Ráiteas ón bhFoireann Éigeandála Sláinte Poiblí Náisiúnta - Dé Céadaoin, an 12 Lúnasa 2020
- Foilsithe: 12 Lúnasa 2020
- An t-eolas is déanaí: 11 Aibreán 2025
Níor cuireadh ach bás amháin nua in iúl don Ionad Faireachais um Chosaint Sláinte (an IFCS) inniu.
Tá 1,774 duine, ar an iomlán, tar éis bás a fháil in Éirinn go dtí seo a bhain le COVID-19.
Amhail meán oíche Dé Máirt, an 11 Lúnasa, cuireadh an IFCS ar an eolas ar 40 cás nua deimhnithe de COVID-19. Tá 26,838* cás deimhnithe, ar an iomlán, de COVID-19 ann anois in Éirinn.
As na cásanna a cuireadh in iúl inniu:
- fir iad 21 díobh / mná iad 19 díobh
- tá 75% díobh faoi 45 bliain d’aois
- deimhníodh go mbaineann 19 gcás le briseadh amach nó le daoine a rinne teagmháil dhlúth le cás deimhnithe
- sainaithníodh 13 chás mar chásanna a tarchuireadh sa phobal
- tá 12 chás i mBaile Átha Cliath, 11 i gCill Dara, 7 in Uíbh Fhailí, agus tá fuílleach na gcásanna sa Chlár, Dún na nGall, Luimneach, an Mhí, Ros Comáin, Tiobraid Árann agus Cill Mhantáin
Tá FSS ag oibriú chun aon teagmhálacha a d’fhéadfadh go ndearna na hothair a shainaithint chun eolas agus comhairle a sholáthar dóibh chun cosc a chur ar an víreas a scaipeadh níos mó.
Cuirtear eolas cothrom le dáta ar fáil ar Dheais COVID-19 ar phríomhtháscairí COVID-19 sa phobal.
Dúirt an Dr Ronan Glynn, an Príomhoifigeach Leighis Gníomhach, an Roinn Sláinte:
"Nuair a dhéanann an FÉSPN dul chun cinn COVID-19 in Éirinn a rianú agus anailísiú, cuirimid i bhfad níos mó san áireamh ná díreach na figiúirí laethúla. Cé go bhfuil líon cásanna an lae inniu dearfach maidir leis an méid a thugamar faoi deara an deireadh seachtaine seo caite, ábhar buartha dúinn go fóill an méid cásanna atá á dtabhairt le fios, chomh maith lena ndáileadh ar fud na tíre.
"Is ionann anois an meánmhéid cásanna a thugtar le fios go náisiúnta gach cúig lá agus 75 sa lá. Fiú nuair a fhágaimid Cill Dara, Laois agus Uíbh Fhailí as an áireamh uaidh seo, tá an meánmhéid cásanna ardaithe go suntasach i gcás na coda eile den tír (31 cás sa lá) - is fiú a thabhairt chun cuimhne go raibh an meámhéid cásanna a tugadh le fios gach cúig lá go déanach i Meitheamh ní ba lú ná 10 gcás. I gcomhthéacs an mhéid seo, iarraim ar dhaoine chun an fód a sheasamh agus leanúint ag cloí go docht daingean leis an gcomhairle sláinte poiblí."
Dúirt an tOllamh Philip Nolan, Cathaoirleach Ghrúpa Comhairleach Samhaltaithe Eipidéimeolaíochta an FÉSPN:
"Mar gheall ar an mbealach a scaiptear an víreas seo, d’fhéadfadh moill a bheith ann idir an tráth a dhéanann sé síoladh agus an tráth a thugaimid faoi deara é ag teacht chun solais inár bpobail. Ar an gcúis seo, oibrímid i dtréimhsí méanmhéid cásanna gach 14 lá agus cúig lá lena chinntiú go bhfuil gach rud á thabhairt faoi deara againn maidir leis an mbealach atá an galar ag gníomhú in Éirinn. Cé go bhfuil figiúirí an lae inniu sách íseal i gcomhthéacs na seachtaine ar leith seo, is tábhachtach go gcuimhnímid gur fada an bóthar atá amach romhainn.
