Comhairliúchán Poiblí um Athbhreithniú Straitéiseach Iarnróid Uile-Oileáin do Mheasúnacht Straitéiseach Timpeallachta

Rinne an Roinn Iompair in Éirinn agus an Roinn Bonneagair i dTuaisceart Éireann comh-choimisiúnú ar an Athbhreithniú Straitéiseach Iarnróid Uile-Oileáin (AISRR). Nuair a chuirfear i gcrích é, beidh sé mar bhonn eolais faoi fhorbairt an chórais iarnróid ar fud an oileáin suas go dtí 2050, de réir gealltanais astaíochtaí glan-nialais sa dá dhlínse. Tá an dréacht-tuairisc agus na cáipéisí tacaíochta foilsithe anois ag na Ranna mar chuid de na riachtanais comhairliúcháin phoiblí a bhaineann le Measúnacht Straitéiseach Timpeallachta (SEA).

Sheol an tAire Iompair do Rialtas na hÉireann agus an tAire Bonneagair d’Fheidhmeannas Thuaisceart Éireann an tAthbhreithniú Straitéiseach Iarnróid Uile-Oileáin (AISRR) i mí Aibreáin 2021.

Tá sé mar aidhm ag an AISRR a bheith mar bhonn eolais faoin mbeartas agus faoin straitéis amach anseo do na hiarnróid sa dá dhlínse ar oileán na hÉireann. Tá scrúdú déanta faoin Athbhreithniú ar an gcaoi a n-úsáidtear na hiarnróid anois, cén ról a d’fhéadfadh a bheith ag iarnróid amach anseo, agus cén chaoi a bhféadfadh iarnróid an oileáin freastal níos fearr a dhéanamh ar dhaoine sa dá dhlínse. Dhírigh an tAthbhreithniú ar an gcaoi a bhféadfadh an líonra iarnróid ar fud an oileáin ionchur a bheith aige ar dhícharbónú earnáil iompair an oileáin, nascacht inbhuanaithe isteach go dtí na príomhchathracha agus eatarthu a chur chun cinn, inrochtaineacht réigiúnach a fheabhsú, agus tacú le forbairt réigiúnach ar bhonn cothrom. Cuireadh 30 moladh i láthair chun na spriocanna seo a bhaint amach. Chun moltaí an dréacht-AISRR a chur i bhfeidhm, theastódh réimse tionscadal/scéimeanna. Beidh gach ceann acu seo faoi réir mheasúnuithe féidearthachta, roghanna agus comhshaoil ag leibhéal an tionscadail, nuair is gá.

Mar chuid d’ullmhú an AISRR agus de réir riachtanais I.R. Uimhir 435 de 2004, teastaíonn tuairisc chomhshaoil chun sainaithint, cur síos agus measúnú a dhéanamh ar na tionchair shuntasacha is dócha a bheadh i gceist le feidhmiú an AISRR ar an gcomhshaol, chomh maith le roghanna réasúnta eile a chuireann san áireamh cuspóirí agus scóip gheografach an AISRR.

Is féidir le daoine ón bpobal a bhfuil suim acu ann aighneachtaí a chur faoi bhráid strategicrailreview@arup.com

Is é an spriocdháta chun iarratais a fháil mar chuid den chomhairliúchán poiblí seo ná 11:59 i.n., Dé hAoine, 29 Meán Fómhair 2023.

Cuirtear in iúl do fhreagróirí go bhfuil an Roinn faoi réir an Achta um Shaoráil Faisnéise, 2014, Rialacháin na gComhphobal Eorpach (Rochtain ar Fhaisnéis faoin gComhshaol), 2007-2014 agus na reachtaíochta um Chosaint Sonraí.

Níor cheart faisnéis phearsanta ná rúnda ná faisnéis atá íogair ó thaobh na tráchtála de a áireamh i d’aighneacht, agus glacfar leis gur ceadmhach gach faisnéis atá i d’aighneacht a scaoileadh faoin Acht um Shaoráil Faisnéise, 2014.

Beidh na freagraí mar bhonn eolais faoi chur i gcrích an Athbhreithnithe Straitéisigh Iarnróid Uile-Oileáin atá á dhéanamh ag na comhairleoirí ceaptha, Arup, chomh maith le haon socruithe eile monatóireachta agus maolaithe comhshaoil gaolmhara. Táthar ag súil go bhfoilseofar an tAthbhreithniú críochnúil roimh dheireadh 2023.

Tabhair do d’aire go bhféadfadh sé go mbeidh na haighneachtaí a gheofar ar fáil ar shuíomh idirlín an Rialtais. Beidh na haighneachtaí uile a gheofar faoi réir fhorálacha an Achta um Shaoráil Faisnéise agus na reachtaíochta Cosanta Sonraí.