Fógraíonn an tAire Nic an tSaoi glao ar mhaoiniú d'eagraíochtaí a thacaíonn le híospartaigh na coireachta
- Foilsithe: 1 Meán Fómhair 2023
- An t-eolas is déanaí: 14 Meán Fómhair 2023
- D’oscail an tAire Nic an tSaoi glao 2024 ar mhaoiniú d'eagraíochtaí a thacaíonn le Maoiniú d'Íospartaigh na Coireachta.
- Iarratais á lorg ó eagraíochtaí nua agus ó eagraíochtaí atá ann cheana féin atá ag obair le hÍospartaigh na Coireachta.
D'oscail an tAire Dlí agus Cirt Eiléana Nic an tSaoi glao 2024 ar mhaoiniú d'eagraíochtaí a thacaíonn le Maoiniú d'Íospartaigh na Coireachta inniu agus thug sí cuireadh d’eagraíochtaí nua agus reatha atá ag obair le hÍospartaigh na Coireachta iarratas a dhéanamh air.
Cuireann an Roinn Dlí agus Cirt tacaíocht ar fáil gach bliain d'eagraíochtaí a oibríonn i réimse Íospartaigh na Coireachta (VOC), lena n-áirítear tacaíocht, faisnéis agus comhairle a sholáthar maidir le cearta íospartach, tionlacan cúirte agus seirbhísí tacaíochta agus comhairle eile.
Agus oscailt an ghlao ar mhaoiniú á fhógairt aici, dúirt an tAire Nic an tSaoi,
"Táimid tiomanta do phobail láidre agus shábháilte a fhorbairt agus a chinntiú go bhfuil seirbhísí tacaíochta ar fáil do gach íospartach a dteastaíonn siad uathu ar fud an Stáit."
"Aithnímid an ról ríthábhachtach atá ag eagraíochtaí tacaíochta chun cabhrú le híospartaigh na dúshláin atá rompu a shárú. Léiríonn an glao maoinithe seo ár dtiomantas do shochaí a chruthú ina dtugtar cumhacht d'íospartaigh agus ina gcloistear iad. Dearbhaíonn sé ár dtiomantas d’oibriú i gcomhar leis na heagraíochtaí sin chun a chinntiú go leanfaidh íospartaigh ar fud na tíre orthu ag fáil tacaíochta agus cúnaimh agus iad ar na daoine is leochailí".
"Trí acmhainní a chur ar fáil d'eagraíochtaí tosaigh a chuireann seirbhísí agus saineolas den scoth ar fáil, táimid ag neartú ár bhfreagartha comhchoitinne chun tacú le híospartaigh i dtreo an cheartais, an leighis agus an téarnaimh."
"Molaim do gach eagraíocht incháilithe iarratas ar mhaoiniú a chur isteach ionas gur féidir leo leanúint de sheirbhísí tacaíochta den scoth agus feabhsaithe le haghaidh na n-íospartach a chur ar fáil ar fud na tíre".
Faoi ghlao 2024 ar mhaoiniú, féadfar iarratais ó eagraíochtaí ábhartha a dhéanamh freisin chun
- Na hamanna feithimh do riachtanais tacaíochta íospartaigh na coireachta a laghdú agus línte cabhrach d'íospartaigh na coireachta a leathnú.
- Freastal ar an éileamh méadaithe ar sheirbhísí tar éis fheachtas ardaithe feasachta Íospartaigh na Coireachta agus Foréigean Baile, Gnéasach agus Inscnebhunaithe (FBGI).
- Cead a thabhairt do sheirbhísí tosaigh neamhrialtasacha pleananna leathnaithe a fhorbairt do chontaetha eile, síneadh go contaetha eile agus seirbhísí éigeandála breise a cheadú.
- Seirbhís tionlacain a leathnú i bhfianaise líon na n-íospartach atá ag dul i méid agus leordhóthanacht an tsoláthair tacaíochta atá speisialaithe agus leanúnach a chinntiú, tacú le hobair for-rochtana le híospartaigh na gáinneála agus tacú leo siúd ar mian leo éirí as an striapachas.
- Seirbhísí tosaigh neamhrialtasacha a cheadú chun feachtais earcaíochta a reáchtáil d'oibrithe deonacha.
- Cabhrú le gach finné leochaileach an córas ceartais choiriúil a leanúint ó thaobh áiseanna, tacaíochtaí, faisnéise agus oiliúna de.
Glao ar iarratais
Tá iarratais ar mhaoiniú do 2024 á lorg ó eagraíochtaí nua agus reatha atá ag obair le hÍospartaigh na Coireachta.
Féadfaidh eagraíochtaí aonair, nó cuibhreannas a bhfuil dhá eagraíocht nó níos mó páirteach ann, iarratais a chur isteach i gcás gur eagraíocht phobail, fiontar sóisialta neamhbhrabúis, an príomhpháirtí.
Ní mór Foirmeacha Iarratais Comhlánaithe a sheoladh ar ais chuig an seoladh ríomhphoist seo a leanas tráth nach déanaí ná 5pm Dé Luain an 2 Deireadh Fómhair, 2023.