Bunaíonn Airí Sláinte an Sainghrúpa Comhairleach um Athchóiriú Sláinte Poiblí - Dé Máirt an 25 Eanáir 2022
- Foilsithe: 25 Eanáir 2022
- An t-eolas is déanaí: 9 Feabhra 2022
D’fhógair an tAire Sláinte, Stephen Donnelly TD, agus an tAire Stáit le freagracht as Sláinte Poiblí, Folláine agus an Straitéis Náisiúnta Frithdhrugaí, Frank Feighan TD, inniu bunú Sainghrúpa Comhairleach um Athchóiriú Sláinte Poiblí (EAG).
Díreoidh an Sainghrúpa ar dtús ar an méid a foghlaimíodh ó na comhpháirteanna sláinte poiblí den fhreagairt ar phaindéim COVID-19 in Éirinn d’fhonn cosaint sláinte i gcoitinne a neartú agus ullmhacht do phaindéim sláinte phoiblí amach anseo go sonrach. Aithneoidh an Sainghrúpa freisin ceachtanna ó dhea-cleachtas idirnáisiúnta maidir le hathchóiriú agus neartú na bpríomhfheidhmeanna sláinte poiblí eile, lena n-áirítear cur chun cinn na sláinte agus na folláine, taighde ar shláinte an daonra agus faisnéis sláinte agus feabhsú na seirbhíse sláinte.
Scrúdóidh an Sainghrúpa ansin na príomhchodanna den tsamhail (samhlacha) seachadta reatha do shláinte phoiblí in Éirinn, d’fhonn samhail oibriúcháin cuí a mholadh chun soláthar Sláinte Poiblí in Éirinn a fhorbairt agus a mhaoirsiú amach anseo.
Féachfaidh an tsamhail oibriúcháin ilghnéitheach seo lena áirithiú go mbeidh socruithe uile-rialtais agus trasghníomhaireachta ann chun na nithe seo a leanas a chinntiú:
- cosc agus rialú optamach ar ghalair thógálacha agus ar bhagairtí eile sláinte;
- ailíniú príomhfheidhmeanna sláinte poiblí, lena n-áirítear sláinte agus folláine a chur chun cinn, taighde ar shláinte an daonra agus faisnéis sláinte agus feabhsú na seirbhíse sláinte;
- ailíniú ar fud an Rialtais áitiúil agus náisiúnta agus ar fud na n-earnálacha poiblí agus tríú earnála ionas gur féidir le gach duine aonair agus le gach earnáil den tsochaí a bpáirt a ghlacadh chun Éire shláintiúil a bhaint amach;
- rannpháirtíocht na hÉireann i bhforbairt agus neartú Aontas Sláinte Eorpach amach anseo.
Dúirt an tAire Donnelly;
“Cé go leanann Éire ar aghaidh ag freagairt do dhúshláin leanúnacha phaindéim COVID-19, tá sé tábhachtach ceachtanna a fhoghlaim ó fhreagairt sláinte poiblí na hÉireann agus idirnáisiúnta ar COVID-19. Is féidir leis sin a chinntiú go bhforbrófar freagairt sláinte poiblí thapa, dhinimiciúil agus lúfar, chomhtháite agus fhaisnéis-threoraithe ar bhagairtí sláinte amach anseo, agus ag an am céanna a chinntiú go bhfuil samhail sláinte poiblí atá oiriúnach don fheidhm againn a chothaíonn agus a chosnaíonn sláinte an phobail sa chiall is leithne agus a bhaineann an úsáid is fearr as sonraí agus fianaise.”
Dúirt an tAire Feighan;
“Tá sé faighte amach ag ár dtaighde gur spreag paindéim COVID-19 sinn, mar dhaoine aonair, le bheith níos feasaí ar an tsláinte agus sinn ag iarraidh stíl mhaireachtála shláintiúil a choinneáil go réamhghníomhach. Trí na príomhnithe a foghlaimíodh ón bpaindéim seo le dhá bhliain anuas a aithint, go náisiúnta agus go hidirnáisiúnta, ní féidir linn ach ár bpríomhfheidhmeanna sláinte a neartú, lena n-áirítear cur chun cinn na sláinte agus na folláine agus ár seirbhísí sláinte go ginearálta. Táim ag súil le torthaí an GEC agus conas is féidir leo cabhrú le cuspóirí Éire Shláintiúil a bhaint amach.”
Cuirfear obair an tSainghrúpa chun cinn trí Chathaoirleacht an Ollaimh Hugh Brady, Uachtarán ainmnithe Imperial College London, Leas-Seansailéir reatha agus Uachtarán Ollscoil Bristol agus iar-Uachtarán an Choláiste Ollscoile, Baile Átha Cliath.
Tá baill an Ghrúpa Saineolaithe comhdhéanta de shaineolaithe náisiúnta agus idirnáisiúnta a bhfuil taithí acu thar raon príomhréimsí, lena n-áirítear: sláinte phoiblí, cosaint sláinte, eipidéimeolaíocht, ceannaireacht shinsearach na seirbhíse sláinte poiblí, bainistíocht athruithe, & cumarsáid riosca agus fianaise.
