiseanna nua fostaíochta a sholáthar d’oibrithe agus do phobail a bhíodh ríspleách ar bhaint móna. Leis an nglao, soláthraítear tacaíocht spriocdhírithe do thionscadail a chuirfidh borradh faoi athléimneacht na bpobal agus faoi chreatlach eacnamaíoch mhór-réigiún an Láir Tíre.

Soláthróidh na tionscadail a ceadaíodh le haghaidh cistiú a fháil tairbhí suntasacha don réigiún, lena n-áirítear iad seo a leanas:

  • infheistíochtaí sa gheilleagar ciorclach a fheabhsú, amhail trí dhramhaíl a chosc agus a laghdú, trí éifeachtúlacht acmhainní, trí athúsáid, trí dheisiú agus trí athchúrsáil
  • sócmhainní áitiúla bonneagair agus oidhreachta a chaomhnú, a athchuspórú agus a athchóiriú lena n-úsáid mar spásanna fiontraíochta
  • tacaíocht do theicneolaíochtaí glasa, lena n-áirítear cleachtais fuinnimh in-athnuaite agus fuinnimh inbhuanaithe

Tagann an fógra seo chun cinn dornán laethanta tar éis an fhógra faoi ghrúpa eile de 17 dtionscadal ar éirigh leo cistiú a fháil ó chlár Chiste an Aontais Eorpaigh um Aistriú Cóir, laistigh den Scéim Cúnaimh Deontais Infheistíochta d’Fhiontair Bheaga agus Mheánmhéide Phríobháideacha agus Phobail atá á reáchtáil ag Fáilte Éireann. Fágann an fógra a tugadh inniu go bhfuil cistiú faighte ag breis agus 80 tionscadal ó na scéimeanna éagsúla atá ar bun faoi chlár an Aontais Eorpaigh um Aistriú Cóir.

Forbraíodh an Scéim Tacaíochta um Straitéisí Áitiúla agus Réigiúnacha Eacnamaíocha trí dhlúth-chomhoibriú idir an Roinn Comhshaoil, Aeráide agus Cumarsáide agus Tionól Réigiúnach an Oirthir agus Lár Tíre, arb é an tÚdarás Bainistíochta do Chiste an Aontais Eorpaigh um Aistriú Cóir é. Tá sí á riar trí Pobal. Tá sé mar aidhm léi tacú le straitéisí áitiúla agus réigiúnacha ó bhun aníos a chur chun feidhme.

Ag labhairt dó faoi na tionscadail a ceadaíodh lena gcistiú, dúirt an tAire O'Brien:

"Spriocdhíríodh an glao seo ar na daoine agus na pobail a ndearna an scor de bhaint móna sa Lár Tíre an difear is mó dóibh. Is é atá sna tionscadail roghnaithe ná cuid thábhachtach den aistear i dtreo todhchaí ísealcharbóin a bheidh cóir do gach duine. Táim ag súil le hamharc ar na tairbhí don chreatlach shóisialta, don gheilleagar agus don chomhshaol a thiocfaidh as na tionscnaimh seo."

Dúirt Clare Bannon, Stiúrthóir Gníomhach Thionól Réigiúnach an Oirthir agus Lár Tíre:

"Tá ríméad ar Thionól Réigiúnach an Oirthir agus Lár Tíre a fheiceáil go bhfuil an ciste ag tacú leis na tionscadail seo faoin Scéim Tacaíochta um Straitéisí Áitiúla agus Réigiúnacha Eacnamaíocha. I gcomhar le tionscadail eile a dtacaíonn clár Chiste an Aontais Eorpaigh um Aistriú Cóir leo, imríonn na tionscadail seo ról ríthábhachtach i bhforbairt réigiúnach atá faoi stiúir ag an bpobal áitiúil a bhrú chun cinn agus i dtodhchaí níos láidre agus níos inbhuanaithe do na pobail sa Lár Tíre a bhrú chun cinn. Tá bród orainn as a bheith ábalta tacú leis na smaointe uathúla tionscadail seo a léiríonn an chlisteacht atá le fáil sna pobail sa Lár Tíre."

Is deis nua í seo chun tionscadail a chistiú trí úsáid a bhaint as acmhainní faoin Scéim Tacaíochta um Straitéisí Áitiúla agus Réigiúnacha Eacnamaíocha. Bhí an glao dírithe ar fhothacar contaetha a thagann faoi Chríoch Chiste an Aontais Eorpaigh um Aistriú Cóir, ag teacht sna sála ar anailís fhianaisebhunaithe ar thionchair agus ar dháileadh cistiúcháin. Ba ghá do na tionscadail rathúla ailíniú dlúth a léiriú le Pleananna Fiontraíochta Réigiúnacha agus le Pleananna Áitiúla Eacnamaíocha agus Pobail atá sainithe ag an leibhéal áitiúil.

