Tuairisc PISA 2022

Is tionscadal de chuid na hEagraíochta um Chomhar agus Fhorbairt Eacnamaíochta (ECFE) é an Clár um Measúnú Idirnáisiúnta Scoláirí (PISA). Déanann PISA measúnú ar eolas agus scileanna scoláirí 15 agus 16 bliana d’aois i dtrí réimse chognaíoch: matamaitic, léitheoireacht agus eolaíocht. Déantar iniúchadh sna trialacha ar cé chomh maith agus is féidir le scoláirí fadhbanna casta a réiteach, smaoineamh go criticiúil agus cumarsáid éifeachtach a dhéanamh. Tugann sé seo léargas ar cé chomh maith agus atá córais oideachais ag ullmhú scoláirí do dhúshláin sa bhfíorshaol agus do rathúlacht sa todhchaí. In Éirinn, is é an Foras Taighde ar Oideachas (FTO nó ERC) a chuireann PISA i bhfeidhm thar ceann na Roinne Oideachais.