Óstálann an tAire Meabhairshláinte agus Daoine Scothaosta cruinniú tionscnaimh den Choimisiúin um Chúram do Dhaoine Scothaosta nua.
- Foilsithe: 21 Márta 2024
- An t-eolas is déanaí: 10 Aibreán 2024
- Thionóil an tAire Butler an chéad chruinniú den Choimisiúin um Chúram do Dhaoine Scothaosta nua.
- Tháinig an Coimisiún le chéile den chéad uair faoin gCathaoirleach, an tOllamh Alan Barrett, Príomhoifigeach Feidhmiúcháin na hInstitiúide Taighde Eacnamaíochta agus Sóisialta
Tá an Coimisiúin um Chúram do Dhaoine Scothaosta ceaptha ag an Aire Sláinte, Stephen Donnelly, agus ag an Aire Meabhairshláinte agus Daoine Scothaosta, Mary Butler. Díreoidh an Coimisiún ar an gcaoi is fearr is féidir le seirbhísí sláinte agus cúraim shóisialta na hÉireann freastal ar riachtanais ár ndaonra aosta. Breathnóidh sé freisin ar an mbealach is fearr is féidir le gach Roinn Rialtais tacú le haosú dearfach ar fud an chúrsa saoil.
Tugann comhaltaí an Choimisiúin neart saineolais, lena n-áirítear réimsí na geiriatraice, na geirinteolaíochta, na heacnamaíochta sláinte, an bheartais agus na bainistíochta sláinte, an chúraim phríomhúil, na heitice sláinte, na dteicneolaíochtaí sláinte, an aosaithe agus an mhíchumais, agus taithí saoil.
Tacóidh Grúpa Tagartha de bhaill na hearnála pobail agus deonaí le hobair an Choimisiúin, agus leo siúd a bhfuil taithí saoil acu.
Comhlíonann an Coimisiún um Chúram do Dhaoine Scothaosta tiomantas Chlár an Rialtais chun 'coimisiún a bhunú le scrúdú a dhéanamh ar chúram agus ar thacaíochtaí do dhaoine aosta'.
Cuirfear obair an Choimisiúin chun cinn trí thrí mhodúl oibre. Mairfidh an chéad dá mhodúl sé mhí agus mairfidh an modúl deiridh 12 mhí. Beidh na modúil ar siúl i ndiaidh a chéile. Fuarthas maoiniú €1.2 milliún i mBuiséad 2024 chun tacú le hobair an Choimisiúin.
Ag labhairt leis an gCoimisiúin ag a gcruinniú tionscnaimh, dúirt an tAire Butler:
"Bhí áthas orm an chéad chruinniú den Choimisiún um Chúram do Dhaoine Scothaosta a thionól inniu. Tá sé mar thosaíocht agam le fada tacú le haosú dearfach de dhaoine aosta in Éirinn.
“Cinnteoidh fairsinge shaineolas agus thaithí na gcomhaltaí sa Choimisiúin go mbeidh plé agus moltaí an Choimisiúin bunaithe ar dhea-chleachtas atá ag teacht chun cinn agus ar na ceachtanna a foghlaimíodh go náisiúnta agus go hidirnáisiúnta.
“Ba í Éire an chéad tír a d'aithin an Eagraíocht Dhomhanda Sláinte go foirmiúil mar thír 'aoisbháúil' in 2019. Tá ceann de na hionchais saoil is airde san AE againn, d'ainneoin daonra atá ag dul in aois. Is cúis sásaimh dom go mbreathnóidh an Coimisiún ar na dúshláin agus na deiseanna a bhaineann le daonra atá ag dul in aois mar chuid d'fhorbairt straitéiseach leanúnach na seirbhísí sláinte agus cúraim shóisialta.
“Trí ionadaithe ó na hearnálacha pobail agus deonacha a cheapadh, agus níos tábhachtaí fós do dhaoine aosta iad féin, táim dóchasach go mbeidh tuiscint níos fearr ann ar obair an Choimisiúin mar gheall ar thaithí saoil daoine aosta ar fud na tíre. Cinnteoidh sé seo gur féidir linn rochtain a fheabhsú ar chúram comhtháite tráthúil, ardchaighdeáin, duine-lárnach sna suíomhanna is oiriúnaí.
"Táim muiníneach go mbeidh tionchar thar a bheith dearfach agus buan ag obair an Choimisiúin ar a chinntiú go bhfanfaidh Éire ar cheann de na tíortha is fearr chun dul in aois inti.”
Nótaí:
Gealltar i gClár an Rialtais go mbunófar 'coimisiún chun cúram agus tacaíochtaí do dhaoine aosta a scrúdú'.
Ar an 3 Deireadh Fómhair 2023, cheadaigh an Rialtas an togra, a thug an tAire Sláinte agus an tAire Meabhairshláinte agus Daoine Scothaosta ar aghaidh chun Coimisiún neamhspleách um Chúram do Dhaoine Scothaosta a bhunú.
