Ceolfhoireann Bharócach na hÉireann le bheith ar an dara ceolfhoireann Éireannach riamh páirteach sa BBC Proms
- Foilsithe: 29 Lúnasa 2025
- An t-eolas is déanaí: 29 Lúnasa 2025
Tréaslaíonn an tAire O’Donovan an éacht seo leo
Beidh Ceolfhoireann Bharócach na hÉireann ar stáitse den chéad uair i Halla Ríoga Albert i Londain Dé Sathairn (30 Lúnasa) mar chuid de Shéasúr Proms BBC a bhfuil clú agus cáil air. Tá siad ar an dara ceolfhoireann Éireannach riamh a fuair cuireadh a bheith páirteach sa Proms, atá ar an bhfód le 130 bliain.
Déanfaidh an Cheolfhoireann léiriú de leagan faoi leith Bhaile Átha Cliathach ón mbliain 1742 de phíosa le Handel, Alexander’s Feast, Dé Sathairn ag 19:30 mar chuid de Shéasúr Proms an BBC. Craolfar an ceolchoirm beo ar BBC Radio 3.
Rinne an tAire Cultúir, Cumarsáide agus Spóirt, Patrick O’Donovan TD, comhghairdeas leo ar an ócáid stairiúil seo:
Is aitheantas é léiriú an tráthnóna seo le Ceolfhoireann Bharócach na hÉireann i Halla Ríoga Albert ar phróifíl ag dul i méid an ensemble bríomhar seo agus a gceannaire físeach, Peter Whelan. Le tacaíocht ó Chultúr Éireann, tá áthas orainn ár bpáirt a ghlacadh san ócáid stairiúil seo agus tá moladh ag dul do gach duine atá páirteach ann.
Tá lucht féachana ag an BBC Proms ar fud an domhain, agus tá sé ar cheann de na féilte ceoil clasaiceacha is aitheanta dá bhfuil ann, agus ceolfhoirne agus ensembles idirnáisiúnta ag tarraingt ar an ócáid go rialta.
Bhí an méid seo a leanas le rá ag an Stiúrthóir Ealaíne is Stiúrthóir na Ceolfhoirne Peter Whelan:
Le léiriú Cheolfhoireann Bharócach na hÉireann ag Proms BBC is léir go bhfuil athbheochan chultúrtha na hÉireann tar éis teacht go dtí réimse an Cheoil Chlasaicigh anois.Beidh leagan uathúil Éireannach de cheann de na saothair is mó le Handel, a ndearnadh faillí air go dtí seo, le cloisteáil inár léiriú, agus é curtha in oiriúint do lucht éisteachta Handel i mBaile Átha Cliath sa bhliain 1742. Is saibhre i bhfad oidhreacht na tíre seo ó thaobh an Cheoil Chlasaicigh de ná mar a shíltear - beidh cluas le héisteachta ag an saol mór agus is féidir linn a bheith bródúil as.
Tá an saothar seo cloiste ag lucht éisteachta in Éirinn cheana féin agus rinne an Cheolfhoireann léirithe le déanaí ag Féile Ealaíon Chill Chainnigh agus ag HandelFest i mBaile Átha Cliath.
Faigheann Ceolfhoireann Bharócach na hÉireann príomhmhaoiniú ó Chomhairle Ealaíon na hÉireann, agus tacaíocht ó Chultúr Éireann dá camchuairt idirnáisiúnta.