Fáiltíonn an tAire Sláinte, Stephen Donnelly, T.D. roimh fhoilsiú “Feidhmíocht Ospidéil: Anailís ar Phríomhtháscairí Feidhmíochta FSS”

D’fhoilsigh an tAire Sláinte Stephen Donnelly, T.D. agus an tAire Caiteachais Phoiblí, um Sholáthar an PFN agus Athchóirithe, Paschal Donohoe, “Feidhmíocht Ospidéil: Anailís ar Phríomhtháscairí Feidhmíochta FSS” inniu mar chuid de phróiseas Athbhreithniú Caiteachais 2022, a sholáthróidh léargas agus bonn fianaise níos mó do chinnteoireacht beartais sa limistéar seo.

Is í aidhm na hoibre measúnú de réir sonraí ar fheidhmíocht ospidéil a sholáthar bunaithe ar phríomhtháscairí feidhmíochta FSS. Tacaíonn seo le bainistíocht ghníomhach a dhéanamh ar fheidhmíocht ospidéil ar fud an chórais chúraim sláinte, a cheadaíonn don lucht déanta beartas agus do chleachtóirí riachtanais infheistíochta agus feabhsúcháin ar dhea-chleachtais a shainaithint le feabhas a chur ar torthaí cliniciúla agus le héifeachtúlacht a mhéadú. Tagann an obair seo le Tionscadal 1 de Chlár Athchóirithe Sláintecare 1, a bhfuil de chuspóir aige táirgiúlacht ospidéil a fheabhsú trí úsáid níos fearr a bhaint as acmhainní, sreabhadh othar a fheabhsú agus athchumrú seirbhísí ospidéil a bhaint amach.

Cuirtear léargas ginearálta ar fáil sa pháipéar atá le foilsiú ar fheidhmíocht ospidéil i rith na mblianta 2017-2021 trí anailís a dhéanamh ar 18 bPríomhtháscaire Feidhmíochta (PTFanna) a foilsíodh ar leibhéal Limistéar Ospidéil Réigiúnaigh (RHA), leibhéal samhla ospidéal, agus ar leibhéal ospidéil aonair a chumhdaíonn trí ghné d’fheidhmíocht ospidéil: Seirbhísí na Rannóige Éigeandála, Seirbhísí Géarmhíochaine/Máinliachta, agus Sábháilteacht Leighis.

I measc na PTFanna ar a ndearnadh anailís, tá tréimhsí feithimh don RÉ, cóireáil neamhiomlán, iontrálacha ar lá na máinliachta, agus aistriú cúraim ar cuireadh moill air, a thugann limistéir chun solais ina bhféadfaí díriú ar idirghabháil beartais le feabhas a chur ar seirbhís ghéarchúraim a sholáthar.

Tugtar athrú ar fheidhmíocht faoi deara i measc ospidéal agus réigiún do gach limistéar ar a ndéantar scrúdú, ach maidir le spriocanna socraithe FSS freisin. I gcásanna áirithe, is féidir ospidéil a bhíonn an-neamhchomhlíontach agus neamhchomhlíontach go seasmhach i dtaobh spriocanna feidhmíochta FSS a shainaithint i gcás PTF ar leith, agus tugann seo an gá chun solais atá le hanailís a dhéanamh dá éis sin le rudaí a d’fhéadfadh neamhchomhlíonadh a spreagadh agus idirghabháil fhéideartha réitigh a shainaithint a d’fhéadfaí a úsáid.

Moltar san anailís chomh maith go soláthraítear sraith níos gonta agus níos dírithe spriocanna feidhmíochta don chóras géarchúraim in Éirinn chun iaranailís agus sainaithint gan stró a éascú nuair a d’fhéadfaí feidhmíocht a fheabhsú.

D’fháiltigh an tAire Sláinte, Stephen Donnelly, T.D., an foilseachán agus dúirt sé an méid seo a leanas:

Cuireann an foilseachán seo le páipéir eile chúraim sláinte a foilsíodh mar chuid den tsraith Athbhreithnithe Caiteachais in 2021 agus 2022. Tá obair ar siúl sa Roinn tríd an bhfóram seo leis an bhfianaise is fearr atá ar fáil a chuimsiú isteach i bhforbairt beartais i réimse limistéar, laghdú liostaí feithimh, beartas bonneagair caipitil, pleanáil an lucht saothair agus an leithdháileadh acmhainní daonrabhunaithe ina measc.

