Ráiteas ón bhFoireann Náisiúnta Éigeandála Sláinte Poiblí- 25 Feabhra 2020

Tástáladh 90 ceann de chásanna amhrasta Covid-19 (Coróinvíreas) in Éirinn.

**Ní raibh aon chásanna deimhnithe Covid-19 (Coróinvíreas) ann in Éirinn go dtí seo.

Tháinig an Fhoireann Náisiúnta Éigeandála Sláinte Poiblí le chéile inniu (Dé Máirt an 25 Feabhra) mar chuid dá measúnú leanúnach ar fhreagairt agus ullmhacht na hÉireann do Covid-19.**

Mhol an Fhoireann Náisiúnta Éigeandála Sláinte Poiblí inniu:

• go dtabharfaí algartaim cothrom le dáta chun an liosta méadaithe réigiún atá thíos leis an víreas a léiriú, ar liosta é lena n-áirítear an tSeapáin, Singeapór, Hong Cong, an Chóiré Theas, an Iaráin, ceithre réigiún i dtuaisceart na hIodáile (an Lombaird, Veneto, Emilia-Romagna agus Píodmant) agus mórthír na Síne
• nach rachfaí ar aghaidh, ar fhorais sláinte poiblí, leis an tsraith cluichí rugbaí idir Éire agus an Iodáil an deireadh seachtaine ar a dtiteann an Satharn an 7 Márta
• go mbunófaí foghrúpa saineolach chun critéir a fhorbairt le haghaidh measúnú riosca a dhéanamh ar mhórthionóil eile
• go dtosófaí, mar chuid den straitéis um shrianadh atá i bhfeidhm ag Éirinn, ar chásanna amhrasta COVID-19 (Coróinvíreas) a leithlisiú i suíomhanna pobail tar éis iad a thástáil
• go méadófaí láithreach leibhéal na bhfeachtas feasachta poiblí atá ar bun ag calafoirt agus aerfoirt

Ag labhairt dó tar éis an chruinnithe de chuid na Foirne Náisiúnta Éigeandála Sláinte Poiblí, dúirt Simon Harris, an tAire Sláinte:

“Tar éis measúnú a dhéanamh ar fhorbairtí le déanaí san Eoraip agus ar fud an domhain, tá Éire fós i gCéim an tSrianta. Bunaithe ar threoirlínte ón Lárionad Eorpach um Ghalair a Chosc agus a Rialú, áfach, tá údar ann le mórthionóil a chealú sa chéim seo in imthosca eisceachtúla. Maidir leis an moladh a rinneadh inniu go gcealófaí an tsraith cluichí rugbaí idir Éire agus an Iodáil, tá sé bunaithe ar chineál na ráige atá i réim i dtuaisceart na hIodáile, ar ráig í a bhíonn ag athrú go tapa, agus ar an mbaol iarmhartach go n-allmhaireofaí cásanna isteach in Éirinn dá rachadh na cluichí ar aghaidh.

Shainaithin an Fhoireann Náisiúnta Éigeandála Sláinte Poiblí sainiú cáis nua, rud a dtagann na háiteanna seo a leanas faoi: an tSeapáin, Singeapór, Hong Cong, an Chóiré Theas, an Iaráin, ceithre réigiún i dtuaisceart na hIodáile (an Lombaird, Veneto, Emilia-Romagna agus Píodmant) agus mórthír na Síne.

Dá bhrí sin, tugadh an chomhairle sláinte poiblí ó Éirinn cothrom le dáta chun na daoine seo a leanas a chumhdach:

• aon duine a bhí i réigiún atá thíos leis an víreas (mórthír na Síne, an Chóiré Theas, an tSeapáin, Singeapór, Hong Cong, an Iaráin agus na ceithre réigiún lena mbaineann i dtuaisceart na hIodáile) sna 14 lá seo a chuaigh thart AGUS a bhfuil siomptóim air/uirthi, ba cheart dó/di é/í féin a leithlisiú agus glao a chur ar a lia-chleachtóir ginearálta
• aon duine a bhí i ndlúth-theagmháil le cás deimhnithe COVID-19 sna 14 lá seo a chuaigh thart AGUS a bhfuil siomptóim air/uirthi, ba cheart dó/di é/í féin a leithlisiú agus glao a chur ar a lia-chleachtóir ginearálta lom láithreach
• aon duine a bhí i réigiún atá thíos leis an víreas (an tSín, an tSeapáin, Singeapór, Hong Cong, an Chóiré Theas, an Iaráin agus na ceithre réigiún lena mbaineann i dtuaisceart na hIodáile) sna 14 lá seo a chuaigh thart agus a bhfuil an tsláinte aige/aici, ba cheart dó/di dul chuig www.HSE.ie chun comhairle a fháil

Tabharfar na halgartaim atá in úsáid cothrom le dáta chun an liosta méadaithe réigiún atá thíos leis an víreas a léiriú agus dáilfear na halgartaim nua ar fud an chórais sláinte.

