Fógraíonn na hAirí Calleary agus Chambers infheistíocht €35.7 milliún i bhforbairt ché Inis Oírr
- Foilsithe: 28 Lúnasa 2025
- An t-eolas is déanaí: 28 Lúnasa 2025
- An chéad tionscadal a fógraíodh i ndiaidh athbhreithniú ar an Phlean Forbartha Náisiúnta, ar fiú €257bn é
- Conradh tógála €30m bronnta ar Ward & Burke Construction i ndiaidh próiseas iomaíoch tairisceana
- Meastar go gcríochnófar an tógáil laistigh de dhá bhliain
- An infheistíocht aonair is mó ar na hoileáin amach ón chósta agus sa Ghaeltacht ón Roinn Forbartha Tuaithe agus Pobail agus Gaeltachta
Inniu, Déardaoin, an 28 Lúnasa, d’fhógair an tAire Forbartha Tuaithe agus Pobail agus Gaeltachta, Dara Calleary TD, agus an tAire Caiteachais Phoiblí, Bonneagair, Athchóiriú agus Digitiú na Seirbhíse Poiblí, Jack Chambers TD, gur ceadaíodh maoiniú €35.75 milliún do Chomhairle Chontae na Gaillimhe chun dul ar aghaidh le tionscadal méadaithe cé Inis Oírr, tionscadal bonneagair suaitheanta faoi Phlean Forbartha Náisiúnta an Rialtais.
A bhuí leis an gceadú maoinithe, tá Comhairle Chontae na Gaillimhe in ann an príomhchonradh tógála, ar fiú €30 milliún é, a bhronnadh ar Ward & Burke Construction Ltd. tar éis próiseas soláthair dhá bhliain.
Is éard atá san fhorbairt ná méadú coincréite ar an gcé agus tonnchosc, a dearadh chun cosaint níos fearr a sholáthar ó thonnta agus ó stoirmeacha laistigh den chuan, mar aon le spás breise do bháid, go háirithe i rith mhíonna an tsamhraidh nuair a bhíonn an t-éileamh is mó mar gheall ar thrácht turasóireachta.
Rinne na hAirí Calleary agus Chambers an fógra le linn cuairt ar Inis Oírr inniu chun bualadh le baill de phobal an oileáin mar aon le hionadaithe ó Chomhairle Chontae na Gaillimhe agus na conraitheoirí.
Ag labhairt ag an bhfógra, dúirt an tAire Forbartha Tuaithe agus Pobail agus Gaeltachta, Dara Calleary TD:
“Is cúis áthais dom a dheimhniú go bhfuair mé an maoiniú atá riachtanach chun dul ar aghaidh le tionscadal forbartha ché Inis Oírr. Is é €35.75m costas iomlán an tionscadail seo, agus os cionn €30m don chonradh tógála amháin. Is ionann seo agus an tionscadal aonair is mó a mhaoinigh mo Roinnse ó bunaíodh í in 2017, rud a léiríonn tiomantas an Rialtais do phobail na tuaithe agus na nOileán.
“Cinnteoidh an infheistíocht seo in Inis Oírr rochtain shábháilte ar feadh na bliana do chónaitheoirí agus do chuairteoirí araon, le háiseanna níos fearr do bháid fharantóireachta, agus déanfaidh sé leas do na glúnta atá le teacht sa phobal seo.”
Dúirt an tAire Caiteachais Phoiblí, Bonneagair, Athchóiriú agus Digitiú na Seirbhíse Poiblí, Jack Chambers TD:
“Seo an chéad tionscadal a fógraíodh ó foilsíodh an Plean Forbartha Náisiúnta athbhreithnithe €275bn an mhí seo caite. Léirítear ann tiomantas an Rialtais bonneagar riachtanach a sheachadadh ar fud na tíre, lena n-áirítear ár n-oileáin agus ár bpobail Ghaeltachta.
“Baineann buntáistí na hinfheistíochta seo le i bhfad níos mó ná an struchtúr fisiciúil amháin. Cruthóidh sé fostaíocht shuntasach i rith chéim na tógála, rud a thabharfaidh méadú ar ghníomhaíocht eacnamaíoch don oileán. Is infheistíocht í seo i ndaoine, i bpobal, agus i bhfís do thodhchaí ár n-oileán agus do thodhchaí na Gaeilge mar theanga phobail. Leagann sé seo béim ar thiomantas an Rialtais chun fás eacnamaíoch a chothú trí infreastruchtúr a thacaíonn le teaghlaigh, pobail agus fiontair áitiúla.”
Dúirt Liam Conneally, Príomhfheidhmeannach Chomhairle Chontae na Gaillimhe:
“Cuirim fáilte roimh mhaoiniú na Roinne chun an ché ar Inis Oírr a uasghrádú agus a leathnú. Tacaíonn an infheistíocht seo lenár gcuspóirí sa Phlean Corparáideach chun céanna agus calafoirt a fhorbairt, ag feabhsú nascachta lenár n-oileáin. Neartóidh sé naisc iompair, tacóidh sé le pobal agus geilleagar an oileáin, agus feabhsóidh sé acmhainneacht stoirme agus sábháilteacht calafoirt.
“Le maoiniú ceadaithe, rinne Comhairle Chontae na Gaillimhe conradh don chéad chéim eile den tionscadal. Is féidir tosú láithreach ar dhearadh agus ar thógáil lasmuigh den láthair, agus táthar ag súil go dtosóidh an obair ar an láthair in Earrach 2026.”
Dúirt an Comhairleoir David Collins, Cathaoirleach Chontae na Gaillimhe:
“Is gealltanas láidir é fógra an lae inniu do thodhchaí Inis Oírr, ag tacú leis an bpobal áitiúil agus le fás na turasóireachta inbhuanaithe do na glúnta atá le teacht.”
Nótaí d’Eagarthóirí:
Is polasaí náisiúnta 10 mbliana do na hoileáin seo amach ón gcósta é Ár nOileáin Bheo, a foilsíodh i mí an Mheithimh 2023. Is í aidhm an pholasaí seo a chinntiú gur féidir le pobail inbhuanaithe, bheoga leanúint orthu ag caitheamh a saoil - agus iad faoi bhláth - ar na hoileáin amach ón gcósta ar feadh na mblianta fada.