Cumhdófar sna 6 Limistéar Sláinte Réigiúnacha (RHAanna) na limistéir seo a leanas:

• Limistéar A - Baile Átha Cliath Thuaidh, an Mhí, Lú, an Cabhán, agus Muineachán.
• Limistéar B - an Longfort, an Iarmhí, Uíbh Fhailí, Laois, Cill Dara, agus codanna de Bhaile Átha Cliath agus de Chill Mhantáin.
• Limistéar C - Tiobraid Árann Theas, Port Láirge, Cill Chainnigh, Ceatharlach, Loch Garman, Cill Mhantáin, cuid de Bhaile Átha Cliath Theas.
• Limistéar D - Ciarraí agus Corcaigh.
• Limistéar E - Luimneach, Tiobraid Árann agus an Clár.
• Limistéar F - Dún na nGall, Sligeach, Liatroim, Ros Comáin, Maigh Eo agus Gaillimh.

Achoimre

Tá éagsúlacht atá ag dul i méid idir caiteachas agus gníomhaíocht ospidéil tugtha faoi deara ó 2017 a spreagann breithniú a dhéanamh ar fheidhmíocht. Cuirtear léargas ginearálta ar fáil sa pháipéar seo ar fheidhmíocht ospidéil i rith na mblianta 2017-2021 trí anailís a dhéanamh ar 18 bPríomhtháscaire Feidhmíochta (PTFanna) ar leibhéal Limistéar Ospidéil Réigiúnaigh (RHA), leibhéal samhla ospidéal, agus ar leibhéal ospidéil aonair a chumhdaíonn trí ghné d’fheidhmíocht ospidéil: Seirbhísí na Rannóige Éigeandála, Seirbhísí Géarmhíochaine/Máinliachta, agus Sábháilteacht Leighis.

Tugtar athrú ar fheidhmíocht faoi deara i measc ospidéal agus réigiún do gach limistéar ar a ndéantar scrúdú, ach maidir le spriocanna socraithe FSS freisin. I gcásanna áirithe, is féidir ospidéil a bhíonn neamhchomhlíontach go seasmhach i dtaobh spriocanna feidhmíochta FSS a shainaithint i gcás PTF ar leith, agus tugann seo an gá chun solais atá le hanailís a dhéanamh dá éis sin le rudaí a d’fhéadfadh neamhchomhlíonadh a spreagadh agus idirghabháil fhéideartha réitigh a shainaithint. Tugtar chun solais san anailís chomh maith an gá atá le sraith níos gonta agus níos dírithe spriocanna feidhmíochta don chóras géarchúraim in Éirinn chun an iaranailís seo a shainaithint.

Aithníonn na húdair go bhfuil iliomad rudaí ann a spreagann feidhmíocht i leith na PTFanna a scrúdaíodh, déimeagrafaic éagsúil, riachtanais chúraim sláinte, cleachtais/próisis bhainistíochta nó acmhainní atá ar fáil i ngach ospidéal ina measc agus gur príomhrud é seo a chuireann teorainn ar an anailís. Tá feidhmíocht ospidéil a shainaithint i leith PTFanna tábhachtach i gcónaí mar gheall go gcumasaíonn sé limistéir atá le fiosrú níos mó agus atá le cur ina gceart laistigh den chóras géarchúraim a shainaithint go lúfar.

