Tuairiscithe ag an Aire go bhfuil an-dul chun cinn déanta ó thaobh iompar inbhuanaithe de
- Foilsithe: 30 Lúnasa 2024
- An t-eolas is déanaí: 30 Lúnasa 2024
D’fhoilsigh an tAire Iompair Eamon Ryan an dara tuarascáil bhliantúil dul chun cinn ar chur chun feidhme an Bheartais Náisiúnta um Shoghluaisteacht Inbhuanaithe agus an Phlean Gníomhaíochta, 2022-2025, a ghabhann leis.
Tugtar achoimre sa tuarascáil ar an dul chun cinn suntasach atá déanta ó seoladh an beartas in 2022. Leagtar béim ar na rudaí ba mhó a baineadh amach sa dara bliain de chur chun feidhme an bheartais, lena n-áirítear:
- Éire á Nascadh – An Plean Soghluaisteachta Tuaithe, atá á chur i bhfeidhm ar bhonn céimneach go fóill. Tháinig méadú 78% bliain ar bhliain ar líon na bpaisinéirí go 3.2 milliún in 2023.
- Clár á chur chun feidhme i gcónaí le seirbhísí bus baile a fheabhsú, agus seirbhísí nua curtha ar fáil i gCeatharlach agus i gCluain Meala agus pleanáil ar siúl le haghaidh seirbhísí in Inis, Leitir Ceanainn, an Muileann gCearr agus Port Laoise.
- Foilsiú an Athbhreithnithe Straitéisigh Iarnróid Uile-Oileáin, mar aon le tuilleadh leathnaithe ar an bhflít iarnróid agus tuilleadh dul chun cinn ar Chlár DART+. Cuireadh an t-ordú iarnróid (cosúil le hiarratas pleanála) maidir le DART+ an Chósta Thuaidh faoi bhráid an Bhoird Pleanála i mí Iúil 2024, agus thug an Bord cead do Líne Thiar DART+ sa mhí chéanna.
- Infheistíocht breis is €290 milliún i dtionscadail siúil agus rothaíochta in 2024, rud a fhágann go bhfuil os cionn billiún euro infheistithe ina leithéid de thionscadail ó bhí 2020 ann.
- An Gréasán Náisiúnta Raonta Rothar agus an Lámhleabhar Dearaidh Rothaíochta a fhorbairt agus a fhoilsiú.
- Tús a chur le reachtaíocht le húsáid Iompróirí Poiblí Cumhachtaithe (PPTanna) ar bhóithre poiblí a cheadú agus rialacháin le húsáid shábháilte scútar leictreach a cheadú.
- An treoir breithmheasa iompair, treoirlínte d'Údaráis Áitiúla maidir le bearta moillithe tráchta agus, rud a bhfuil an-tábhacht go deo ag baint leis, na Treoirlínte um Fhorbairt Inbhuanaithe Chónaithe agus Dlúthlonnaíochtaí.
- Cur Chuige Straitéiseach nua a fhoilsiú maidir le Rannpháirtíocht Phoiblí sa Ghníomhú ar son na hAeráide agus sa tSoghluaisteacht Inbhuanaithe, 2024-25, agus an Dara Fóram Náisiúnta maidir leis an tSoghluaisteacht Inbhuanaithe – a bhí ar siúl níos luaithe sa bhliain i bPort Laoise.
Léirítear sa tuarascáil go bhfuil 70% de na 91 gníomh a leagtar amach sa Phlean Gníomhaíochta críochnaithe, ag dul ar aghaidh de réir an sceidil nó ar siúl. Tá formhór na ngníomhartha a bhfuil moill orthu le bheith críochnaithe faoi dheireadh 2024. Tugtar tuairisc mhionsonraithe chun dáta ar gach gníomh in Iarscríbhinn 1 den Tuarascáil.
Is féidir teacht ar an tuarascáil ar láithreán gréasáin gov.ie Item was unpublished or removed
Ag labhairt dó faoi fhoilsiú na tuarascála, bhí an méid seo le rá ag an Aire Ryan:
“Beidh sé iontach dúshlánach ár spriocanna laghdaithe astaíochtaí carbóin a bhaint amach san earnáil iompair, ach tá an ghaoth ag athrú. Cé go mbeidh an t-iompar ar cheann de na hearnálacha is deacra le déanamh ‘neodrach’, léiríonn na figiúirí is déanaí ón nGníomhaireacht um Chaomhnú Comhshaoil go raibh na hastaíochtaí a bhain le hiompar in 2023 4.3 faoin gcéad faoi bhun na leibhéal a bhí ann in 2019, agus beagnach cothrom leis na figiúirí in 2022 – sin é an chéad chomhartha atá feicthe againn go bhfuil na hastaíochtaí iompair á ndícheangal ón bhfás geilleagrach.”
Dúirt an tAire:
“Tá sé mar aidhm ag an mBeartas um Shoghluaisteacht Inbhuanaithe na dálaí a chruthú chun roghanna taistil níos inbhuanaithe a chur ar fáil ach ár mbonneagar agus seirbhísí iompair phoiblí agus taistil ghníomhaigh a fheabhsú agus a láidriú, agus tá mé muiníneach i gcónaí – má leantar ar aghaidh leis an gcomhoibriú ar chur chun feidhme na ngníomhartha – gur féidir leis an mBeartas athrú ó bhonn a bhaint amach ar an mbealach a mbíonn muid go léir ag taisteal i gcomhair oibre, oideachais, spóirt agus gníomhaíochtaí sóisialta, agus ar an chaoi a gcaitheann muid ár saol laethúil le cairde, le daoine muinteartha agus laistigh dár bpobail. Ag cur leis an mBeartas um Shoghluaisteacht Inbhuanaithe, beidh straitéis nua ‘Bogadh le Chéile’, a bhfuil próiseas comhairliúcháin phoiblí críochnaithe ina leith le déanaí. Céim ríthábhachtach eile chun cinn is ea í sin lenár gcóras iompair ilmhódach a dhéanamh níos éifeachtaí agus lena chinntiú go n‑oibríonn sé do chách.”
Léiríonn an tuarascáil atá á foilsiú inniu an comhoibriú fairsing atá ag tarlú thar ghrúpa leathan páirtithe leasmhara – ranna, gníomhaireachtaí, údaráis áitiúla, grúpaí sochaí sibhialta, gnó, tionscal, ionadaithe polaitiúla, pobail, ceardchumainn – chun cuspóirí leathana an Bheartais um Shoghluaisteacht Inbhuanaithe a bhaint amach.