Fógraíonn na hAirí Calleary agus Buttimer maoiniú os cionn €1.6 mhilliún do Chumann Naomh Uinseann de Pól agus Protestant Aid
- Foilsithe: 3 Meán Fómhair 2025
- An t-eolas is déanaí: 3 Meán Fómhair 2025
- Maoiniú chun tacaíochtaí riachtanacha a sholáthar; bia, oideachas, tacaíochtaí cruatain agus tí do roinnt de na daoine is leochailí sa tsochaí.
- Tacaíocht mhaoinithe fhadtéarmach do Chumann Naomh Uinseann de Pól agus Protestant Aid chun a chinntiú go leanfar leis na tacaíochtaí luachmhara a sholáthraíonn siad.
Inniu (03 Meán Fómhair, 2025) d’fhógair an tAire Forbartha Tuaithe agus Pobail agus Gaeltachta, Dara Calleary TD, agus an tAire Stáit, Jerry Buttimer TD, maoiniú os cionn €1.6 mhilliún do Chumann Naomh Uinseann de Pól agus Protestant Aid.
Gheobhaidh Cumann Naomh Uinseann de Pól maoiniú €1.41 mhilliún, agus gheobhaidh Protestant Aid €250,000,
Dúirt an tAire Calleary:
“Tá áthas orm tacaíocht leanúnach mo Roinne do Chumann Naomh Uinseann de Pól agus Protestant Aid a fhógairt.
“I gcás Naomh Uinseann de Pól, cabhróidh an maoiniú seo go mór le cinntiú go leanfaidh a gcuid seirbhísí ag tacú le daoine aonair agus teaghlaigh atá beo bocht ar fud na hÉireann.
“I gcás Protestant Aid, táim cinnte go gceadóidh méadú €70,000 ar mhaoiniú dóibh cur leis na seirbhísí den scoth a sholáthraíonn siad cheana féin agus iad a fheabhsú.
“Tríd an maoiniú seo a sholáthar, cinntíonn an Rialtas gur féidir le Cumann Naomh Uinseann de Pól agus Protestant Aid leanúint de riachtanais ríthábhachtacha a sholáthar amhail tacaíocht bhia, cúnamh tí agus oideachais, tacaíochtaí fuinnimh agus breosla dóibh siúd is mó a bhfuil gá acu leo.
“I mo thuairimse, is fianaise é ar chaighdeán oibre Chumann Naomh Uinseann de Pól agus Protestant Aid araon go leanadh leis an socrú maoinithe seo agus gur cuireadh leis thar na blianta agus go léiríonn sé aitheantas an rialtais ar thábhacht na seirbhísí seo chun dul i ngleic le bochtaineacht agus díothacht ar fud na tíre. Tá go leor daoine agus teaghlach faoi bhrú agus i ngá leis na cineálacha tacaíochtaí cuimsitheacha atá acmhainní ag Cumann Naomh Uinseann de Pól agus Protestant Aid a sholáthar, agus léiríonn an maoiniú seo tiomantas an rialtais Éire shaor ó bhochtaineacht a chruthú do chách.”
Dúirt an tAire Buttimer:
“Tá Cumann Naomh Uinseann de Pól agus Protestant Aid ag obair sa líne thosaigh sa troid i gcoinne na bochtaineachta agus na heaspa agus feiceann siad na fíordhúshláin agus na heispéiris saoil atá ag na daoine agus na teaghlaigh atá ag fulaingt cruatain.
“Tá léargais na n-eagraíochtaí seo thar a bheith luachmhar chun eolas a dhéanamh do bheartas agus chun a chinntiú go dtéitear i ngleic le príomhchúis na bochtaineachta, na heaspa agus an eisiata.
“Tá áthas orm go leanfaidh an caidreamh oibre láidir atá ag mo Roinnse le Protestant Aid agus le Cumann Naomh Uinseann de Pól agus muid ag obair i dtreo an aidhm chomhroinnte sin chun deireadh a chur le bochtaineacht agus eisiamh in Éirinn.”
Dúirt Rose McGowan, Uachtarán Náisiúnta Chumann Naomh Uinseann de Pól:
“Léiríonn an úsáid a bhaineann Cumann Naomh Uinseann de Pól as an deontas ón Roinn Forbartha Tuaithe agus Pobail agus Gaeltachta an tábhacht a bhaineann le comhoibriú idir an Rialtas agus an Cumann chun freastal ar na riachtanais is práinní atá roimh theaghlaigh.”
