Fógraíonn an tAire Sláinte faomhadh an Rialtais do Chlár Vacsaínithe Treo-Aimsitheora nua don Víreas Sincítiach Riospráide (RSV)
- Foilsithe: 18 Meitheamh 2024
- An t-eolas is déanaí: 12 Aibreán 2025
Fuair an tAire Sláinte faomhadh an Rialtais inniu do Chlár Vacsaínithe Treo-Aimsitheora don Víreas Sincítiach Riospráide (RSV) i measc leanaí.
Tá sé mar aidhm ag an gclár, a bheidh ar siúl idir Mheán Fómhair 2024 agus Fheabhra 2025, an t-ualach a chuireann RSV ar an tseirbhís cúraim sláinte a mhaolú trí líon na dtinneas agus na n-ospidéal i measc leanaí óga a laghdú.
Tagann sé sna sála ar chomhairle ón gCoiste Comhairleach Náisiúnta Imdhíonta (NIAC) ag moladh go n-úsáidfí imdhíonadh antasubstaintí monaclónacha don téarma 2024/2025. Tairgfear an vacsaín do thart ar 28,000 naíonán le linn na tréimhse sin.
Bunaithe ar fhianaise ó chlár den chineál céanna a cuireadh i bhfeidhm sa Spáinn, meastar go laghdóidh an clár RSV do naíonáin in Éirinn líon iomlán na ndaoine in ospidéal faoi 453, chomh maith le suas le 48 san ICU.
Dúirt an tAire Donnelly:
“An geimhreadh seo caite, chonaiceamar an tionchar suntasach a bhí ag RSV ar ár seirbhís sláinte, go háirithe in ospidéil phéidiatraiceacha. Chonaiceamar an líon is mó riamh leanaí san ospidéal de thoradh RSV, agus is iad leanaí faoi bhun bliana amháin is mó a bhíonn buailte.
"Tá an-áthas orm faomhadh an Rialtais a fháil inniu don chlár seo a théann go díreach agus go tapa i ngleic leis an bhfadhb seo agus tá súil agam go mbeidh tionchar láithreach aige ar thinneas a laghdú agus an t-ualach ar ár n-acmhainní cúraim sláinte a íoslaghdú i rith an gheimhridh.
"Cuideoidh an clár Treo-Aimsitheora seo freisin le bonn eolais a chur faoi fhorbairt clár RSV amach anseo atá dírithe ar mhinicíochtaí tinnis i measc an phobail agus an méid daoine in ospidéil a laghdú."
Dúirt an Príomh-Oifigeach Leighis gníomhach, an Dr Colette Bonner:
“Cuideoidh an clár treo-aimsitheora seo le leanaí óga a chosaint ó RSV agus le hacmhainn na seirbhíse sláinte a chosaint le linn an gheimhridh seo chugainn. Mholfainn do thuismitheoirí do naíonáin atá incháilithe an deis a thapú chun a leanbh a chosaint ó RSV agus leas a bhaint as an imdhíonadh de réir mar a bheidh sé ar fáil."
Tá an clár Treo-Aimsitheora á chur i bhfeidhm ag Feidhmeannacht na Seirbhíse Sláinte mar bheart sealadach do shéasúr RSV 2024/2025 agus féadfar é a athrú sna sála ar na torthaí dena Measúnuithe Teicneolaíochta Sláinte (HTAnna) ar imdhíonadh RSV atá á dhéanamh faoi láthair ag an Údarás um Fhaisnéis agus Cáilíocht Sláinte (HIQA).
Nótaí:
- Tagraíonn Clár Treo-Aimsitheora do thionscnamh straitéiseach atá deartha chun iniúchadh a dhéanamh ar chuir chuige nuálacha chun torthaí sláinte a fheabhsú laistigh de phobal nó de dhaonra. Is minic go mbíonn siad ina dtionscadail phíolótacha nó ina samhlacha ar féidir, má éiríonn leo, iad a mhéadú agus a mhacasamhlú i suíomhanna eile.
- Forbraíodh Clár Vacsaínithe Treo-Aimsitheora RSV mar gheall ar chomhairle a fháil ó NIAC, ag moladh go n-úsáidfí antasubstaintí monaclónacha don téarma 2024/2025. Bainfidh leanaí a fhaigheann an vacsaín antasubstaintí monaclónacha RSV ar an dara lá den saol tairbhe as cosaint ó ionfhabhtú láithreach, agus ar feadh cúig mhí.
- Mar thoradh ar chlár imdhíonta RSV a cuireadh i bhfeidhm sa Ghailís sa Spáinn, tháinig laghdú 89% ar líon na leanaí a cuireadh san ospidéal astu siúd a fuair imdhíonadh RSV i gcomparáid leis an ráta ospidéil le blianta beaga anuas. Bunaithe ar an bhfianaise sin, meastar go laghdóidh an clár RSV do naíonáin in Éirinn líon iomlán na ndaoine in ospidéal faoi 453, chomh maith le suas le 48 san ICU. (bunaithe ar 50% de na naíonáin incháilithe a fhaigheann an vacsaín).
- Tá HIQA i mbun Measúnuithe Teicneolaíochta Sláinte ar imdhíonadh RSV in Éirinn faoi láthair, chun fáil amach an mbainfidh vacsaíniú naíonán nó aosach an tairbhe is mó as úsáid cúraim sláinte a laghdú mar gheall ar ionfhabhtú RSV agus chun an straitéis imdhíonta is cost-éifeachtaí a aithint. Cuirfidh torthaí na HTAnna seo, mar aon le foghlaim ón gclár nua Pathfinder, bonn eolais faoi fhorbairt chláir imdhíonta RSV níos fadtéarmaí.