Fógraíonn na hAirí Sláinte go bhfuil HHC anois rangaithe mar dhruga mídhleathach
- Foilsithe: 29 Iúil 2025
- An t-eolas is déanaí: 30 Iúil 2025
D’fhógair an tAire Sláinte, Jennifer Carroll MacNeill, an tAire Sláinte Poiblí, Folláine agus na Straitéise Náisiúnta Drugaí, Jennifer Murnane O’Connor agus an tAire Meabhairshláinte, Mary Butler, go bhfuil an druga Hexahydrocannabinol (HHC) rangaithe mar dhruga rialaithe Sceideal 1 faoin Acht um Mí-Úsáid Drugaí, 1977. Ciallaíonn sé seo go bhfuil allmhairiú, onnmhairiú, táirgeadh, sealbhú, díol agus soláthar táirgí ina bhfuil HHC mídhleathach anois.
Is cannaibionóideach leath-shintéiseach é HHC a bhfuil éifeachtaí cosúil le cannabas aige agus a dhíoltar go coitianta é mar thoitíní leictreonacha nó pinn vápála, i meascáin luibhe, olaí, glóthacha agus cácaí inite agus mar thintiúir. Ó aimsíodh é den chéad uair in Éirinn in 2022, tá baint aige le taomanna síocóise agus ospidéalú. Trí staidéar le déanaí déanta ag taighdeoirí in Ospidéal Ollscoile na Gaillimhe, fuarthas amach gurbh é HHC an dara druga is coitianta a d'úsáid othair a raibh síocóis orthu thar thréimhse 21 mí.
Tá sé ar cheann de 14 substaint nua, lena n-áirítear ópóidigh shintéiseacha agus cannaibionóidigh leath-shintéiseacha atá rangaithe le déanaí mar dhrugaí rialaithe. Tháinig seo chun cinn i ndiaidh dóibh a bheith aitheanta ag an AE agus ag Coimisiún na Náisiún Aontaithe um Dhrugaí Támhshuanacha mar shubstaint a chuireann sláinte phoiblí i mbaol go mór.
Tríd na substaintí seo a chur leis na Sceidil faoin Acht um Mí-Úsáid Drugaí, tugtar tuilleadh cumhachtaí don Garda Síochána dul i ngleic le trádáil drugaí atá aindleathach.
Tá drugaí sintéiseacha díobhálach agus is substaintí andúile iad. Trí na substaintí seo a rialú, cosnófar sláinte an phobail i gcoinne dochair a bhaineann le drugaí. I gcomhréir leis an gcur chuige atá faoi stiúir na sláinte i leith úsáid drugaí, tá an Roinn Sláinte ag méadú acmhainne i seirbhísí cóireála drugaí agus ag leathnú tionscnamh oideachais agus coisctheach freisin.
Dúirt an tAire Carroll MacNeill:
"Is cleas margaíochta atá dírithe ar dhaoine óga é díol HHC mar ghaltoitíní, i bpacáistiú tarraingteach nó i bhfoirm glóthaí inite, a chuireann an fhíric i bhfolach go bhfuil an druga seo díobhálach do mheabhairshláinte na n-óg agus is féidir leis a bheith ina substaint andúile.
"Faoin straitéis náisiúnta drugaí nua, a leanfaidh an straitéis reatha, táim tiomanta d'athbhreithniú a dhéanamh ar bhealaí dlíthiúla chun freagairt níos tapúla agus níos éifeachtaí do bhagairtí atá ag teacht chun cinn ó mhargadh luaineach na ndrugaí. I gcomhréir lenár gcur chuige atá dírithe ar an tsláinte i leith úsáid drugaí, is é ár dtosaíocht bearta a chur chun cinn a chuirfidh ar ár gcumas sláinte ár ndaonra a chosaint agus tacú leo."
Dúirt an tAire Murnane O’Connor:
"Is bagairt thromchúiseach ar shláinte an phobail í HHC, cosúil le drugaí sintéiseacha agus leathshintéiseacha eile. Is céim thábhachtach í rialú HHC agus substaintí díobhálacha eile, agus ní mór cláir oideachais agus coisctheacha a chomhlánú ionas go mbeidh daoine óga agus tuismitheoirí níos mó ar an eolas faoi na rioscaí a bhaineann le húsáid drugaí.
"Tá a fhios againn go bhfuil HHC freagrach as ospidéaluithe agus taomanna síocóise agus go bhfuil go leor daoine inniu ag streachailt le handúil mar thoradh ar seo agus ar dhrugaí cosúil leo. Impím ar dhaoine atá ag lorg cabhrach, dóibh féin nó do dhuine muinteartha, teagmháil a dhéanamh le Líne Chabhrach Drugaí agus Alcóil HSE. Is féidir eolas faoi sheirbhísí i do cheantar a fháil ar léarscáil idirghníomhach an Bhoird Taighde Sláinte.
"Ba mhaith liom sólás a thabhairt freisin do thuismitheoirí atá buartha faoina bpáistí agus faoin tionchar a bhíonn ag HHC. Tá cabhair agus tacaíocht ar fáil, agus impím orthu an acmhainn den scoth de chuid FSS ar drugs.ie dar teideal Alcól agus Drugaí: Treoir do Thuismitheoirí a úsáid. Soláthraíonn sé faisnéis fhíorasach agus comhairle maidir le conas labhairt le do pháistí faoi na rioscaí a bhaineann le drugaí mídhleathacha."
Dúirt an tAire Butler:
"Léirigh staidéar le déanaí go raibh HHC páirteach in aon trian de na cásanna síocóise den chéad uair in Ospidéal Ollscoile na Gaillimhe. Is fianaise shoiléir í seo ar an dochar tromchúiseach a dhéanann sé. Trí HHC a rangú mar dhruga rialaithe Sceideal 1, laghdófar a infhaighteacht agus a thionchar ar shláinte, go háirithe ar mheabhairshláinte daoine óga. Tá bearta mar seo riachtanach chun an brú ar ár seirbhísí meabhairshláinte a laghdú agus daoine aonair a chosaint, go háirithe iad siúd nach bhfuil ar an eolas faoi na rioscaí, ó dhochar suntasach agus inseachanta."