Fógraíonn an tAire Sláinte €1.5 milliún chun tacú le seirbhísí agus cúram galar neamhchoitianta a fhorbairt
- Foilsithe: 1 Samhain 2024
- An t-eolas is déanaí: 12 Aibreán 2025
Tá sonraí fógartha ag Stephen Donnelly, an tAire Sláinte, faoin leithdháileadh €1.5 milliún chun seirbhísí galar neamhchoitianta a fhorbairt mar chuid de Bhuiséad 2025.
Sainmhínítear galair neamhchoitianta mar leitheadúlacht níos lú ná cúig chás in aghaidh gach 10,000 duine. Bíonn tionchar ag na galair seo i dteannta a chéile ar thart ar 6% nó ar dhuine as 17 de dhaonra na hÉireann.
Is minic a bhíonn cúram casta agus an-speisialaithe ag teastáil ó dhaoine ar diagnóisíodh go bhfuil galar neamhchoitianta orthu, cúram a bhraitheann ní hamháin ar na gairmithe cúraim sláinte den scoth anseo in Éirinn ach a bhaineann tairbhe as saineolas idirnáisiúnta freisin.
Tacóidh cistiú faoi Bhuiséad 2025 le cúram a sholáthar do dhaoine a bhfuil galar neamhchoitianta orthu, trí acmhainní a chur ar fáil chun comhordú cúraim a fheabhsú agus trí chomhar le saineolas idirnáisiúnta a neartú trí na Líonraí Tagartha Eorpacha.
Tacóidh sé freisin le forbairt bhreise a dhéanamh ar Oifig Náisiúnta Fheidhmeannacht na Seirbhíse Sláinte maidir le Galair Neamhchoitianta, agus cuirfear acmhainní ar fáil di roimh an Straitéis Náisiúnta nua maidir le Galair Neamhchoitianta a fhoilseofar go luath.
Cuireadh €300,000 eile ar fáil chun tacú leis na hathbhreithnithe fianaise a threoraíonn leathnú Chlár Scagthástála na Naíonán Nuabheirthe. Tá maoiniú suntasach leithdháilte freisin chun tacú le forbairt leanúnach na Seirbhíse Cliniciúla Géineolaíochta agus Géanómaíochta. Laghdóidh an maoiniú seo an t-am feithimh agus feabhsóidh sé rochtain ar sheirbhísí géiniteacha cliniciúla.
Dúirt an tAire Donnelly:
“Leis an gcistiú seo, neartófar acmhainní inár nOifig Náisiúnta um Ghalair Neamhchoitianta, rud a chuirfidh ar a cumas an Plean Náisiúnta nua um Ghalair Neamhchoitianta a chur chun feidhme, mar atá leagtha amach i gClár an Rialtais.
“Tuigim go maith gur féidir le diagnóis galar neamhchoitianta a bheith ina eispéireas an-uaigneach agus scoite amach d’othair agus dá dteaghlaigh. Nuair a smaoinímid go bhfuil 300,000 dár ndaonra ag déileáil le galar neamhchoitianta le chéile, ciallaíonn sé go bhfuil na galair seo i bhfad ó neamhchoitianta. Tá comhoibriú agus saineolas comhroinnte ríthábhachtach le haghaidh seirbhísí agus cúram othar feabhsaithe, mar sin tá ríméad orm maoiniú a chur ar fáil a thacóidh le comhpháirtíocht mhéadaithe trínár Líonraí Tagartha Eorpacha.’
Dúirt an tOllamh Mary Horgan, Príomhoifigeach Míochaine Eatramhach:
“Cuirtear fáilte mhór roimh an gcistiú a fógraíodh do ghalair neamhchoitianta agus cinnteofar leis go mbeidh na bloic thógála i bhfeidhm chun moltaí na Straitéise Náisiúnta nua maidir le Galair Neamhchoitianta a chomhlíonadh nuair a fhoilseofar níos déanaí i mbliana í. Cinnteoidh sé freisin gur féidir linn tosú ag freastal ar na riachtanais iomadúla nach bhfuiltear ag freastal orthu atá ag daoine a bhfuil galar neamhchoitianta orthu in Éirinn, a dteaghlaigh, a gcúramóirí agus a bhfoirne cliniciúla sula bhfoilseofar an Straitéis”.
Dúirt an tOllamh Cecily Kelleher, Cathaoirleach an Ghrúpa Náisiúnta um Straitéis Náisiúnta maidir le Galair Neamhchoitianta:
“Is fianaise é an maoiniú seo ar thiomantas daingean an Aire agus na Roinne Sláinte do shaincheist shuntasach na ndaoine inár bpobal a bhfuil galar neamhchoitianta orthu. Táim ag súil go seolfar straitéis chuimsitheach nua go luath lena cur chun feidhme in 2025.”
Nótaí don eagarthóir:
Bunaíodh an Grúpa Stiúrtha Náisiúnta um Ghalair Neamhchoitianta i mí na Nollag 2023 chun gealltanas Chlár an Rialtais a chomhlíonadh maidir le Straitéis Náisiúnta nua um Ghalair Neamhchoitianta a fhorbairt d’Éirinn. Táthar ag súil go bhfoilseofar an Straitéis nua níos déanaí i mbliana agus go gcuirfear tús lena cur chun feidhme go luath in 2025.