Osclaíonn an tAire Dara Calleary Tionól Óige Tuaithe 2025
- Foilsithe: 24 Meán Fómhair 2025
- An t-eolas is déanaí: 24 Meán Fómhair 2025
- Cuireann an tAire Calleary fáilte roimh dhaoine óga chuig Tionól Óige Náisiúnta na Tuaithe
- Is tionscnamh de chuid Ár dTodhchaí Tuaithe, beartas náisiúnta forbartha tuaithe na hÉireann, é an Tionól agus tá sé mar aidhm aige a chinntiú go gcloiseann an Rialtas guthanna daoine óga na tuaithe.
- Tá Tionól na bliana seo ina chuid thábhachtach den phróiseas comhairliúcháin don chéad eagrán eile d’Ár dTodhchaí Tuaithe.
Inniu (Dé Céadaoin, 24ú Meán Fómhair), d’oscail an tAire Forbartha Tuaithe agus Pobail agus Gaeltachta, Dara Calleary TD, an cúigiú suí de Thionól Óige Náisiúnta na Tuaithe.
Tháinig 65 toscaire idir 12-25 bliana d’aois le chéile chun plé a dhéanamh ar na dúshláin, na buntáistí agus na deiseanna do dhaoine óga atá ina gcónaí i gceantair thuaithe na hÉireann. Thaistil daoine óga ó gach cearn den tír, lena n-áirítear ó Ghaeltacht Dhún na nGall agus Chiarraí agus na hOileáin chun moltaí a dhéanamh lena mbreithniú ag lucht déanta beartas ar fud an Rialtais.
Is tionscnamh de chuid Ár dTodhchaí Tuaithe 2021-2025, beartas náisiúnta forbartha tuaithe an Rialtais, é an Tionól, agus mhol daoine óga féin é le linn comhairliúcháin don bheartas.
Tugtar deis do lucht déanta beartas éisteacht le tuairimí daoine óga ó cheantair thuaithe na hÉireann, agus a chinntiú go gcloistear a nglórtha.
Is fóram tábhachtach é Tionól na bliana seo chun dul i gcomhairle le daoine óga maidir le forbairt an chéad leagan eile d’Ár dTodhchaí Tuaithe, a thiocfaidh i bhfeidhm ó 2026. Cabhróidh na moltaí a dhéanann na daoine óga inniu le beartais agus cláir ar fud an Rialtais a threorú le linn ré chéad bheartas eile Ár dTodhchaí Tuaithe.
Dúirt an tAire Calleary:
“Tá áthas orm fáilte a chur roimh na daoine óga chuig Tionól an lae inniu. Gabhaim buíochas leo as a bhfonnmhaireacht a gcuid ama a thabhairt suas chun labhairt linn agus as a mian soiléir chun a bpobail thuaithe a dhéanamh níos fearr le fás aníos iontu.
“Tá sé thar a bheith tábhachtach go mbeadh guth ag ár ndaoine óga i gcinntí a théann i bhfeidhm orthu. Is féidir lena n-ionchur cabhrú le beartais agus tionscnaimh a mhúnlú a thacaíonn le ceantair thuaithe a chuireann todhchaí ar fáil do dhaoine óga chun fanacht ina bpobail áitiúla, nó filleadh orthu, chun maireachtáil, obair nó staidéar a dhéanamh.”
Rinne an tAire Leanaí, Míchumais agus Comhionannais, Norma Foley, T.D., comhghairdeas le Tionól Náisiúnta Óige na Tuaithe agus dúirt sí:
“Cuireann daoine óga go mór lena bpobail agus lena ngeilleagar áitiúil faoin tuaithe. Táim bródúil as tacú le Tionól Náisiúnta Óige na Tuaithe mar go gcabhraíonn sé le daoine óga i bpobail thuaithe ról gníomhach a ghlacadh i múnlú a dtodhchaí.
“Is iontach an rud é go bhfuilimid ag dul isteach sa chúigiú Tionól Óige Tuaithe, agus táim ag tnúth le léiriú moltaí an tionóil inniu i mbeartas nua Ár dTodhchaí Tuaithe.”
Dúirt an tAire Calleary chomh maith:
“Oibríonn eagraíochtaí óige ar fud na tíre gan staonadh ar son daoine óga inár bpobail thuaithe agus gabhaim buíochas leo as a gcuid oibre leanúnaí.
“Trí Thionól Náisiúnta Óige na Tuaithe, is féidir linn a chinntiú go gcloistear guthanna óga i bhforbairt chéad bheartas eile Ár dTodhchaí Tuaithe agus go bhfanfaidh siad i gcroílár na forbartha tuaithe.
“Gabhaim buíochas leis an Aire Leanaí, Míchumais agus Comhionannais as tacú leis an Tionól inniu, agus leis an Oifig Náisiúnta Rannpháirtíochta as a gcuid iarrachtaí agus cúnaimh go léir chun an ócáid a reáchtáil.”
