Cosain tú féin ar an bhfliú agus COVID-19 an geimhreadh seo – teachtaireacht ón bPríomhoifigeach Leighis agus ón bPríomhoifigeach Altranais
- Foilsithe: 6 Samhain 2024
- An t-eolas is déanaí: 12 Aibreán 2025
Tá an Príomhoifigeach Leighis eatramhach, an tOllamh Mary Horgan agus an Príomhoifigeach Altranais Rachel Kenna ag impí ar dhaoine cur lena gcosaint in aghaidh an fhliú agus COVID-19 trí vacsaín a fháil.
Scaip siad an teachtaireacht seo agus a gcuid vacsaíní fliú agus COVID-19 á bhfáil acu, in éineacht le hoibrithe cúraim sláinte ag clinic vacsaínithe foirne in Ospidéal San Séamas i mBaile Átha Cliath.
Cuireann clár vacsaínithe geimhridh Fheidhmeannacht na Seirbhíse Sláinte vacsaíní fliú agus COVID-19 ar fáil saor in aisce do ghrúpaí molta, lena n-áirítear iad siúd atá 60 bliain d'aois agus os a chionn, oibrithe cúraim sláinte, aon duine atá ag iompar clainne agus daoine a bhfuil riocht sláinte fadtéarmach orthu.
Is féidir le leanaí idir dhá bhliain agus 17 mbliana d'aois vacsaín fliú, atá ina sprae sróine, saor in aisce a fháil.
Tá an dá vacsaín ar fáil ó dhochtúirí teaghlaigh agus cógaslanna rannpháirteacha agus tá siad ar fáil freisin d'oibrithe cúraim sláinte ag clinicí vacsaínithe in go leor áiteanna oibre.
Ón am a thugtar na vacsaíní, tógann sé thart ar choicís ar a n-éifeacht chosanta teacht i bhfeidhm, mar sin tá am fós ann do dhaoine an vacsaín a fháil anois agus a bheith cosanta, sula sroicheann séasúr an víris riospráide a bhuaicphointe.
Dúirt an Príomhoifigeach Leighis Eatramhach, an tOllamh Horgan:
"D'fhéadfadh an fliú agus COVID-19 a bheith ina chúis le tinneas tromchúiseach, agus anuraidh, cuireadh na mílte duine isteach in ospidéil dá bharr.
"Chomh maith leis an duine féin a chosaint, cosnaíonn vacsaíní na daoine timpeall orainn, mar laghdaíonn siad scaipeadh an ionfhabhtaithe do dhaoine a d'fhéadfadh a bheith níos leochailí ó dhrochthinneas. Tá na vacsaíní fliú agus COVID-19 sábháilte agus éifeachtach agus is féidir iad a thabhairt ag an am céanna.
"Tá mé ag moladh go háirithe do thuismitheoirí de leanaí óga smaoineamh ar an vacsaín fliú spraeála sróine a fháil dá bpáistí. Tá dochtúirí teaghlaigh agus cógaiseoirí ag cur an chláir seo ar fáil agus is féidir leat cuairt a thabhairt ar shuíomh gréasáin FSS chun liosta a fháil de chógaslanna rannpháirteacha a tháirgeann an vacsaín thábhachtach seo.
"De réir mar a éiríonn an aimsir níos fuaire agus go gcaitheann muid níos mó ama taobh istigh, is féidir linn an baol tinnis a laghdú agus an t-ualach ar na hospidéil a mhaolú trí gach rud is féidir linn a dhéanamh chun scaipeadh na víreas seo a íoslaghdú."
Dúirt an Príomhoifigeach Altranais Rachel Kenna:
“Imíonn ár n-imdhíonacht le himeacht ama, mar sin fiú, má tá do vacsaíní fliú agus COVID-19 faighte agat sna blianta roimhe seo, ba cheart duit an deis a thapú fós vacsaín a fháil i mbliana.
"Is féidir linn uilig ár gcuid féin a dhéanamh chun glacadh le vacsaíniú a mhéadú. Bhí lúcháir orm nuair a thug mé cuairt ar Ospidéal San Séamas chun bualadh le hoibrithe cúraim sláinte atá ag cosaint iad féin agus a gcuid othar trí vacsaíní a fháil.
"Teastaíonn rátaí iontógála arda uainn chun cosaint a uasmhéadú i measc an phobail, mar sin inniu, tá mé ag spreagadh do mo chomhghleacaithe gairmiúla altranais, cnáimhseachais agus sláinte agus cúraim shóisialta chun cur lena gcosaint. Tá clinicí vacsaínithe i suíomhanna cúraim sláinte ar fud na tíre, mar sin trí chúpla nóiméad a thógáil as do lá, is féidir leat tú féin agus na hothair agus na daoine go léir a úsáideann seirbhísí cúraim sláinte a chosaint an geimhreadh seo."
Nótaí:
Chun tuilleadh eolais a fháil maidir le céard iad na vacsaíní a mholtar duit, téigh chuig Screenings and vaccinations - HSE.ie
Is féidir leat vacsaín fliú saor in aisce a fháil má tá tú:
- 60 bliain d'aois agus os a chionn
- Idir 2 agus 17 mbliana d'aois
- Má tá tú i d’oibrí cúraim sláinte
- Má tá tú torrach
- Mar chónaitheoir i dTeach Altranais nó áis fhadchónaitheach eile;
- Má bhíonn tú taobh le muca, héanlaith nó héin uisce go rialta
- I do dhuine a bhfuil riocht sláinte air/uirthi a chuireann i mbaol níos airde thú in aghaidh an fhliú (6 mhí d'aois agus níos sine)
- I do chónaí le duine a bhfuil riocht sláinte air/uirthi a chuireann i mbaol níos airde iad in aghaidh an fhliú
- I do chúramóir do dhuine a bhfuil riocht sláinte air/uirthi a chuireann i mbaol níos airde iad in aghaidh an fhliú
Is féidir leat teanndáileog COVID-19 saor in aisce a fháil má tá tú:
- 60 bliain d'aois agus os a chionn
- Idir 18 agus 59 mbliana d'aois agus i do chónaí i saoráid cúraim fhadtéarmaigh
- 6 mhí d'aois go 59 bliain le córas imdhíonachta lag
- 6 mhí d'aois go 59 bliain d'aois le riocht sláinte a chuireann tú i mbaol mór do thinneas tromchúiseach ó COVID-19
- Má tá tú i d’oibrí cúraim sláinte
- Má tá tú torrach
Is féidir leo siúd atá 6 mhí d'aois - 59 bliain d'aois atá sláintiúil, tar éis plé a dhéanamh ar na cúiseanna atá acu lena soláthraí cúraim sláinte (m.sh., dochtúir teaghlaigh, cógaiseoir nó vacsaíneoir FSS), vacsaíniú a iarraidh.