Athceapacháin chuig Bord Fheidhmeannacht na Seirbhíse Sláinte

Tá na comhaltaí seo a leanas athcheaptha ag an Aire Sláinte Stephen Donnelly T.D., ar Bhord Fheidhmeannacht na Seirbhíse Sláinte.

Tá an tréimhse athcheapacháin ón 28 Meitheamh 2022 go dtí an 27 Meitheamh 2027.

An Dr Yvonne Traynor

Tá an Dr Yvonne Traynor ag obair mar leasuachtarán ar Ghnóthaí Rialála agus Eolaíocha le Grúpa Chiarraí ó bhí an bhliain 2015 ann. Roimhe sin, bhí roinnt poist cheannaireachta dhomhanda agus réigiúnacha aici le Henkel, cuideachta Ghearmánach earraí tomhaltais. Tá spéis ar leith aici i mbunathrú eagraíochta chun feabhais, i mbainistíocht riosca agus i sáreispéireas a sholáthar do chustaiméirí.

Tá céim PhD i gCeimic aici ó Choláiste na Tríonóide, Baile Átha Cliath. Is díol suntais é gur as sin a gnóthaíodh paitinn don Phaiste Nicitín mar áis le haghaidh scor den tobac. Ina dhiaidh sin, ghnóthaigh sí Dioplóma Deimhnithe i gCuntasaíocht agus Airgeadas agus céim MSc i gCeannaireacht Feidhmiúcháin. Is stiúrthóir cairte í freisin agus tá taithí roinnt blianta aici ar fhónamh ar bhoird, lena n-áirítear ról an chathaoirligh ar choiste iniúchóireachta, riosca agus comhlíonta Sheirbhís Fuilaistriúcháin na hÉireann.

Aogán Ó Fearghail

Bhí Aogán Ó Fearghail ar an Uachtarán ar Chumann Lúthchleas Gael idir an bhliain 2015 agus an bhliain 2018. Bhí sé ina Phríomhoide bunscoile roimhe seo agus oibríonn sé faoi láthair mar Theagascóir Socrúcháin Scoile le hOllscoil Chathair Bhaile Átha Cliath.

Ina cháil mar Uachtarán ar Chumann Lúthchleas Gael, stiúir sé an eagraíocht ar fud tréimhse bunathraithe chun feabhais, ar lena linn a bunaíodh sláine láidir airgeadais agus a méadaíodh rátaí rannpháirtíochta agus muinín an phobail as an gCumann. I gcomhar le gníomhaireachtaí um chur chun cinn na sláinte, thug sé Aonad um Chur Chun Cinn na Sláinte isteach i bPáirc an Chrócaigh, mar aon le tionscnaimh a dhírigh ar shaincheisteanna sláinte fisiciúla agus meabhairshláinte.

Tá taithí chuimsitheach ag Aogán ar bhunathrú chun feabhais a chomhlíonadh ar leibhéal náisiúnta, réigiúnach agus áitiúil. Tá an-taithí aige ar rialachas corparáideach, ar bhainistíocht athruithe, ar phleanáil airgeadais agus ar bhainistíocht geallsealbhóirí.

Tim Hynes

Agus é ina Ghrúp-Phríomhoifigeach Faisnéise do Bhainc-Aontas Éireann, tá raon leathan saineolais ag Tim Hynes ar roinnt disciplíní, lena n-áirítear margaíocht brandaí, oibríochtaí, bainistíocht athruithe agus teicneolaíocht. Tá taithí 30 bliain aige in eagraíochtaí gormshlise, áit ar shealbhaigh sé róil réigiúnacha agus róil dhomhanda araon agus ar threoraigh sé foirne i níos mó ná 40 tír.

Tá Céim Mháistreachta i gCeannaireacht Feidhmiúcháin ag Tim ó Ollscoil Uladh. Tá sé ina stiúrthóir bainc cáilithe agus ina Chomhalta de Chumann Ríomhaireachta na hÉireann freisin.