Torthaí

Tréimhsí feithimh sa RÉ: Tugtar faoi deara go mbíonn éagsúlacht fhairsing ann i dtaobh tréimhsí feithimh sa RÉ i measc ospidéal. Ar leibhéal ospidéil, níl sprioc shainithe FSS á baint amach ag 23 as 26 ospidéal (88%), is é sin, bíonn tréimhse feithimh níos giorra ná sé huaire an chloig i gceist le 70% d’iontrálacha. Tá feidhmíocht tréimhse feithimh sa RÉ in ospidéil seasmhach i rith na mblianta, a thugann le fios go bhféadfadh go raibh idirghabháil le tréimhsí fada feithimh a laghdú neamhéifeachtach. Léirítear sa litríocht gur féidir le tréimhsí feithimh sa RÉ iarmhairtí suntasacha cliniciúla a chruthú d’othair, agus gur cheart tabhairt faoi ghníomhartha breise réitigh dá bharr leis na costais seo a laghdú.

Cóireáil Neamhiomlán i Suíomhanna RÉ: Is ionann cóireáil neamhiomlán agus buairt sábháilteachta othar agus neamhéifeachtúlacht i dtaobh seirbhísí rannóg éigeandála a sholáthar. I dtaobh sprioc shocraithe FSS - < 6.5% - sainaithnítear difríochtaí substainteacha i bhfeidhmíocht ospidéil, agus idir cóireáil neamhiomlán a bheith faighte ag 16.7% d’othair in Ospidéal San Séamas agus 1.3% d’othair in Ospidéal Lúcáis, Cill Chainnigh, a bhí an fheidhmíocht.

An tAonad Measúnaithe Géarmhíochaine (an AMAU) a Úsáid: Tugtar faoi deara go mb’fhéidir go mbaintear tearcúsáid as AMAUanna ar fud an chórais ghéarchúraim, agus tá rátaí scaoilte ón AMAU atá faoi bhun spriocleibhéal FSS i 19 as 29 ospidéal. Léirítear sa litríocht go laghdaíonn úsáid éifeachtach a bhaint as AMAUanna an meánfhad fanachta (ALOS) san ospidéal, go laghdaíonn sé tréimhsí feithimh sa RÉ chun leaba a fháil, go bhfeabhsaíonn sé an ráta de chóireáil chuí, agus go laghdaíonn sé básmhaireacht san ospidéal de bharr an uile chúise. Teastaíonn taighde breise le hidirghabháil fhéideartha a dheimhniú chun úsáid an AMAU a mhéadú, agus lena dheimhniú cibé acu an bhféadfaí nó nach bhféadfaí spriocanna reatha a chuíchóiriú chun difríochtaí a chur san áireamh i saintréithe othair agus ospidéil, cosúil le castacht othair.

Iontráil Roghnach ar Lá na Máinliachta: Tugtar cuntas i dtreoirlínte maidir le Samhail Chúraim FSS ar thairbhí iomadúla a chruthaíonn othair nuair a thagann siad i láthair san ospidéal ar lá na máinliachta. Is éagsúil do chomhlíonadh i measc ospidéal maidir leis an méadracht seo, agus bhain 22 as 30 ospidéal rátaí iontrála máinliachta os cionn 70% amach (i gcomparáid le sprioc náisiúnta FSS 80%). Sainaithnítear roinnt ospidéal mar ospidéil nár bhain an fheidhmíocht amach maidir leis an méadracht seo, agus baineadh ráta iontrála ar lá na máinliachta 16.5% amach in Ospidéal San Séamas. Teastaíonn anailís bhreise, ar an ábhar sin, lena fhiosrú cibé acu an féidir nó nach féidir feabhsúcháin a dhéanamh do ghrúpa ar leith ospidéal maidir leis an méadracht seo.

Aistriú Cúraim a bhfuil Moill air: Imríonn Aistrithe Cúraim a bhfuil Moill orthu tionchar ábhartha ar leibhéil úsáide leapacha, agus bhí 7% de na laethanta leapa go léir inchurtha i leith othar a bhí oiriúnach do scaoileadh. Leag FSS sprioc amach d’Aistrithe Cúraim a bhfuil Moill orthu a rinne difear do 200,000 scaoileadh in 2019, ar tháinig laghdú anuas go dtí 175,000 orthu in 2021. In 2019, bhí 240,000 leaba, ar an iomlán, faoi réir aistriú cúraim a bhfuil moill air, agus tháinig laghdú anuas go dtí 141,666 air seo in 2021. Sainaithnítear éagsúlacht shubstainteach ar leibhéal réigiúnach agus ospidéil freisin in aistriú cúraim a bhfuil moill air, agus bhí 10% de leapacha a úsáideadh i réigiún teorann Bhaile Átha Cliath Thuaidh (RHA A) inchurtha i leith othar a bhí ag feitheamh le scaoileadh i gcomparáid le díreach 4% i gConnachta / Dún na nGall (RHA F).