Soláthróidh an Sainghrúpa tuarascáil deiridh, a chuirfear faoi bhráid an Aire Sláinte faoi lár na bliana 2022. Tionólfaidh an Sainghrúpa a chéad chruinniú i mí Eanáir 2022.
Tá athruithe suntasacha curtha i bhfeidhm ag an Roinn Sláinte sa tsláinte phoiblí le dhá mhí dhéag anuas lena n-áirítear:
- “Samhail Sláinte Poiblí” nua d’Éirinn faoi cheannas comhairleoirí a chur chun cinn, rud a chruthóidh 84 post comhairleach i sláinte phoiblí don chéad uair riamh. Tá earcaíocht ar bun agus tá dul chun cinn á dhéanamh maidir leis na poist seo a líonadh.
- D’fhógair agus mhaoinigh an tAire Donnelly pleananna chun an fórsa saothair sláinte poiblí a dhúbailt, lena n-áirítear dochtúirí sláinte poiblí, altraí sláinte poiblí, eolaithe agus foireann tacaíochta. Léiríonn na figiúirí is déanaí (Nollaig 2021) go bhfuil 178 de na poist sin líonta agus cuid eile gar do bheith líonta.
- Tá sé mar aidhm ag an Acht Sláinte Poiblí (Alcól) srian a chur ar promóisean praghais ar tháirgí alcóil. Tá forálacha faoin Acht á gcur i bhfeidhm anois.
Nótaí don Eagarthóir
Beidh an Sainghrúpa neamhspleách agus freagrach as eagrú agus stiúradh a chuid oibre, le tacaíocht riaracháin ón Roinn Sláinte.
Tá taithí ag Cathaoirleach an tSainghrúpa, an tOllamh Hugh Brady, ar roinnt róil cheannaireachta thar réimsí leighis, acadúla agus seirbhíse poiblí, lena n-áirítear mar Chathaoirleach ar an mBord Taighde Sláinte, agus Cathaoirleach ar Líonra Universitas 21 d’ollscoileanna taighde idirnáisiúnta. Bhí róil cheannaireachta aige freisin i dtionscnaimh athraithe tábhachtacha, ar nós le Tascfhórsa Nuálaíochta Náisiúnta Rialtas na hÉireann in 2011 agus ar an gcoiste maoirseachta do Chiste Nuálaíochta Náisiúnta na hÉireann.
Seo a leanas ballraíocht an GCT;
alLeasú Sláinte Poiblí – Baill an tSainghrúpa Chomhairligh
| Ainm | Teideal/Ról |
| Cathaoirleach: An tOllamh Hugh Brady | Uachtarán ainmnithe Imperial College London, Leas-Seansailéir agus Uachtarán Ollscoil Bristol |
| An Dr Helen Bevan | Príomhoifigeach Claochlaithe, NHS Horizons |
| An tOllamh Hannah McGee | Déan, Dámh an Leighis & na nEolaíochtaí Sláinte, RCSI |
| An tOllamh Jaap T. Van Dissel | Stiúrthóir ar an Lárionad RIVM um Rialú Galar Tógálach, an Ísiltír |
| An tOllamh Johan Giesecke | Ollamh Emeritus ag Karolinska Institute Medical University i Stócólm. Leas-Chathaoirleach ar an nGrúpa Comhairleach Straitéiseach agus Teicniúil um Ghuaiseacha Tógálacha (WHO) |
| An tOllamh Peter Piot | Iar-Stiúrthóir ar Scoil Sláinteachais & Leigheas Trópaiceach Londain agus Ollamh Handa le Sláinte Dhomhanda |
| An tOllamh Yvonne Doyle | Stiúrthóir Míochaine agus Stiúrthóir um Chosaint Sláinte do Public Health England |
| An Dr Tracey Cooper | Príomhoifigeach Feidhmiúcháin, Sláinte Poiblí na Breataine Bige agus iar-cheannaire an Údaráis um Fhaisnéis agus Cáilíocht Sláinte (HIQA) |
| An Dr Alexandra Freeman | Stiúrthóir Feidhmiúcháin, Lárionad Winton um Chumarsáid Riosca agus Fianaise |
| An tOllamh Cecily Kelleher | Príomhoide an Choláiste, Lárionad Winton um Chumarsáid Riosca agus Fianaise |
| An tOllamh Patricia Fitzpatrick | Ollamh le Eipidéimeolaíocht & Staidreamh Bithleighis, agus Ceann Ábhair do Shláinte Phoiblí sa Choláiste Ollscoile, Baile Átha Cliath |
| An Dr Sinéad Hanafin | Comhalta Taighde ar Cuairt, Scoil an Altranais agus an Chnáimhseachais, Coláiste na Tríonóide, Baile Átha Cliath |
| An Dr Tadhg Crowley | Liachleachtóir Ginearálta agus Ollamh Comhlach Cliniciúil, An Coláiste Ollscoile, Baile Átha Cliath |