Fáiltíonn an tAire Donnelly roimh fhaomhadh conair chliniciúil nua le haghaidh tinneas cinn
- Foilsithe: 14 Aibreán 2022
- An t-eolas is déanaí: 12 Aibreán 2025
D'fháiltigh an tAire Sláinte Stephen Donnelly roimh fhaomhadh conair chliniciúil nua le haghaidh tinneas cinn, tar éis tionscadal píolótach atá arna mhaoiniú ag Sláintecare.
Cuireadh an tseirbhís nua d'othair le tinneas cinn agus mígréin ar fáil ar bhonn píolótach i dtrí ionad Néareolaíochta in Ospidéil Ollscoile na Gaillimhe, in Ospidéal Ollscoile Thamhlachta (TUH) agus in Ospidéal San Séamas in 2020 agus 2021 le maoiniú ó Chiste Comhtháthaithe Sláintecare na Roinne Sláinte. Ba é an cuspóir clár píolótach a chomhcheanglaíonn seirbhísí ar fud na n-earnálacha ospidéil, pobail agus deonacha.
Tá conair tinneas cinn nua faofa go cliniciúil ag FSS le cur i bhfeidhm ar dheich láithreán go náisiúnta. Tá tús curtha le pleanáil maidir le maoiniú agus tús a chur le cur i bhfeidhm ag na seacht láithreán atá fágtha.
Tá an tseirbhís faoi stiúir Chlár Ceannaire Náisiúnta Cliniciúil Néareolaíochta FSS i gcomhar le Cumann Mígréine na hÉireann, Aontas Cógaiseoirí na hÉireann, agus Aonad Acadúil Néareolaíochta Choláiste na Tríonóide, Baile Átha Cliath.
Dúirt an tAire Donnelly:
"Tá ríméad orm a fheiceáil go bhfuil an tseirbhís den scoth seo le leathnú chuig gach ionad néareolaíochta ar fud na hÉireann. Is é an cuspóir féinchúram, agus a chinntiú go ndéantar measúnú agus bainistíocht ar thinneas cinn agus ar mígréin sa suíomh is oiriúnaí. Tá na foirne ildisciplíneacha a bhfuil baint acu leis an tseirbhís othar-lárnaithe ag seachadadh chuspóir athchóirithe Sláintecare chun an cúram ceart a sholáthar, san áit cheart, ag an am ceart, ag an bhfoireann cheart."
Dúirt an tOllamh Orla Hardiman, Ceannaire Náisiúnta Cliniciúil sa Néareolaíocht:
"Tá fadhb néareolaíoch ag 800,000 duine in Éirinn, agus tá 21,000 duine ar liosta feithimh le haghaidh coinne néareolaíoch in Éirinn. Atreoraíodh idir 25% agus 30% de na daoine ar na liostaí feithimh sin mar gheall ar thinneas cinn nó mígréin. Ba é tinneas cinn an seachtú cúis ba choitianta le freastal ar Rannóga Éigeandála, agus an dara cúis ba choitianta le freastal ar Aonaid Mheasúnaithe Leighis."
I measc na bhfoirne a sholáthraíonn an tseirbhís nua tá néareolaithe, Altraspeisialtóirí Cliniciúla (CNS), Síceolaithe agus tacaíocht riaracháin spriocdhírithe. Tá Cumann Mígréine na hÉireann (MAI) i gcomhpháirtíocht leis an tionscadal chun seirbhísí atá ar fáil d'othair a shruthlíniú, go háirithe grúpaí tacaíochta síceolaíochta sa phobal chun féinchúram agus bainistíocht fhadtéarmach tinneas cinn a éascú, rud a laghdaíonn an gá atá le rannpháirtíocht leanúnach le seirbhísí ospidéalbhunaithe.