Bhí tionscadail a oibríonn sna limistéir seo a leanas incháilithe le haghaidh iarratas a dhéanamh faoin nglao seo: Laois, Uíbh Fhailí, an Longfort, Ceantar Bardasach Bhéal Átha na Sluaighe (Contae na Gaillimhe), Ceantar Bardasach Bhaile Átha Í agus Ceantar Bardasach Chlaonta-Mhaigh Nuad (Contae Chill Dara).

Tionscadail Roghnaithe

Tionscadal Ceanneagraíocht Tuairisc ar an Tionscadal Contae Méid an Chistiúcháin Cheadaithe *
Ionad Fiontar agus Fuinnimh an Longfoirt Comhairle Contae an Longfoirt Faoin tionscadal seo, athchóireofar foirgneamh stairiúil na hiaroifige poist i mbaile an Longfoirt chun roinnt úsáidí a chomhlíonadh, lena n-áireofar spásanna oibre comhpháirtí, an oifig turasóireachta contae agus spásanna d’imeachtaí poiblí a bhunú. An Longfort €793,822
Ionad Dalton – An tAistriú chuig Aeráidneodracht a Chumasú Comhairle Contae Uíbh Fhailí Faoin tionscadal seo, uasghrádófar foirgneamh tionsclaíoch folamh Ionad Dalton i nDroichead na Sionainne trí sheirbhísí bunúsacha a sholáthar chun go mbeifear in ann é a úsáid le haghaidh oiliúna nó cruthú fostaíochta san earnáil tógála agus san earnáil fuinnimh in-athnuaite. Uíbh Fhailí €1 mhilliún
Clár Uasoiliúna Scileanna Glasa Chill Dara County Kildare Leader Partnership CLG Faoin tionscadal seo, tá clár oiliúna saincheaptha atá dírithe ar chleachtais geilleagair ísealcharbóin agus chiorclaigh á sholáthar do dhaoine aonair imeallaithe i mBaile Átha Í agus i gClaonadh-Maigh Nuad atá ar bheagán oideachais agus a bhfuil beagán deiseanna fostaíochta acu. Cill Dara €709,314
GreenSkills Reboot: An t-aistriú chuig todhchaí inbhuanaithe a chumhachtú trí dhianchampaí scileanna Generation: You Employed, Ireland CLG Faoin tionscadal seo, tá ceithre dhianchampa scileanna glasa á soláthar sa Lár Tíre, ar campaí iad a dhíríonn ar Sheirbhísí Comhairleacha i leith Grianphainéil Fhótavoltacha a Shuiteáil agus a Iarfheistiú. An Mhí** €235,448
RegenTEC – Ionad Oiliúna agus Oideachais Athghiniúna Comhairle Contae Chill Dara Faoin tionscadal seo, tá iar-mheánscoil fholamh i mBaile Átha Í á hathfhorbairt ina mol le haghaidh Forbairt Gheilleagrach Athghiniúnach. Bainfear úsáid as an mol le haghaidh gníomhaíochtaí oiliúna agus oideachais ar gheilleagar inbhuanaithe agus ísealcharbóin. Cill Dara €998,802
Páirc Gnó Bhóthar na Canálach, Cúil an tSúdaire, a fhorbairt Comhairle Contae Laoise Faoin tionscadal seo, déanfar oibreacha caipitil ar iarláithreán Avon ar Bhóthar na Canálach, Cúil an tSúdaire, chun é a uasghrádú ina pháirc gnó agus chun fiontair a mhealladh. Laois €999,963
Ionad cóireála fuíolluisce bogaigh Allenwood Community Development Association CLG Faoin tionscadal, tógfar ionad cóireála fuíolluisce nua chun leanúnachas agus inbhuanaitheacht oibriúcháin Allenwood Community Development Association a chinntiú. Chomh maith leis sin, cruthófar spásanna glasa agus gnáthóga fiadhúlra leis an gcóras cóireála bogaigh foriomlán. Cill Dara €287,653
Glas don Saol The County Kildare Local Employment Service Network CLG Faoin tionscadal seo, cabhrófar le 300 duine i mBaile Átha Í agus i gClaonadh-Maigh Nuad a gcuid scileanna agus réimsí spéise a shainaithint agus conair ghairme a fhorbairt laistigh den gheilleagar glas trí sheirbhís Gairmthreorach ar ardchaighdeán a sholáthar. Cill Dara €299,491
Tionscadal Forbartha Inbhuanaithe Chill Chormaic Cumann Forbartha Chill Chormaic Faoin tionscadal seo, forbrófar oifig turasóireachta nua in Uíbh Fhailí chun fónamh mar mhol éiceathurasóireachta a mbeidh pointí luchtaithe feithiclí leictreacha agus seirbhísí deisiúcháin rothar aige. Uíbh Fhailí €231,787.68
Mol Fiontar Bhéal Átha na Sluaighe: Nuálaíocht, Fiontraíocht agus Fostaíocht Inbhuanaithe a Chumhachtú ar an Leibhéal Áitiúil Forbairt Pobail Cheantar Bhéal Átha na Sluaighe Faoin tionscadal seo, déanfar spás oifige nua-athchóirithe Mhol Fiontar Bhéal Átha na Sluaighe a oibríochtú trí bhaill foirne agus trealamh a chur ar fáil dó. Díreoidh an Mol ar ghnó a fhorbairt i bpríomhearnálacha amhail seirbhísí digiteacha, an cúram sláinte, teicneolaíocht an leighis agus an t-athrú aeráide trí bhéim a leagan ar a thairiscintí agus trí imeachtaí líonraithe agus seisiúin oiliúna ar ardchaighdeán a sholáthar Gaillimh €263,479
  • faoi réir comhaontú deontais

