“Léiríonn an cháinaisnéis seo dul chun cinn na dtionscnamh iompair phoiblí ón bpleanáil go dtí an tógáil agus an t-oibriú, agus táthar ag súil go dtosófar obair thógála ar Chroí-Chonairí Bus i mBaile Átha Cliath ón mbliain seo chugainn, rud a bheidh sa chás céanna ansin le tionscadail thábhachtacha eile atá á dtógáil cheana féin amhail Iarnród Comaitéireachta Cheantar Chorcaí”.

"Tá sé tábhachtach chomh maith breathnú siar ar an méid atá bainte amach againn. In 2020, nuair a chuaigh an Rialtas seo isteach i gcumhacht, ba é €3 billiún an buiséad iompair don bhliain sin. I gCáinaisnéis 2025, suim €3.9 billiún a bheidh ann. Tá méadú de bheagnach €1 billiún tagtha ar an ngné chaipitil den bhuiséad thar shaolré an Rialtais seo. Is é sin go bhfuil €1 billiún breise le caitheamh ar ár gcóras iompair chun tacú le rath eacnamaíoch, folláine agus cothromas sóisialta, agus inbhuanaitheacht comhshaoil.”

“Tá athrú ollmhór tagtha ar chúrsaí iompair thar shaolré an Rialtais seo. Bhí sé mar thosaíocht agamsa agus ag mo chomhghleacaithe ár seirbhís iompair phoiblí a leathnú agus a chinntiú go bhfuil costas an iompair inacmhainne agus cothrom do chách. Tá áthas orm a fhógairt go gcuireann Cáinaisnéis 2025 maoiniú ar fáil chun leathnú a dhéanamh ar tháillí saor in aisce do leanaí ar sheirbhísí Oibleagáide Seirbhíse Poiblí chun iad siúd atá idir 5 agus 8 mbliana d’aois a chur san áireamh. Tá líon na bpaisinéirí ag fás i gcónaí agus aon uair a thugaimid seirbhís nua isteach, feicimid go bhfuil daoine, agus go háirithe daoine óga, ag tarraing orthu. Cé go bhfuil obair fós le déanamh againn, sílim go mbeidh sé an-deacair aisiompú a dhéanamh ar an athrú dearfach atá tar éis teacht ar an aistriú modha ar shiúl ó charranna príobháideacha atá feicthe againn ar fud na tíre le blianta beaga anuas, agus ar an éileamh méadaitheach ar líonra iontaofa iompair phoiblí a fheicimid gach lá.

“Beidh forbairt na gcalafort ríthábhachtach dár n-iomaíochas amach anseo, agus mar sin tá áthas orm a fhógairt inniu go bhfuil comhaontú maoinithe déanta idir Calafort Chorcaí agus Ciste Infheistíochta Straitéisí na hÉireann chun síneadh a chur le caladh ché an Chalafoirt i Rinn an Scidígh. Faoin gcomhaontú seo, ar pacáiste maoinithe €99 milliún é, ceadófar do Chalafort Chorcaí bonneagar calafoirt ilchuspóirigh a fhorbairt a bheidh in ann freastal ar riachtanais na hearnála fuinnimh in-athnuaite amach ón gcósta. Is garsprioc shuntasach é an comhaontú seo sna hiarrachtaí chun an saol a dhéanamh níos glaise agus níos inbhuanaithe do chách.”

“Is tosaíocht dúinn uile creatlach um shábháilteacht ar bhóithre a bheith againn atá oiriúnach don fheidhm. Chuige sin, dírítear arís i leithdháiltí Cháinaisnéis na bliana seo ar an ról is tábhachtaí atá ag an Rialtas, is é sin an pobal a choinneáil sábháilte.

