Fógraíonn an tAire Oideachais agus Óige, Helen McEntee, Maoiniú do Dheich gCinn de Sheirbhísí Nua UBU chun Tacú le Daoine Óga
- Foilsithe: 27 Lúnasa 2025
- An t-eolas is déanaí: 27 Lúnasa 2025
D’fhógair an tAire Oideachais agus Óige, Helen McEntee TD, inniu suíomhanna do dheich seirbhís nua de chuid UBU, d’Áit do Spás, tar éis leithdháileadh de €1.2 milliún breise a fháil i mBuiséad 2025.
Nuair a bheidh siad bunaithe, cuirfidh na seirbhísí nua tacaíochtaí spriocdhírithe, faoi stiúir oibrithe óige, ar fáil do suas le 1,000 duine óg, ag cinntiú go soláthrófar cabhair go díreach chuig na ceantair is mó a bhfuil gá léi.
Dúirt an tAire McEntee
“Tá na tacaíochtaí agus na deiseanna cearta chun barr a gcumais a bhaint amach tuillte ag daoine óga, is cuma cá gcónaíonn siad. Tá difríocht mhór déanta ag scéim UBU d’Áit do Spás do phobail ar fud na tíre cheana féin, agus tá áthas orm, leis an infheistíocht bhreise seo, gur féidir linn a raon feidhme a leathnú anois chuig níos mó daoine óga a bhfuil an gá is mó acu léi.
“Baineann an infheistíocht seo le tacú le pobail, teaghlaigh, agus thar aon rud eile, lenár ndaoine óga. Má dhéanaimid seirbhísí UBU a leathnú, táimid ag cinntiú go bhfuil spásanna sábháilte agus oibrithe óige tiomanta, chomh maith leis na tacaíochtaí a theastaíonn uathu chun a bheith rathúil, ag níos mó daoine óga — go háirithe iad siúd atá leochaileach nó i mbaol.”
Is í scéim UBU d’Áit do Spás clár maoinithe spriocdhírithe na roinne do dhaoine óga , atá dírithe ar dhaoine óga idir 10-24 bliain d'aois atá imeallaithe, leochaileach, nó a bhfuil an baol ann nach mbeidh siad rathúil. Is í an scéim maoinithe do dhaoine óga is mó atá ag an rialtas í, agus teacht aici ar thart ar 68,000 duine óg. Faoi láthair, cuireann an scéim maoiniú ar fáil do 249 seirbhís óige spriocdhírithe ar fud 16 bhord oideachais agus oiliúna (BOOanna), a dhéanann maoirseacht ar sholáthar an mhaoinithe agus na dtacaíochtaí ina gceantair áitiúla.
Soláthraíonn seirbhísí UBU spásanna sábháilte do dhaoine óga ina bpobail áitiúla chun cur ar a gcumas imthosca diúltacha a shárú agus barr a gcumais a bhaint amach agus chuige sin a gcuid torthaí i dtaca le forbairt phearsanta agus shóisialta a fheabhsú. Tar éis gairm ar aighneachtaí ó BOOanna le déanaí, bronnadh maoiniú ar dheich mBOO le haghaidh seirbhísí nua UBU:
- Bord Oideachais agus Oiliúna an Chabháin agus Mhuineacháin
- Bord Oideachais agus Oiliúna Dhún na nGall
- Bord Oideachais agus Oiliúna Chiarraí
- Bord Oideachais agus Oiliúna Chill Dara agus Chill Mhantáin
- Bord Oideachais agus Oiliúna Chill Chainnigh agus Cheatharlach
- Bord Oideachas agus Oiliúna Laoise agus Uíbh Fhailí
- Bord Oideachais agus Oiliúna an Longfoirt agus na hIarmhí
- Bord Oideachais agus Oiliúna Lú agus na Mí
- Bord Oideachais agus Oiliúna Mhaigh Eo, Shligigh agus Liatroma
- Bord Oideachais agus Oiliúna Thiobraid Árann
Beidh gairmeacha á n-eisiúint go gairid ag na Boird Oideachais agus Oiliúna ar bronnadh maoiniú orthu chuig eagraíochtaí óige chun seirbhísí nua a bhunú agus a sholáthar sna ceantair atá roghnaithe.