Foilsíonn an tAire Sláinte tuarascáil den Sainghrúpa Stiúrtha um Bhagairtí Sláinte atá ag Teacht Chun Cinn
- Foilsithe: 25 Deireadh Fómhair 2024
- An t-eolas is déanaí: 15 Aibreán 2025
D'fhoilsigh an tAire Sláinte Stephen Donnelly tuarascáil an tSainghrúpa Stiúrtha um Bhagairtí Sláinte atá ag Teacht Chun Cinn (ESG) inniu. Tá roinnt moltaí ann chun ullmhacht na hÉireann do ghéarchéimeanna sláinte poiblí a neartú, idir phaindéimí agus na héifeachtaí a bhaineann leis an ngéarchéim aeráide.
I measc na moltaí uilig, tá:
- Seirbhís um Fhreagairt Sláinte Éigeandála agus Slándála nua a bhunú chun seachadadh tapa olltástála, rianú teagmhálaithe agus vacsaínithe a chumasú
- Struchtúr an Ghrúpa Náisiúnta um Chomhordú Éigeandála (NECG) a úsáid chun freagairt chomhordaithe uile-rialtais ar éigeandálaí sláinte a éascú
- Grúpa Comhairleach Eolaíochta Éireannach um Éigeandálaí (ISAGE) a bhunú chun tacú le cinnteoireacht an rialtais
- Grúpa Oibre Idir-rannach a bhunú chun comhoibriú tras-rialtais a fheabhsú agus iad ag ullmhú d'éigeandálaí sláinte amach anseo
D'eascair obair an ESG as tuarascáil an tSainghrúpa Chomhairligh um Athchóiriú na Sláinte Poiblí (PHREAG) a rinne measúnú ar fhreagairt sláinte poiblí na hÉireann ar COVID-19.
Fuarthas amach i dtuarascáil PHREAG gur fhreagair Éire go han-mhaith don phaindéim, agus go raibh na rátaí básmhaireachta sa tír i measc na rátaí is ísle san Eoraip. Bhí an borradh i rátaí na ndaoine a cuireadh san ospidéal níos ísle agus níos giorra ná go leor tíortha eile san Eoraip agus bhí na rátaí vacsaínithe i measc na rátaí ab airde.
Tar éis torthaí PHREAG a scrúdú, tá moltaí déanta anois ag an ESG atá deartha chun aghaidh a thabhairt ar bhearnaí atá ann cheana i gcóras cosanta sláinte poiblí na hÉireann chun feabhas a chur ar ár n-ullmhacht d'éigeandálaí sláinte.
Dúirt an tAire Donnelly:
"Ó tharla paindéim COVID-19, tá clár uaillmhianach athchóirithe sláinte poiblí ann, bunaithe ar leibhéil infheistíochta an rialtais. Is uirlis ríthábhachtach í tuarascáil an ESG chun cabhrú linn tuilleadh forbartha a dhéanamh ar an dul chun cinn sin, trí fheabhsuithe breise a fhorbairt ar ár sásraí cosanta sláinte.
"Táimid ag baint leas as na ceachtanna a foghlaimíodh ón bpaindéim chun a chinntiú go mbeimid in ann freagairt go héifeachtach d'éigeandálaí sláinte poiblí amach anseo.
"Ba mhaith liom buíochas a ghabháil le ballraíocht an tSainghrúpa Stiúrtha, lena n-áirítear an Cathaoirleach an tOllamh Mary Horgan, as a gcuid ama, eolais agus saineolais a thabhairt go flaithiúil.”
Nótaí
- Item was unpublished or removed
- Tuarascáil an tSainghrúpa Chomhairligh um Athchóiriú na Sláinte Poiblí
Tá liosta iomlán na moltaí mar seo a leanas:
- Seirbhís Práinnfhreagartha um Shlándáil Sláinte (HSERS) a bhunú chun a chinntiú go bhfuil an cumas ag Sláinte Poiblí FSS olltástáil, rianú teagmhála agus vacsaíniú a sheachadadh go tapa mar fhreagra ar theagmhais agus éigeandálaí sláinte poiblí
- Struchtúr an Ghrúpa Comhordaithe Éigeandála Náisiúnta (NECG) a úsáid chun freagairt chomhordaithe uile-rialtais a éascú ar éigeandálaí náisiúnta sláinte amach anseo lena n-áirítear paindéimí
- Grúpa comhairleach saineolaithe a bhunú chun comhairle eolaíoch agus theicniúil a sholáthar chun tacú le cinnteoireacht rialtais le linn éigeandálaí sláinte
- Cumais faireachais a fheabhsú chun faireachas ar gach guaiseacha a chumasú agus chun cur chuige 'Aon tSláinte' a neartú i leith bagairtí sláinte atá ag teacht chun cinn
- Mol Sintéise Fianaise a bhunú agus meicníocht tapa-ghníomhaithe le haghaidh bagairtí sláinte atá ag teacht chun cinn
- Rannpháirtíocht na hÉireann i staidéir ilnáisiúnta agus i dtrialacha oiriúnaitheacha a chumasú agus a thacú chun forbairt agus imscaradh frithbheart leighis a éascú
- Moladh go léiríonn feabhsú breise ar an bhfeidhm reatha um chosaint sláinte an tsamhail is fearr d’Éirinn, ag cinntiú gur féidir an t-eolas agus an taithí institiúideach laistigh de na struchtúir reatha um chosaint sláinte a choinneáil agus tógáil orthu