An 14 Nollaig 2023, d’fhógair an tAire Sláinte agus an tAire Meabhairshláinte agus Daoine Scothaosta ceapachán an Ollaimh Alan Barrett (Príomhoifigeach Feidhmiúcháin na hInstitiúide Taighde Eacnamaíochta agus Sóisialta) mar Chathaoirleach an Choimisiúin.
Ar an 29 Feabhra 2024, d'fhógair an tAire Sláinte agus an tAire Meabhairshláinte agus Daoine Scothaosta ceapachán chomhaltaí eile an Choimisiúin, arb iad seo a leanas iad:
- An Dr Emer Ahern, Comhairleoir, Geiriatraí Tráma agus Ortaipéideach, Ospidéal Ollscoile Chorcaí, agus Comhairleoir Cliniciúil Náisiúnta agus Ceannaire Grúpa, Daoine Scothaosta, Feidhmeannacht na Seirbhíse Sláinte. Tá an Dr. Ahern ina Uachtarán ar Chumann Geirinteolaíoch na hÉireann faoi láthair.
- An Dr Jonathan Cylus, Comhalta Sinsearach Taighde, Scoil Eacnamaíochta Londan agus Ceann Mhoil Londan na Faireachlainne Eorpaí um Chórais agus Beartais Sláinte.
- An Dr Lucinda Dockeray, Stiúrthóir, Cúrsa Cúram do Dhaoine Scothaosta, Coláiste Cleachtóirí Ginearálta na hÉireann.
- Ita Healy, Cathaoirleach, Líonra Náisiúnta na gComhairlí Daoine Scothaosta agus Cathaoirleach Chomhairle Daoine Scothaosta na Mí.
- An tOllamh Mary McCarron, Ollamh le hAosú agus Míchumas Intleachtúil, agus Stiúrthóir Lárionad Choláiste na Tríonóide um Aosú agus Míchumas Intleachtúil, Coláiste na Tríonóide, Baile Átha Cliath; Stiúrthóir Feidhmiúcháin na Seirbhíse Náisiúnta um Chuimhne um Míchumas Intleachtúil.
- Catherine McGuigan, Príomhoifigeach, Aoisbhá Éirinn.
- Seán Moynihan, Príomh-Oifigeach Feidhmiúcháin, ALONE.
- An tOllamh Christopher Nugent, Ceann Scoil na Ríomhaireachta, Ollscoil Uladh.
- An tOllamh Eamonn O’Shea, Ollamh Pearsanta i Scoil an Ghnó agus na hEacnamaíochta, Stiúrthóir Ionad na hÉireann um Sheaneolaíocht Shóisialta, agus Stiúrthóir an Ionaid um Thaighde Eacnamaíoch agus Sóisialta ar Néaltrú, Ollscoil na Gaillimhe.
- Cathy Reynolds, Comhalta Boird agus Eispéireas Beo, Cumann Alzheimer na hÉireann.
- An tOllamh David Smith, Ollamh Comhlach le hEitic Cúraim Sláinte, Coláiste Ríoga na Máinleá in Éirinn (RCSI).
Tá rúnaíocht ón Roinn Sláinte ag tacú leis an gCoimisiún.
Fiosróidh Modúl 1 seirbhísí agus foghlaim reatha don todhchaí, ag díriú go háirithe ar: seirbhísí sláinte agus cúraim shóisialta, samhlacha maireachtála tacaithe do dhaoine scothaosta, agus tionscnaimh bheartais laistigh den chóras cúraim shóisialta.
Fiosróidh Modúl 2 roghanna don todhchaí, ag díriú go háirithe ar: forbairt straitéiseach an chúraim sláinte agus shóisialta, forbairt straitéiseach an bhonneagair chaipitil, teicneolaíochtaí nua, agus maoiniú agus leithdháileadh acmhainní.
Ullmhófar tuarascáil tar éis Mhodúl 2 don Aire Sláinte agus don Aire Stáit do Mheabhairshláinte agus do Dhaoine Scothaosta ina sonraítear na dúshláin agus na deiseanna a aithníodh, agus ina gcuirfear creat costáilte i láthair d'fhorbairt straitéiseach uileghabhálach seirbhísí agus tacaíochtaí sláinte agus cúraim shóisialta do dhaoine scothaosta a chuireann cuspóirí straitéiseacha náisiúnta chun cinn.
Ina dhiaidh sin, bunófar grúpa tras-rannach faoi choimirce an Choimisiúin chun a mheas an bhfuil na tacaíochtaí d'aosú dearfach ar fud an chúrsa saoil oiriúnach don fheidhm agus chun plean cur chun feidhme costáilte a fhorbairt chun na tacaíochtaí sin a bharrfheabhsú.