Sábháilteacht Othar: Cruthaíonn ionfhabhtuithe faighte san ospidéal (HAIanna) agus teagmhais chógais costais d’ospidéil agus d’othair araon. Tá leitheadúlacht HAIanna leata i measc na n-ospidéal go léir, cé go bhfuil an chuma air go mbíonn ráta níos airde d’ionfhabhtú i dtaobh ionfhabhtuithe Staph ann i measc ospidéal ina mbíonn castacht níos mó iontu, ach níl aon cheangal soiléir ann i leith ionfhabhtuithe C. difficile. D’fhéadfadh díriú níos fearr ar scaipeadh C. difficile, CPE, agus S. aureus a mhaolú a bheith ina straitéis chost-éifeachtúil chun feabhas a chur ar fheidhmíocht ospidéil, cé go dteastódh taighde breise lena dheimhniú cén laghduithe ar HAIanna is féidir a bhaint amach atá i ngach samhail ospidéil nó RHA.

Moltaí

Athbhreithniú ar chóras bainistíochta feidhmíochta gníomhaí Géarchúraim FSS: Tugtar neamhchomhlíonadh phríomhtháscairí feidhmíochta sonraithe FSS faoi deara i measc go leor ospidéal i rith na mblianta uile a scrúdaíodh. Mar gheall nár baineadh an spriocfheidhmíocht amach i rith na mblianta, agus nach féidir roinnt PTFanna i measc ospidéal a chur i gcomparáid lena chéile, tá amhras ar éifeachtúlacht an chórais reatha i dtaobh bainistíocht feidhmíochta agus idirghabháil ghníomhach beartais a chur chun cinn. Spreagfadh na húdair athbhreithniú ar an liosta reatha de tháscairí feidhmíochta géarchúraim FSS, a sholáthraíonn liosta gonta PTFanna agus spriocanna ar féidir monatóireacht agus bainistíocht ghníomhach a dhéanamh ar fheidhmíocht ospidéil ina n-aghaidh.

An méid a foghlaimíodh agus limistéir a shainaithint do bhainistíocht ghníomhach feidhmíochta: Sainaithnítear sa pháipéar seo ospidéil agus réigiúin ina bhfuil na leibhéil chomhlíonta is airde agus is ísle do gach PTF a scrúdaíodh. Cé go mbaineann roinnt tosca leis na rudaí a chuireann feidhmíocht chun cinn i leith na méadrachta seo, d’fhéadfadh feidhmíocht i measc gach PTF, mar sin féin, cur chuige níos córasaí a chumasú i leith feabhsúcháin ar an soláthar géarchúraim a shainaithint. Áirítear leis na limistéir a bhfuil scrúdú breise le déanamh orthu tréimhsí feithimh fada sa RÉ, ardrátaí cóireála neamhiomláine, tearcúsáid a bhaint as AMAUanna agus na rátaí ionfhabhtuithe faighte i gcúram sláinte i roinnt ospidéal.

Idirghabháil réitigh chun feabhas a chur ar fheidhmíocht ospidéil: Ba cheart tabhairt faoi idirghabháil dhírithe chun feidhmíocht ospidéil a fheabhsú maidir le PTFanna ainmnithe, cosúil leis na limistéir a dtugtar cuntas orthu thuas, sa chás gur cuí. Is féidir na tairbhí a bhaineann le feidhmíocht fheabhsaithe ar PTFanna ainmnithe a chainníochtú i bhformhór na gcásanna agus ba cheart go gcuirfí é seo san áireamh sa leibhéal d’infheistíocht fhéideartha atá le déanamh agus ba cheart go mbeadh na costais comhionann le nó níos ísle ná na tairbhí féideartha dá bharr.