Dúirt an tOllamh Hardiman:
"Ta conairí nua d'othair ríthábhachtach chun eispéireas an othair a fheabhsú, agus seirbhís níos tráthúla agus níos oiriúnaí a chur ar fáil d'othair. Mura bhfuil treoirlínte bainistíochta tinneas cinn ICGP ag obair, is féidir le Dochtúirí Teaghlaigh othair a atreorú chuig sainfhoireann tinneas cinn ildisciplíneach. Ansin oibríonn an fhoireann plean cúraim leis an othar agus is féidir leo tagairt a dhéanamh do thacaíochtaí breise a sholáthraíonn Cumann Mígréine na hÉireann nuair is cuí. Bhí cógaslanna ina gcomhpháirtí tábhachtach sa chonair othar freisin, mar is minic gurb iad an chéad phointe teagmhála iad do dhaoine a bhfuil tinneas cinn agus mígréin orthu, agus is féidir leo comhairle luachmhar a sholáthar chun cabhrú le comhlíonadh cógas."
Bhí tionchar ollmhór ag an tionscadal d'othair a fuair rochtain ar an tseirbhís. Dúirt Claire, a d'fhulaing le mígréin le seacht mbliana agus atá ag freastal ar an gclinic in TUH:
"Fuair mé post le sé mhí anuas. Tá sé iontach, níor cheap mé riamh go mbeinn in ann oibriú arís, is féidir liom mo chuid mígréin a thuiscint a bhuíochas leis an tseirbhís ar fhreastail mé uirthi i dTamhlacht, agus leis na Grúpaí Síceolaíochta. Bhí sé an-chabhrach dom post a fháil, is féidir le mo shaoiste mo mhígréiní a thuiscint, mar is féidir liomsa iad a thuiscint agus a mhíniú."
Tá an tionscadal ag laghdú líon na n-athchuairteanna a thugann othar ar an ospidéal. I nGaillimh, mar shampla, d'fhreastail 171 othar ar an gclinic Tinneas Cinn/Mígréine Dochtúirí Teaghlaigh agus níor socraíodh ach dhá choinne fillte. I measc na n-éachtaí eile tá an méid seo a leanas:
- d'aontaigh 85 cógaslann a bheith páirteach sa scéim phíolótach go dtí seo, rud a sháraíonn an sprioc de 20
- cuireadh os cionn 300 othar ar aghaidh chuig cógaslanna pobail ó thrí shuíomh
- d'fhorbair an tionscadal bileoga oideachais agus baineann sé úsáid as teilileigheas
- bhí 37% de chomhairliúcháin fíorúil idir Eanáir agus Meitheamh 2021 mar gheall ar shrianta COVID -19
- tá clinicí tinneas cinn bunaithe anois le rochtain thapa in TUH agus in Ospidéal San Séamas le thart ar 42 seal mear-rochtana in aghaidh na míosa. Tá na CNSanna ar fáil chun tacú le Rannóga Éigeandála agus Dochtúirí Teaghlaigh chun comhairle agus oideachas a sholáthar
- forbraíodh clinicí faoi stiúir altraí in Ospidéal San Séamas agus TUH, agus bhain siad an sprioc de mhéadú 20% amach
- chomhoibrigh Cumann Mígréine na hÉireann agus an fhoireann síceolaíochta le chéile chun seisiúin ghrúpa pobail a reáchtáil agus sraith ábhar físe agus acmhainní a fhorbairt dóibh siúd atá ag maireachtáil le tinneas cinn agus mígréin
- tá seirbhísí nua forbartha ag na síceolaithe le critéir atreoraithe agus conair. Lena chois sin bunaíodh clár idirghabhála síceolaíochta grúpa ocht seachtaine agus tá trí idirghabháil ghrúpa curtha ar fáil go dtí seo
- críochnaíodh Iniúchadh Conair Othar idir Deireadh Fómhair 2020 agus Meán Fómhair 2021 agus gabhadh sonraí maidir le 2,517 othar. Cabhróidh na sonraí arna gcur i dtoll a chéile le cinnteoireacht le forbairt bhreise na seirbhísí tinneas cinn agus mígréine in Éirinn
Nótaí
Tá urlabhraithe othar agus foirne ar fáil don scéal seo.
Ghlac an tOllamh Hardiman agus a foireann páirt i seimineár gréasáin Sláintecare le déanaí maidir le tionchar an tionscadail ar othair.