Plean Oiriúnaithe don Athrú Aeráide (achoimre ar Chaibidil 6)

Tar éis na príomhrioscaí aeráide do chóras iompair na hÉireann a shainaithint, leagtar amach Plean Gníomhaíochta Oiriúnaithe spriocdhírithe in POEI II. Leagtar amach sa phlean seo an chaoi ar féidir leis an rialtas, le gníomhaireachtaí agus le hoibreoirí freagairt do na rioscaí sin agus athléimneacht fhadtéarmach a chothú sa chaoi a ndéanaimid bonneagar iompair a phleanáil, a dhearadh, a chothabháil agus a oibriú.

Aistríonn an plean gníomhaíochta riosca go freagairt. Leagtar amach ann 39 ngníomhaíocht shonracha a forbraíodh i gcomhairle le páirtithe leasmhara iompair. Is é is aidhm do na gníomhaíochtaí cur isteach a laghdú, sócmhainní iompair a chosaint, agus cabhrú le córas iompair na hÉireann leanúint de bheith ag freastal ar phobail agus ar ghnólachtaí.

Tá gach gníomhaíocht praiticiúil, dírithe agus ailínithe le sprioc fhoriomlán an phlean: chun a chur ar chumas ghréasán iompair na hÉireann tionchair aeráide a sheasamh, oiriúnú dóibh agus téarnamh uathu.

Tá na gníomhaíochtaí grúpáilte i gcúig phríomhthéama:

1. Athrú reachtach, rialála agus beartais - treoir, caighdeáin agus rialacha pleanála a thabhairt cothrom le dáta chun athléimneacht in aghaidh an athraithe aeráide a leabú i gcinntí
2. Réitigh dhúlrabhunaithe - bonneagar glas a úsáid (e.g. córais draenála uirbeacha inbhuanaithe, linnte maolaithe, coillearnacha) chun rioscaí a bhainistiú trí éiceachórais nádúrtha
3. Iompar / athrú eagraíochtúil - feabhas a chur ar an gcomhar ar fud na ngníomhaireachtaí, acmhainneacht inmheánach a fhorbairt agus feasacht a mhúscailt
4. Réitigh theicniúla - feabhsuithe bonneagair, bainistiú sócmhainní níos cliste, agus córais faireacháin riosca a sholáthar
5. Maoiniú oiriúnaithe: rianú, costáil, buiséadú - bealaí níos fearr a fhorbairt chun iarrachtaí forbartha athléimneachta a chistiú, a rianú agus a mheas

Éilíonn go leor gníomhaíochtaí sa phlean comhordú ar fud na n-earnálacha. Mar shampla, braitheann iompar athléimneach ar chórais iontaofa fuinnimh, cumarsáide agus freagartha éigeandála. Spreagann POEI II gníomhaíocht chomhleanúnach agus comhroinnt eolais chun an t-oiriúnú a dhéanamh níos éifeachtaí ar fud bhonneagar criticiúil níos leithne na hÉireann.

Áirítear sa phlean gníomhaíochtaí atá curtha in oiriúint do gach modh iompair:

• bóithre (náisiúnta, réigiúnacha, uirbeacha agus áitiúla) – a úsáideann gluaisteáin phríobháideacha, leoraithe, busanna agus seirbhísí éigeandála
• taisteal gníomhach – bealaí siúil agus rothaíochta, cosáin, glasbhealaí agus trasrianta coisithe
• busanna – Seirbhísí bus uirbeacha, réigiúnacha agus tuaithe, mar aon le bonneagar gaolmhar amhail stadanna agus scáthláin
• iarnróid throma – línte iarnróid fadraoin agus comaitéara a thacaíonn le gluaiseacht lasta freisin
• iarnród éadrom – amhail Luas i mBaile Átha Cliath
• eitlíocht – aerfoirt agus bonneagar tacaíochta
• iompair mhuirí – calafoirt agus bonneagar tacaíochta a thacaíonn le gluaiseacht daoine agus earraí ar muir

Áirítear leis freisin gníomhaíochtaí crosghearrthacha a bhfuil feidhm acu ar fud an chórais iompair ina iomláine.

Léigh tuilleadh i gCaibidil 6 den phlean