"Is eol dúinn go ndéantar COVID-19 a tharchur nuair a dhéanann daoine teagmháil dhlúth lena chéile. Nuair a iarraimid ort chun cloí le bearta sláinte poiblí agus le comhairle sláinte poiblí, is é an t-aon chuspóir atá aige sin ná teorainn a chur ar an deis a bhíonn ag an galar seo chun scaipeadh tríd an teagmháil dhlúth seo. Is tábhachtach gurb eol do gach duine in Éirinn na rudaí is féidir leo a dhéanamh ina bpobail féin chun cabhrú.
"Is iad siúd: teorainn a chur ar ár dteagmhálaithe, suíomhanna plódaithe taobh istigh a sheachaint, aird dhlúth a thabhairt ar shláinteachas lámh agus riospráide, clúdach aghaidhe a chaitheamh nuair is cuí, Aip Rianaire COVID a úsáid aghaidh féinaonrú a dhéanamh a luaithe a cheapann tú go bhfuil na comharthaí ort. Cuirtear iad seo i bhfeidhm ar fud na tíre, ní hamháin i gcontaetha Chill Dara, Laoise agus Uíbh Fhailí."
Dúirt an Dr Siobhán Ní Bhriain, Síciatraí Comhairleach agus Ceannasaí Cúraim Chomhtháite FSS:
"Gné ríthábhachtach dár bhfreagairt náisiúnta do COVID-19 í tástáil. Cuireann sé ar ár gcumas chun a mhéid cásanna agus is féidir a aimsiú agus chun iad a aonrú go tapa, agus cabhraíonn seo le cosc a chur ar scaipeadh breise. D’impífimis ar dhaoine a n-atreoraítear iad chun go ndéanfar tástáil orthu mar gheall go ndearna siad teagmháil dhlúth le duine a bhfuil an víreas air/uirthi, chun freastal ar an dá thástáil.
"Tá sé an-tábhachtach, má thagann aon chinn de chomharthaí COVID-19 ort, ar nós casachta, fiabhrais, gearranála, nó má chailleann tú do bholadh/bhlas - go ndéanann tú féinaonrú láithreach, agus go nglaonn tú ar do DG láithreach bonn. Ná fan go bhfeicfidh tú. Téigh i mbun gnímh go tapa. Cuirfidh seo teorainn ar an dóchúlacht go ndéanfar an víreas an-tógálach seo a tharchur níos mó."
CRÍOCH
- Mar thoradh ar bhailíochtú sonraí a rinne an IFCS, rinneadh dhá bhás a dhífhógairt. Léirítear é seo san fhigiúr 26,838 bás.
Nótaí don Eagarthóir:
Ba cheart go mbeadh na tosca baoil go dtiocfaidh COVID-19 orainn ar eolas ag gach duine:
- Fad – téann an baol go dtiocfaidh COVID-19 ort in airde de réir mar a thagann laghdú ar an bhfad idir tú féin agus daoine eile. Fan 2 mhéadar amach ó dhaoine eile, sa chás gur féidir
- Gníomhaíocht – Is féidir leis an mbealach a chaitheann tú am le daoine agus na rudaí a dhéanann tú leo an baol atá romhat a mhéadú. Cloígh le Treoirlínte Bí Sábháilte an rialtais nuair a bhíonn am á chaitheamh agat le daoine eile
- Am – Dá mhéid ama a chaitheann tú le teagmháil dhlúth a dhéanamh le daoine eile is airde an baol go dtiocfaidh COVID-19 ort. Coimeád cuntas ar na daoine a gcaitheann tú am leo agus ar conas a chaitheann tú am leo
- Timpeallacht – Tá sé níos sábháilte bheith taobh amuigh ná bheith taobh istigh. Cas le daoine eile taobh amuigh, sa chás gur féidir. Mura féidir seo a dhéanamh, coimeád fuinneoga agus doirse ar oscailt nuair a chasann tú le daoine eile taobh istigh
- Comharthaí – Bíodh eolas agat ar na comharthaí. Má tá na comharthaí ort, déan féinaonrú agus déan teagmháil le do dhochtúir ginearálta láithreach
Tá Comhairle Sláinte Poiblí do gach saoránach ar fáil anseo.
Bíodh eolas agat ar chomharthaí COVID-19
Is iad siúd:
- fiabhras (ardteocht - 38 céim Celsius nó os a cionn)
- casacht- is féidir le haon saghas casachta a bheith i gceist leis seo, seachas díreach casacht thirim
- gearranáilnó deacrachtaí anála
- caillteanas bolaidh nó má thagann athrú ar do bholadh nó do bhlas
- comharthaí ar nós fliú