“Leis an maoiniú atá curtha i leataobh i gCáinaisnéis 2025 don Lia-Bhiúró um Shábháilteacht ar Bhóithre (LBSB) agus don Údarás um Shábháilteacht ar Bhóithre (ÚSB), cuirfear cúnamh ar fáil le sábháilteacht ár gcóras bóithre a chinntiú dóibh siúd uile a úsáideann é. I mbliana cuirfidh an ÚSB maoiniú €18 milliún ar fáil chun feasacht ar shábháilteacht agus oideachas a chur chun cinn i measc na n-úsáideoirí bóithre ar fad. Tá mé ag obair go dian i gcónaí chun a chinntiú go gcuirfear bonn daingean faoin tsábháilteacht ar bhóithre ó thosaigh mé mar Aire, agus cuirfear moltaí faoi bhráid an Rialtais go luath chun conclúidí an athbhreithnithe chuimsithigh neamhspleách ar na socruithe atá i bhfeidhm a chur i láthair.

“Mar chomaitéir agus mar Aire Stáit araon, fáiltím roimh an obair thógála atá le tosú ar an gcéad cheann de na Croí-Chonairí Bus mar chuid de BusConnects Bhaile Átha Cliath an bhliain seo chugainn. Is ionann seo agus mórsprioc i seachadadh ár mórthionscadal caipitil, agus cabhróidh sé le seirbhís bus níos éifeachtúla agus níos iontaofa a sholáthar, rud a thacóidh le daoine an t-aistriú a dhéanamh ó thaisteal i gcarranna príobháideacha go hiompar poiblí, de réir ár spriocanna dícharbóinithe.

“Tá mé ag súil go mór leis na hoibreacha tógála atá le tosú go luath ar DART+ Thiar agus DART+ Thiar Theas agus tá mé ag súil go mór le tús a chur leis an bpleanáil anois chun na tionscadail sin a leathnú mar atá leagtha amach sa Straitéis Iompair do Mhórcheantar Bhaile Átha Cliath.

“I dtéarmaí ár nascachta níos leithne, tá €17 milliún curtha i leataobh chun ár n-aerfoirt réigiúnacha a mhaoiniú chun tacú le nascacht agus chun forbairt chothromaithe réigiúnach a fheabhsú, i bhfianaise go bhfuil 85% d’eitiltí fós ag eitilt amach as Baile Átha Cliath.

“Idir an dá linn, beidh foireann agus oibrithe deonacha Gharda Cósta na hÉireann (GCÉ) fós in ann freastal ar phobal na hÉireann in am an ghátair lena leithdháileadh i gCáinaisnéis 2025. Molaim go mór an ról atá acu maidir le daoine a tharrtháil ar muir agus an-fhonn orm i gcónaí tacú go hiomlán leo.

“Cloch mhíle shuntasach a bheidh sa bhliain seo chugainn don Roinn agus an t-aistriú go conradh nua Seirbhíse Eitlíochta do Gharda Cósta na hÉireann tugtha chun críche aici. Cuirfidh an conradh seirbhíse nua, a bronnadh ar Bristow Ireland Limited, ar chumas Gharda Cósta na hÉireann leanúint ar aghaidh ag cur seirbhísí cuardaigh agus tarrthála muirí agus intíre den scoth ar fáil, mar aon le monatóireacht chomhshaoil, agus seirbhísí éigeandála leighis héileacaptair agus aerárthach othar. Den chéad uair riamh, beidh gné den aerárthach sciathán dobhogtha san áireamh i seirbhís eitlíochta an Gharda Cósta, rud a chuirfidh tacaíocht luachmhar ar fáil thar raon rólanna an Gharda Cósta. Críochnófar tabhairt isteach céimnithe na seirbhíse eitlíochta nua don Gharda Cósta i lár 2025.

“Chreid mé i gcónaí gurb é an ról is tábhachtaí atá ag an Rialtas ná ár ndaoine a choinneáil sábháilte agus tacaíonn na bearta bóithre, muirí agus eitlíochta sa Bhuiséad seo go hiomlán leis an gcuspóir sin.”