Seolann an tAire Stáit Colm Burke tuarascáil ar Úsáid Drugaí agus Roghanna Malartacha Reatha ar Smachtbhannaí Comhéigneacha in Éirinn
- Foilsithe: 2 Iúil 2024
- An t-eolas is déanaí: 12 Aibreán 2025
Sheol an tAire Sláinte Poiblí, Folláine agus na Straitéise Náisiúnta Drugaí, Colm Burke, tuarascáil inniu maidir le hÚsáid Drugaí agus Roghanna Malartacha Reatha ar Smachtbhannaí Comhéigneacha in Éirinn.
D'aithin an tuarascáil naoi rogha reatha eile in Éirinn maidir le smachtbhannaí comhéigneacha do dhaoine le drugaí ina seilbh acu dá n-úsáid phearsanta féin. I measc na dtionscnamh sin tá Scéim an Gharda Síochána um Rabhadh Aosach, bearta Athstiúrtha, Cúirteanna Cóireála Drugaí Bhaile Átha Cliath agus an Clár um Rannpháirtíocht Dlí agus Téarnamh Cuidithe (LEAR).
Léiríonn na naoi dtionscnamh seo gluaiseacht na hÉireann i dtreo chur chuige sláinte-bhunaithe maidir le húsáid drugaí, cur chuige atá tacaithe ag an Tionól Saoránach um Úsáid Drugaí le déanaí.
Léiríonn fianaise ó thíortha eile go gcabhraíonn roghanna malartacha ar smachtbhannaí comhéigneacha le húsáid drugaí a laghdú agus athchiontú a ísliú. Leagtar béim i dtuarascáil an lae inniu ar dhíograis i measc na mbreithiúna, na n-oibrithe promhaidh agus páirtithe leasmhara eile in Éirinn maidir le bealaí malartacha do dhaoine le drugaí ina seilbh acu dá n-úsáid phearsanta féin.
Mar sin féin, leagann sé béim freisin ar an difríocht maidir le cumhdach geografach na gclár sin, easpa eolais fhorleathan faoi thionscnaimh atá ann cheana féin agus easpa sonraí chun a n-éifeachtacht a mheas.
Rinne Grúpa Forfheidhmithe Straitéiseach 5 (SIG-5), fochoiste laistigh de struchtúir na Straitéise Náisiúnta Drugaí, an tuarascáil, curtha le chéile ag an Lárionad um Nuálaíocht Dlí agus Cirt, a choimisiúnú agus a fhoilsiú, agus é freagrach as gníomhartha a bhaineann le roghanna malartacha ar smachtbhannaí comhéigneacha a chur i bhfeidhm.
Dúirt an tAire Burke:
“Is riosca tromchúiseach don tsláinte í úsáid drugaí, a bhfuil impleachtaí fadtéarmacha aici, ní hamháin don duine féin a úsáideann na drugaí aindleathacha, ach dá dteaghlach agus don phobal mórthimpeall orthu.
“Léiríonn an tuarascáil seo an díograis ar fad atá ann maidir le freagairt sláinte-bhunaithe, a choinníonn daoine amach ó chúirteanna agus ó phríosúin agus ina ionad sin, cuirtear i dtreo clár éifeachtach iad, a thacaíonn lena n-athshlánú agus a laghdaíonn an seans go dtarlóidh amhlaidh arís.
“Ba mhaith liom buíochas a ghabháil le baill SIG-5 as a gcuid oibre ar an taighde tábhachtach seo a chabhróidh le bonn eolais a chur faoi éabhlóid lenár bpolasaí drugaí. Mar Aire atá freagrach as an straitéis náisiúnta drugaí, táim tiomanta go hiomlán lena chinntiú go mbogfaimid ar aghaidh le cur chuige sláinte-bhunaithe, a laghdaíonn dochar agus a chabhraíonn le tairbhí intomhaiste a ghiniúint do shaol gach duine a dtéann mí-úsáid drugaí i bhfeidhm orthu."
Dúirt cathaoirleach neamhspleách SIG-5 Tony Duffin:
“Ní hamháin go ndéanann an tuarascáil seo léarscáiliú ar thírdhreach reatha na roghanna malartacha ar smachtbhannaí comhéigneacha in Éirinn, léiríonn sé freisin toilteanas méadaitheach i measc cleachtóirí na roghanna seo a leathnú tuilleadh.
“Agus ár Straitéis Náisiúnta Drugaí ag druidim chun críche in 2025, táim muiníneach go ndéanfaidh lucht déanta beartas breithniú cúramach ar na léargais a chuirtear ar fáil anseo chun roghanna malartacha inrochtana, costéifeachtacha agus éifeachtúla ar phionóis choiriúla a chinntiú."
Nótaí
Áirítear le seoladh na tuarascála seo cur i láthair ó Tony Duffin, Cathaoirleach Ghrúpa Forfheidhmithe Straitéisí 5; Dawn Russell, Stiúrthóir Seirbhísí, Tionscadal Drugaí Ana Liffey; agus Lisa Larkin, Ceann Seirbhísí, TC Chúil Mhín. Ba chóir iarratais agallaimh do na cainteoirí seo a sheoladh chuig Tony Duffin ag tony.duffin@aldp.ie
Ba cheart iarratais agallaimh don Aire Burke a dhíriú chuig press_office@health.gov.ie.
Grúpa Forfheidhmithe Straitéiseach 5:
Tar éis an athbhreithnithe leath-théarma ar an straitéis náisiúnta drugaí in 2021, sainaithníodh sé thosaíocht straitéiseach, agus bunaíodh grúpa forfheidhmithe chun gach tosaíocht a chur chun cinn. Tá Grúpa Forfheidhmithe Straitéiseach 5 dírithe ar roghanna malartacha ar smachtbhannaí comhéigneacha i leith cionta a bhaineann le drugaí a chur chun cinn.
Cineálacha roghanna malartacha ar smachtbhannaí comhéigneacha:
I staidéar ón gCoimisiún Eorpach ar roghanna malartacha ar smachtbhannaí comhéigneacha mar fhreagairt ar chionta drugaí agus coireanna a bhaineann le drugaí, rinneadh catagóiriú ar na tionscnaimh a d'aimsigh sé i measc gach ceann de 28 stát an Aontais ina 13 chineál ar leith.
Sainmhíníodh iad seo mar seo a leanas:
- Aire/ rabhadh / gan aon ghníomh
- Beart athstiúrtha
- An Coiste athstiúrtha um Andúil i nDrugaí
- Imscrúdú/ ionchúiseamh a chur ar fionraí le gné chóireála
- Imeachtaí cúirte a chur ar fionraí le gné chóireála
- Téarma príosúnachta a chur ar fionraí le gné chóireála
- Cúirt drugaí
- Cóireáil drugaí
- Promhadh le gné chóireála
- Obair phobail le gné chóireála
- Srian ar shaoirse le gné chóireála
- Coimeád eadrannach le gné chóireála
- Parúl/ scaoileadh luath le gné chóireála