Ag labhairt dó go sonrach faoi dhaoine atá ag filleadh ar ais ó na réigiúin i dtuaisceart na hIodáile atá thíos leis an víreas, dúirt an Dr Tony Holohan, Príomhoifigeach Míochaine sa Roinn Sláinte:

Molann an Fhoireann Náisiúnta Éigeandála Sláinte Poiblí freisin go dtosófaí ar chásanna amhrasta COVID-19 (Coróinvíreas) a leithlisiú i suíomhanna pobail tar éis iad a thástáil.

Ag teacht sna sála ar an méadú i gcásanna COVID-19 san Iodáil, measann an Lárionad Eorpach um Ghalair a Chosc agus a Rialú anois gur idir measartha agus ard atá an baol go dtiocfaidh braislí cásanna den chineál céanna chun cinn i dtíortha eile den Aontas Eorpach.

CRÍOCH

Nótaí don Eagarthóir:

Áirítear iad seo a leanas leis na príomhghnéithe de phleananna ullmhachta na hÉireann:

Ullmhacht Fheidhmeannacht na Seirbhíse Sláinte

Shainaithin gach ospidéal géarmhíochaine saoráidí leithlisithe atá sainiúil do Covid-19 (Coróinvíreas)

Tá coistí ildisciplíneacha ullmhachta do COVID-19 (Coróinvíreas) á mbunú ag ospidéil ghéarmhíochaine chun maoirseacht a dhéanamh ar chur chun feidhme na mbeart Cosanta Sláinte

Chuir na seirbhísí cúraim chriticiúil treoir bainistíochta le chéile le haghaidh cúram a thabhairt d’aon othair ar a bhfuil COVID-19 (Coróinvíreas) agus óna dteastaíonn a gcuid seirbhísí

Tá ról gníomhach á imirt ag an tSeirbhís Náisiúnta Otharchairr i measúnú riosca a dhéanamh ar gach cás amhrasta COVID-19 agus sa fhreagairt chuí do chásanna a aithint agus a shrianadh

Dáileadh níos mó ná 13,500 ceann de phacaí trealaimh chosanta pearsanta ar Sheirbhísí Lia-Chleachtóirí Ginearálta Lasmuigh de Ghnáthuaireanta Oibre, ar Rannóga Sláinte Poiblí agus ar Chleachtaí Lia-Chleachtóirí Ginearálta

Calafoirt agus Aerfoirt

Ní ann d’aon srianta iontrála in Éirinn faoi láthair.

Níor mhol an Eagraíocht Dhomhanda Sláinte ná an Lárionad Eorpach um Ghalair a Chosc agus a Rialú go dtí seo go ndéanfaí scagadh ar iontráil ag calafoirt agus aerfoirt.

Tá na nithe seo a leanas i measc na bprótacal éifeachtach sláinte poiblí atá i bhfeidhm ag calafoirt agus aerfoirt:

• thug Feidhmeannacht na Seirbhíse Sláinte (FSS) faisnéis do chriúnna aerlíne le seachtainí beaga anuas
• má thagann cás amhrasta chun cinn, dáilfear foirmeacha rianú teagmhála ar gach paisinéir agus tabharfar na foirmeacha comhlánaithe ar aghaidh do na príomhphearsana de chuid FSS ag suíomh an teagmhais
• sula dtuirlingeoidh siad den aerárthach, molfar do phaisinéirí teagmháil a dhéanamh lena lia-chleachtóir ginearálta i gcás go dtiocfaidh siomptóim orthu laistigh de na 14 lá ina dhiaidh sin
• ordaítear don aerlíne an t-aerárthach a dhí-éilliú de réir na gcaighdeán sláinteachais eitlíochta ón Eagraíocht Dhomhanda Sláinte

Comhairle d’fhostóirí

Mura bhfuil aon siomptóim ar d’fhostaithe, ní gá duit aon bhearta a dhéanamh san áit oibre.

Ní bheidh orthu fanacht sa bhaile ná fanacht glan ar dhaoine eile.

Is féidir go rachaidh suas le 14 lá thart sula mbeidh siomptóim COVID-19 (Coróinvíreas) le brath.

Is féidir go n-áireofar iad seo a leanas leis na siomptóim sin:

• casacht
• giorra anála
• deacrachtaí análaithe
• fiabhras (ardteocht)

Is féidir le COVID-19 (Coróinvíreas) a bheith ina chúis le tinnis níos troime freisin, lena n-áirítear iad seo a leanas:

• niúmóine
• giorra anála
• deacrachtaí análaithe
• fiabhras (ardteocht)

Áirítear iad seo a leanas leis na nithe is féidir leat a dhéanamh chun tú féin a chosaint ar COVID-19 (Coróinvíreas):

• nigh do lámha i gceart agus go rialta
• cumhdaigh do bhéal nó do shrón le ciarsúr páipéir nuair a dhéanann tú casacht nó sraoth

Nigh do lámha i gceart agus go rialta le gallúnach agus uisce nó le glóthach láimhe alcólbhunaithe:

• tar éis duit casacht nó sraoth a dhéanamh
• tar éis duit an leithreas a úsáid
• sula n-íosfaidh tú
• sula réiteoidh tú bia agus tar éis duit bia a réiteach