** Tá Generation: You Employed lonnaithe sa Mhí ach tá an tionscadal á sholáthar i gCríoch Ainmnithe an Láir Tíre

CRÍOCH

Nótaí don Eagarthóir

Críoch incháilithe

Tá clár Chiste an Aontais Eorpaigh um Aistriú Cóir in Éirinn spriocdhírithe ar mhór-réigiún an Láir Tíre, de réir mar a aistríonn sé ar shiúl ó bhaint móna le haghaidh úsáid fuinnimh. Tá críoch ainmnithe Chiste an Aontais Eorpaigh um Aistriú Cóir in Éirinn sainithe mar Chontae Laoise, Contae an Longfoirt, Contae Uíbh Fhailí, Contae na hIarmhí agus Contae Ros Comáin, mar aon leis na Ceantair Bhardasacha seo a leanas: Béal Átha na Sluaighe (Contae na Gaillimhe), Baile Átha Í agus Claonadh-Maigh Nuad (Contae Chill Dara), agus Carraig na Siúire agus Durlas (Contae Thiobraid Árann).

Eagraíochtaí incháilithe faoin Scéim Tacaíochta um Straitéisí Áitiúla agus Réigiúnacha Eacnamaíocha

Áiríodh iad seo a leanas leis na heagraíochtaí a bhí incháilithe chun iarratas a dhéanamh ar chistiú faoin nglao seo den Scéim Tacaíochta um Straitéisí Áitiúla agus Réigiúnacha Eacnamaíocha:

  • Údaráis áitiúla laistigh de Chríoch Chiste an Aontais Eorpaigh um Aistriú Cóir
  • Cuideachtaí Forbartha Áitiúla
  • Boird Oideachais agus Oiliúna
  • institiúidí oideachais
  • comhlachtaí poiblí eile
  • eagraíochtaí pobail agus deonacha
  • fiontair shóisialta
  • carthanais
  • eagraíochtaí neamhbhrabúis

Ciste an Aontais Eorpaigh um Aistriú Cóir

Agus é á chomhchistiú ag an rialtas agus ag an Aontas Eorpach, is é an cuspóir atá le Ciste an Aontais Eorpaigh um Aistriú Cóir cúnamh a thabhairt do na críocha sin a ndéanfaidh an t-aistriú chuig geilleagar aeráidneodrach an difear is mó dóibh. Is í an chríoch sin in Éirinn ná mór-réigiún an Láir Tíre, ar imir an t-aistriú ar shiúl ó tháirgeadh móna agus ó ghiniúint leictreachais ó mhóin tionchair dhíreacha air. Beidh méid nach mó ná €169 milliún ar fáil sa Chiste, trí acmhainní Státchiste agus Aontais Eorpaigh a úsáid, chun aistriú cóir a éascú i dtreo geilleagar ísealcharbóin sa Lár Tíre.

Trí dheiseanna a sholáthar don fhostaíocht sa Chríoch, is féidir le Ciste an Aontais Eorpaigh um Aistriú Cóir cabhrú le háit atá cuimsitheach, tarraingteach, sláintiúil agus inbhuanaithe chun cónaí agus obair ann agus chun cuairt a thabhairt air a chruthú.

Is iad seo a leanas na tosaíochtaí cláir atá ag Ciste an Aontais Eorpaigh um Aistriú Cóir:

  • Fostaíocht a ghiniúint do phobail a bhíodh ag brath roimhe sin ar tháirgeadh móna trí infheistíocht a dhéanamh sa gheilleagar áitiúil a éagsúlú
  • Tacú le tailte móna agus talamh gaolmhar a athchóiriú, a athghiniúint agus a chur in oiriúint d’fheidhmeanna eile
  • Roghanna soghluaisteachta cliste agus inbhuanaithe a thabhairt d’iarphobail mhóna chun cur ar a gcumas tairbhe dhíreach a bhaint as an aistriú glas

Is é Tionól Réigiúnach an Oirthir agus Lár Tíre an tÚdarás Bainistíochta do Chlár Chiste an Aontais Eorpaigh um Aistriú Cóir in Éirinn. Tá tuilleadh faisnéise, lena n-áirítear doiciméid an chláir agus naisc chuig faisnéis faoi ghlaonna cistiúcháin atá ar oscailt agus faoi ghlaonna cistiúcháin amach anseo, ar fáil ar shuíomh gréasáin Thionól Réigiúnach an Oirthir agus Lár Tíre.

Cuid den

Polasaí