Ceiliúrann an tAire Sláinte Phoiblí, Folláine agus an Straitéis Náisiúnta Frithdhrugaí an tSeachtain Dhomhanda um Beathú Cíche
- Foilsithe: 3 Lúnasa 2023
- An t-eolas is déanaí: 8 Lúnasa 2023
Ceiliúrann an tAire Sláinte Phoiblí, Folláine agus an Straitéis Náisiúnta Frithdhrugaí, Hildegarde Naughton an tSeachtain Dhomhanda um Beathú Cíche le cuairt ar ghrúpa tacaíochta beathú cíche á reáchtáil ag an FSS.
Bhuail an tAire le máithreacha nua agus a gcuid leanaí ag Grúpa Tacaíochta um Beathú Cíche i gCloich na Coillte, lonnaithe in Ionad Cúraim Phríomhúil Chloich na Coillte.
Déanann altra sláinte poiblí agus comhairleoir lachtaithe Sheila Lucey an grúpa a éascú, duine de na 55 comhairleoir lachtaithe atá fostaithe ag an FSS.
Tá níos mó ná dhá oiread postanna comhairleoir lachtaithe an FSS ar fáil anois ó 2021 de bharr maoiniú athfhillteach de €1.58 milliún.
Tá an tseirbhís seo mar chuid de roinnt tograí dírithe ar rátaí beathú cíche na hÉireann a mhéadú chun sláinte leanaí agus máithreacha a fheabhsú.
Tá clár uasdátaithe oideachais um chothú naíonán do chnáimhseacha agus d’altraí sláinte poiblí á thriail faoi láthair agus cuirfear i bhfeidhm é go náisiúnta i mbliana.
Dúirt an tAire Naughton:
"Is deis nasctha álainn é beathú cíche don mháthair agus an leanbh, ach anuas air sin thugann sé cosaint iontach don leanbh ó ionfhabhtú agus cuireann sé fás agus forbairt shláintiúil chun cinn.
"Tá a fhios againn freisin go laghdaíonn beathú cíche faidréiseach an baol ailse ubhagáin agus chíche.
"Tá mé spreagtha go mór ag na tograí atá i mbun faoi láthair chun rátaí beathú cíche na hÉireann a fheabhsú, agus beidh tairbhí sláinte dearfacha fadtéarmacha don daonra ag baint leis an obair atá á déanamh anois.
“Táim diongbháilte go leanfaimid ag tairiscint agus ag leathnú tacaíochtaí cuí do mhná ar mian leo beathú cíche a dhéanamh.
“Déanfaidh grúpa Feidhmithe beathú cíche Náisiúnta an FSS athbhreithniú ar dhul chun cinn faoin bPlean Gníomhaíochta Náisiúnta um Chothú Cíche 2016-2023 reatha agus táim ag tnúth le haiseolas a fháil a leagfaidh an bonn le haghaidh tuilleadh forbartha sa réimse fíorthábhachtach seo.”
Dúirt an tOllamh Breda Smyth, Príomhoifigeach Leighis:
"Tá sé mar thosaíocht agam rátaí beathú cíche a fheabhsú d’fhonn sláinte fadtéarmach an daonra a fheabhsú.
“Tá a fhios againn go bhfuil fiú méid beag bainne cíche tairbheach don leanbh, go háirithe sna chéad chúpla lá, agus go gcuidíonn sé le córais imdhíonachta leanaí a threisiú. Is féidir leis cabhrú freisin le téarnamh iarthuismidh.
"Mholfainn do mháithreacha atá ag beathú cíche nascadh leis na tacaíochtaí atá ar fáil dóibh, comhairleoirí lachtaithe agus seirbhís tacaíochta beathú cíche ar líne an FSS san áireamh.
Mholfainn do bhean ar bith atá ag beathú cíche nó ag ullmhú chun beathú cíche na hacmhainní iontacha atá ar fáil ar shuíomh gréasáin an FSS mychild.ie a úsáid."
Nótaí
De réir Tuairisc Táscaire Máithreachais na hÉireann 2021, tá rátaí beathú cíche na hÉireann i measc na rátaí is ísle ar domhan. Ní dhéantar beathú cíche le ach 62.3% do leanaí ag an mbreith, i gcomparáid le 90% an Astráil, 81% san RA agus 79% sna SAM, agus nuair a scaoiltear le leanaí ón ospidéal níl ach 37% acu ar bheathú cíche amháin. Faoin am go bhfuil leanaí 3 mhí d'aois tá an uimhir sin tite go 31.2%, ceann de na huimhreacha is ísle san Eoraip.
Is tosaíocht é de chuid na Roinne Sláinte agus an FSS níos mó máithreacha a spreagadh beathú cíche a dhéanamh. Leagann beartas sláinte náisiúnta, lena n-áirítear an Creat Éire Shláintiúil, an Straitéis Náisiúnta Máithreachais, an Beartas agus
an Plean Gníomhaíochta um Murtall, agus an Straitéis Náisiúnta Ailse, béim ar a thábhachtaí atá sé tacú le máithreacha a thugann beathú cíche, chomh maith le beart a dhéanamh chun rátaí beathú cíche in Éirinn a mhéadú.
Is é Plean Gníomhaíochta an FSS um Beathú Cíche in Éirinn Shláintiúil 2016-2021 an creat chun tacaíochtaí a chur chun cinn do thuismitheoirí atá ag beathú cíche san FSS. Tá síneadh ama tugtha do chur chun feidhme an phlean go dtí deireadh 2023, de dheasca tionchar COVID-19 ar sheachadadh roinnt gníomhartha.
Ó foilsíodh é, tá an Grúpa Náisiúnta Forfheidhmithe um Chothú Cíche bunaithe ag an FSS atá i gcomhpháirtíocht leis an Roinn Sláinte agus príomh-ranna laistigh den FSS chun raon gníomhartha a chur chun cinn.