Ráiteas ón bhFoireann Náisiúnta Éigeandála Sláinte Poiblí - Dé Céadaoin an 7 Deireadh Fómhair 2020
- Foilsithe: 7 Deireadh Fómhair 2020
- An t-eolas is déanaí: 8 Deireadh Fómhair 2020
Cuireadh in iúl don Ionad Faireachais um Chosaint Sláinte inniu go bhfuil cúigear le COVID-19 tar éis bás a fháil.
Tá 1,816 san iomlán básaithe de thoradh COVID-19 in Éirinn.
Amhail meán oíche Dé Máirt an 6 Deireadh Fómhair, cuireadh 611 cás nua deimhnithe de COVID-19 in iúl don HPSC. Tá 39,584 cás deimhnithe de COVID-19 in Éirinn anois.
De na cásanna a cuireadh in iúl inniu:
- is fir iad 303 / is mná iad 305 díobh
- tá 59% faoi bhun 45 bliain d’aois
- deimhnítear go bhfuil baint ag 50% le ráigeanna nó gur dlúth-theagmhálacha iad le cás deimhnithe
- aithníodh 83 cás mar thras-seoladh pobail
- tá 218 i mBaile Átha Cliath, 63 i gCorcaigh, 60 i nDún na nGall, 35 i nGaillimh, 31 i gCill Dara agus an 204 eile lonnaithe ar fud 21 chontae
Dúirt an Dr. Tony Holohan, Príomhoifigeach Leighis, an Roinn Sláinte:
"Tá meath breise tagtha ar phríomhtháscairí uile an ghalair sna trí lá ón gcruinniú deireanach de NPHET Dé Domhnaigh an 4 Deireadh Fómhair. Tá COVID-19 ag leathadh inár bpobal ar bhealach a chuireann an-imní orainn. Caithfimid na slabhraí tarchuir seo a bhriseadh.
"Cuireadh 80 cás COVID-19 san ospidéal i mí Lúnasa, 206 i mí Mheán Fómhair agus 77 go dtí seo i mí Dheireadh Fómhair.
"I mí Lúnasa, tuairiscíodh 4 bhás a bhain le COVID-19 san iomlán, 34 i mí Mheán Fómhair agus inniu an 7 Deireadh Fómhair tuairiscímid 8 mbás a bhaineann le COVID-19 an mhí seo."
Dúirt an Dr. Ronan Glynn, Leas-Phríomhoifigeach Leighis, an Roinn Sláinte:
"Tá treochtaí i líon na gcásanna agus minicíocht á léiriú anois i dtáscairí déine an ghalair. Tá méadú tagtha ar líon na ndaoine san ospidéal ó 122 Déardaoin seo caite go 156 tráthnóna inniu. Faoi láthair tá 25 duine i gcúram criticiúil i gcomparáid le 20 seachtain amháin ó shin."
Dúirt an tOllamh Philip Nolan, Cathaoirleach Ghrúpa Comhairleach um Shamhaltú Eipidéimeolaíochta na hÉireann NPHET:
"Tá líon na gcásanna agus na ndaoine á gcur san ospidéal ag fás go han-tapa. Meastar anois gurb ionann an uimhir atáirgthe agus 1.2. Má theipeann orainn tarchur víreasach a laghdú ar fud na tíre láithreach, d’fhéadfaimis 1,100 - 1,500 cás a fheiceáil in aghaidh an lae agus 300-450 duine san ospidéal faoin 7 Samhain."
Dúirt an Dr Siobhán Ní Bhriain, Síciatraí Comhairleach agus Ceannaire Cúraim Chomhtháite FSS:
"Molaim do gach duine smaoineamh faoi cad is féidir leo a dhéanamh ar leibhéal aonair chun an víreas a chur faoi chois agus borradh ar éilimh ospidéil a chosc. Faoi láthair, 20 lá is ea an meánfhad a chaithfidh othair COVID-19 fanacht san ospidéal agus 14 lá in ICU.
"Is é ICU an stad deireanach chun cúram a fháil maidir le haon bhreoiteacht. Dírigh ar chosc agus lean comhairle sláinte poiblí lena chinntiú go bhfuil bealaí cúraim ar fáil don oiread daoine agus cóireálacha agus is féidir."
CRÍOCH