“Aithnítear sa chomhoibriú seo go bhfuil cumas, uaireanta, ag oibrithe deonacha an Chumainn freastal ar riachtanais áitiúla ar bhealach ní b'fhearr ná aon dream eile. Is iad oibrithe deonacha an Chumainn a chinntíonn go dtéann na cistí seo chuig na daoine is mó a bhfuil gá acu leo, agus leis an deontas seo cuirtear ar chumas ár n-oibrithe deonacha an freagra airgeadais praiticiúil a thabhairt do na daoine atá i gcruatan. Is minic gurb é sin an rud is práinní. Mar sin féin, ní hé sin an t-aon fheidhm atá ag an maoiniú seo.
“Is iad na caidrimh a eascraíonn as an gcúnamh a thabhairt an tomhas buan ar thionchar an mhaoinithe seo. Tá na caidrimh seo bunaithe ar mhisean an Chumainn maidir le cairdeas agus tacaíocht, neamhspleáchas a chur chun cinn, agus oibriú ar son an cheartais shóisialta.
“Anuraidh fuair muid beagnach 250,000 glaoch ag lorg cabhrach agus ba mhaith linn meas agus buíochas an Chumainn a chur in iúl arís dóibh siúd a d’iarr ar thacaíocht. Chuir an deontas rialtais ar ár gcumas cabhrú leo in am an ghátair, ach is iadsan a raibh an misneach acu ár gcabhair a lorg agus is iadsan na daoine atá ag cabhrú lena dteaghlaigh is mó.
“Labhraíonn ár n-oibrithe deonacha faoi neart, acmhainneacht agus dóchas na ndaoine a bhfuil sé de phribhléid ag an gCumann cabhrú leo, agus faoin gcaoi a spreagann siad iad.”
Ag fáiltiú roimh an maoiniú freisin, dúirt David Webb, Príomhfheidhmeannach Protestant Aid:
“Gabhaimid ár mbuíochas ó chroí leis an Roinn Forbartha Tuaithe agus Pobail agus Gaeltachta, tríd an gCiste um Chuimsiú Sóisialta agus Pobail, as a dtacaíocht in 2025. Téann gach cent den mhaoiniú seo go díreach chuig daoine aonair agus teaghlaigh atá ag tabhairt aghaidh ar dheacrachtaí airgeadais — lámh tharrthála i dtréimhsí géarchéime.
“Chuir comhpháirtíocht dhílis na Roinne thar na blianta ar ár gcumas foinse ríthábhachtach dóchais a sholáthar do na mílte teaghlach atá ag maireachtáil trí éiginnteacht eacnamaíochta.
“De réir mar a leanann brúnna costais mhéadaitheacha bia agus fuinnimh in 2025, leanann an t-éileamh ar chúnamh ag ardú. Sa chéad leath den bhliain seo amháin, mhéadaigh iarratais ar dheontais ghinearálta 6% i gcomparáid leis an tréimhse chéanna in 2024 — bliain ina chonacthas an líon iarratas ba mhó riamh.
“Ní fhéadfadh an tacaíocht seo a bheith níos tráthúla — aistreofar í go faoiseamh fíor agus láithreach do dhaoine atá ag streachailt le costais bhunúsacha na beatha laethúla — difríocht inláimhsithe san áit is tábhachtaí.”
Nótaí don eagarthóir:
- Tá Cumann Naomh Uinseann de Pól in Éirinn le 180 bliain agus oibríonn siad le raon éagsúil daoine maidir le bochtaineacht agus eisiamh.
- Is í an eagraíocht charthanachta dheonach is mó sa tír í. Oibríonn an Cumann ar bhonn neamh-bhreithiúnach agus ar an mbonn gurb é an t-aon chritéar le haghaidh cabhrach ná an gá atá ann.
- Tá breis is 10,000 ball agus oibrí deonach acu a oibríonn trí 1,200 comhdháil áitiúil ar fud na tíre, agus glacann an Cumann páirt i raon éagsúil gníomhaíochtaí: Tacaíocht agus cairdeas, neamhpleáchas a chur chun cinn agus obair ar son an cheartais shóisialaigh.
- Bunaíodh Protestant Aid mar charthanas breis is 180 bliain ó shin chun faoiseamh a thabhairt do dhíothacht in Éirinn. Déileálann Protestant Aid le gach glaoch fíor ag lorg cabhrach go cothrom, beag beann ar chúlra reiligiúnach, eitneach nó sóisialta.