Ráiteas ón bhFoireann Náisiúnta Éigeandála Sláinte Poiblí - Déardaoin an 27 Lúnasa 2020
- Foilsithe: 27 Lúnasa 2020
- An t-eolas is déanaí: 11 Aibreán 2025
Níor tuairiscíodh aon bhás nua don Ionad Faireachais um Chosaint Sláinte inniu.
Tá 1,777 san iomlán básaithe de thoradh COVID-19 in Éirinn anois.
Amhail meán oíche Dé Domhnaigh an 26 Lúnasa, cuireadh 93 cás nua deimhnithe de COVID-19 in iúl don HPSC. Tá 28,453* cás deimhnithe de COVID-19 in Éirinn anois.
De na cásanna a cuireadh in iúl inniu:
- is fir iad 52 agus is mná iad 41 acu
- tá 70% faoi bhun 45 bliana d’aois
- deimhnítear go bhfuil baint ag 73 le ráigeanna nó gur dlúth-theagmhálacha iad le cás deimhnithe
- aithníodh 12 cás mar thras-seoladh pobail
- 34 i mBaile Átha Cliath, 7 i gCill Dara, 6 i nDún na nGall, 6 i Laois, 5 i Luimneach, 5 i Loch Garman agus tá na 30 cás eile i gCeatharlach, an Cabhán, an Clár, Corcaigh, Lú, an Mhí, Muineachán, Uíbh Fhailí, Tiobraid Árann, an Iarmhí agus Cill Mhantáin
Tá FSS ag obair chun aon teagmhálacha a d’fhéadfadh a bheith ag na hothair a aithint chun faisnéis agus comhairle a sholáthar dóibh chun scaipeadh breise a chosc.
Soláthraíonn Deais COVID-19 faisnéis cothrom le dáta faoi phríomhtháscairí COVID-19 sa phobal.
Dúirt an Dr. Ronan Glynn, Príomhoifigeach Gníomhach Leighis, an Roinn Sláinte:
"Tá fás mall COVID-19 le feiceáil againn in Éirinn.
"Is é an gníomh is éifeachtaí is féidir linn a dhéanamh chun ráta tarchuir an víris seo a laghdú ná líon ár ndlúth-theagmhálacha a laghdú. Má dhéanaimid é seo agus má leanaimid orainn ag cleachtadh na n-iompraíochtaí sábháilte eile mar scaradh fisiceach, sluaite a sheachaint, lámha a ní, casacht agus sraothartach a chlúdach, masc aghaidh a chaitheamh nuair is cuí agus aip Rianaithe COVID a íoslódáil, tá seans dáiríre againn leathadh an víris seo a mhoilliú."
Dúirt an tOllamh Philip Nolan, Cathaoirleach Ghrúpa Comhairleach um Shamhaltú Eipidéimeolaíochta na hÉireann:
"Meastar go bhfuil an uimhir atáirgthe idir 1 agus 1.2 anois. Cé gur feabhas é seo ar an méid atá feicthe againn le déanaí, níl sé fós mar a theastaíonn uainn go mbeadh sé. Tá tarchur an ghalair ag fás i gcónaí agus caithfimid an uimhir atáirgthe a thabhairt ar ais faoi bhun 1 má táimid chun scaipeadh COVID-19 a mhoilliú go héifeachtach agus a tharchur a chosc."
Dúirt an Dr. John Cuddihy, Stiúrthóir, Ionad Faireachais um Chosaint Sláinte, FSS:
"Táimid ag aithint ráigeanna i roinnt suíomhanna éagsúla mar thithe príobháideacha, ionaid oibre agus suíomhanna sóisialta.
"Scaipeann an galar seo go héasca nuair a bhíonn daoine cruinnithe le chéile. Ní mór dúinn go léir cruinnithe den sórt sin a sheachaint má táimid chun an víreas a chosc."
CRÍOCH
- Mar thoradh ar bhailíochtú sonraí ag an HPSC dí-fhógraíodh 3 chás deimhnithe. Léiríonn an figiúr de 28,453 cás deimhnithe é seo.