Nótaí don Eagarthóir
Ár dTodhchaí Tuaithe
Is é Ár dTodhchaí Tuaithe an creat uile-Rialtais d'fhorbairt inbhuanaithe thuaithe na hÉireann. Cuirtear treoirphlean ar fáil ann do cheantair thuaithe rathúla agus chuimsitheacha agus glactar cur chuige níos straitéisí, uaillmhianaí agus iomlánaíche ann maidir le hinfheistíocht a dhéanamh i gceantair thuaithe agus deiseanna a uasmhéadú dóibh.
I gClár an Rialtais, gealltar forbairt pholasaí nua Ár dTodhchaí Tuaithe don tréimhse ó 2026. Sa chéad leagan eile d’Ár dTodhchaí Tuaithe, tógfar ar éachtaí pholasaí 2021-2025, agus tabharfar aghaidh ann ar cheisteanna nua atá tábhachtach do dhaoine i gceantair thuaithe na hÉireann ag an am céanna.
Tá próiseas comhairliúcháin forleathan ar siúl le linn 2025 chun eolas a dhéanamh d’fhorbairt an bheartais nua. Áiríodh leis seo suirbhé oscailte ar líne, imeachtaí comhairliúcháin ar fud na tíre, cruinnithe iomadúla le páirtithe leasmhara, agus próiseas comhairliúcháin oscailte i scríbhinn atá beartaithe níos déanaí sa bhliain. Cinnteoidh an próiseas cuimsitheach seo go mbeidh deis ag gach páirtí leasmhar a nglórtha a chloisteáil le linn an phróisis forbartha beartais. Cuirfear tuilleadh sonraí faoin gcomhairliúchán i scríbhinn ar fáil in am trátha.
Tionól Óige Náisiúnta na Tuaithe
Is tionscnamh de chuid Ár dTodhchaí Tuaithe 2021-2025 é Tionól Náisiúnta Óige na Tuaithe agus mhol daoine óga é le linn an phróisis chomhairliúcháin chun an beartas a fhorbairt. Tugtar deis do lucht déanta beartas éisteacht le tuairimí daoine óga ó cheantair thuaithe na hÉireann, agus a chinntiú go gcloistear a nglórtha. Tá sé ionchorpraithe i gclár níos leithne Thionól Náisiúnta Óige na hÉireann a bhfuil tacaíocht an Roinn Leanaí, Míchumais agus Comhionannais aige.
D’fhreastail thart ar 65 duine óg idir 12 agus 25 bliain d’aois, ó phobail ar fud na tíre, ar an ócáid i mBaile Átha Cliath don chúigiú Tionól Óige Tuaithe.
Tionól Óige Náisiúnta na hÉireann
Bhunaigh an Roinn Leanaí, Míchumais agus Comhionannais (RLMC) Tionól Óige Náisiúnta na hÉireann chun gníomhú mar fhóram comhairleach óige ar ábhair spéise náisiúnta.
Tá ról suntasach ag an Tionól Náisiúnta Óige maidir le guth daoine óga a chur san áireamh i gcur i bhfeidhm beartas poiblí agus tosaíocht a thabhairt do ghníomhartha an Rialtais. Tagann sé le chéile suas le dhá uair eile sa bhliain agus tugann sé deis do dhaoine óga moltaí a dhéanamh go díreach chuig an Rialtas chun eolas a dhéanamh do bheartas poiblí.
An Oifig Náisiúnta Rannpháirtíochta
Bhunaigh an RLMC an Oifig Náisiúnta Rannpháirtíochta (ONR) sa bhliain 2021 chun gníomhaíochtaí Chomhairle na nÓg (comhairlí óige), Dáil na nÓg (parlaimint óige), Feidhmeannach Náisiúnta Chomhairle na nÓg, Tionól Náisiúnta Óige na hÉireann agus tionscnaimh agus struchtúir rannpháirtíochta óige gaolmhara eile a bhainistiú agus a chomhordú.
Feidhmíonn an ONR faoi threoir agus mhaoirseacht an RLMC agus tá sé freagrach as maoirseacht agus cur i bhfeidhm Phlean Forbartha Cúig Bliana Chomhairle na nÓg, a bhfuil sé mar aidhm aige Comhairle a neartú agus a fhorbairt chun a bheith ar an struchtúr rannpháirtíochta óige ceannródaíoch in Éirinn. Stiúrann, maoirsíonn agus tacaíonn an RLMC le hobair an ONR agus comhoibríonn sé leis an Oifig maidir le rannpháirtíocht tras-Rialtais le Comhairle na nÓg agus struchtúir rannpháirtíochta eile, rannpháirtíocht le páirtithe leasmhara agus tógáil caidreamh.
Comhoibríonn an RLMC, i gcomhpháirtíocht leis an Oifig Náisiúnta Rannpháirtíochta (ONR), go dlúth le ranna rialtais eile chun Tionóil Óige a thionól ar ábhair shonracha.
Mar shampla, comhoibríonn an RLMC go dlúth leis an Roinn Forbartha Tuaithe, Pobail agus na Gaeltachta chun Tionól bliantúil Óige Tuaithe a thionól.