€19 milliún íoctha leis an earnáil gairneoireachta in 2024
- Foilsithe: 21 Eanáir 2025
- An t-eolas is déanaí: 15 Aibreán 2025
D’eisigh an Roinn Talmhaíochta, Bia agus Mara €19 milliún in íocaíochtaí d’earnáil gairneoireachta na hÉireann in 2024 trí raon scéimeanna, lena n-áirítear an Scéim um Chúnamh Infheistíochta chun an Earnáil Gairneoireachta Tráchtála a Fhorbairt, Scéim Eagraíochta Táirgeoirí an AE d’Earnáil na dTorthaí agus na nGlasraí, na Scéimeanna Cúnaimh Infheistíochta um Nuálaíocht agus Éagsúlú sa Ghairneoireacht agus an Ciste Géarchéime Gairneoireachta.
Dúirt an tAire Talmhaíochta, Bia agus Mara, Charlie McConalogue TD:
“Léiríonn an leibhéal íocaíochtaí seo go soiléir tiomantas leanúnach an Rialtais do thacú leis an earnáil ríthábhachtach seo agus tá sé ag teacht leis an bhfís atá leagtha amach sa Straitéis Náisiúnta Gairneoireachta 2023-2027 chun earnáil níos brabúsaí, breisluacha a fhás, á spreagadh ag an nuálaíocht agus inbhuanaitheacht.
“D’fhógair mé le déanaí gur osclaíodh Scéimeanna 2025 um Chúnamh Infheistíochta le haghaidh Nuálaíocht agus Éagsúlú sa Ghairneoireacht. Seoladh na scéimeanna seo den chéad uair in 2024, agus tá siad deartha chun leanúint ar aghaidh ag tacú le nuálaíocht agus éagsúlú méadaithe i measc táirgeoirí príomhúla san earnáil gairneoireachta atá ar cheann de na Príomhghníomhaíochtaí Straitéiseacha atá leagtha amach sa Straitéis Náisiúnta Gairneoireachta.”
Tá na scéimeanna seo oscailte faoi láthair. Meabhraítear do shaothróirí gairneoireachta gurb é meán oíche, Dé hAoine 07 Feabhra 2025, an dáta deiridh chun iarratais a dhéanamh faoi na scéimeanna seo.
Maidir leis na cúig Eagraíocht Táirgeoirí torthaí agus glasraí aitheanta in Éirinn a bhfuil baill acu ar fud na n-earnálacha sreinge ard, torthaí, glasraí páirce agus muisiriún, lean an tAire McConalogue ar aghaidh:
“Íocadh €7.8 milliún san iomlán le saothróirí gairneoireachta faoi Scéim Eagraíochta Táirgeoirí an AE don Earnáil Torthaí agus Glasraí in 2024. Tugann an Scéim seo tacaíocht thar a bheith luachmhar do tháirgeoirí lena n-áirítear athrú aeráide a mhaolú, cáilíocht táirgí a fheabhsú, luach na dtáirgí a mhéadú, géarchéimeanna a chosc agus a bhainistiú agus pleanáil táirgeachta agus comhchruinniú an tsoláthair a mhéadú.”
Dúirt an tAire Stáit sa Roinn Talmhaíochta, Bia agus Mara ar a bhfuil freagracht speisialta as Úsáid Talún agus Bithéagsúlacht, Pippa Hackett agus í ag trácht ar an maoiniú a íocadh faoi Scéim Eagraíochta Táirgeoirí an AE don Earnáil Torthaí agus Glasraí:
“Clúdaíonn an tacaíocht a chuirtear ar fáil faoin scéim seo raon leathan gníomhaíochtaí agus cuidíonn sé leis an táirgeoir a bheith níos inbhuanaithe ó thaobh an chomhshaoil, an gheilleagair agus na sochaí de. Ní raibh tréimhse níos fearr riamh ag saothróirí le bheith páirteach in Eagraíocht Táirgeoirí nó le hEagraíocht Táirgeoirí a bhunú.”
CRÍOCH
Nótaí d’Eagarthóirí
Is féidir eolas breise a fháil faoi Scéimeanna 2025 um Chúnamh Infheistíochta le haghaidh Nuálaíocht agus Éagsúlú sa Ghairneoireacht anseo. Is é meán oíche, Dé hAoine 07 Feabhra 2025, an spriocdháta chun iarratais a dhéanamh ar na trí scéim.
Is féidir eolas breise faoi Scéim um Chúnamh Infheistíochta chun an Earnáil Gairneoireachta Tráchtála a Fhorbairt 2025 a fháil anseo.
Is féidir eolas breise faoi Scéim Eagraíochta Táirgeoirí an AE don Earnáil Torthaí agus Glasraí a fháil anseo.
Leagtar fís shoiléir amach sa Straitéis Náisiúnta Gairneoireachta 2023-2027 An Straitéis Náisiúnta Gairneoireachta 2023-2027 chun earnáil bhreisluacha níos brabúsaí a fhás, spreagtha ag an nuálaíocht agus inbhuanaitheacht, agus cuireann treochlár ar fáil don earnáil chun an acmhainn seo a bhaint amach. Spreagfaidh cur i bhfeidhm ocht bPríomhghníomh Straitéiseacha (KSA) na Straitéise athrú agus borradh i ngach fo-earnáil de chuid thionscal na gairneoireachta agus beidh sé ina chúis d’inbhuanaitheacht timpeallachta, eacnamaíoch agus shóisialta. Má chuirtear gach gníomh sa straitéis i bhfeidhm, táthar ag súil le méadú 30% ar luach geata na feirme ó €559 milliún in 2023 go €688 milliún faoi dheireadh 2027, rud a chruthóidh níos mó fostaíochta faoin tuath agus a fhágfaidh go mbeidh pobail áitiúla faoi bhláth.
Tá cur i bhfeidhm na Straitéise Náisiúnta Gairneoireachta á stiúradh ag Fóram an Tionscail Gairneoireachta, grúpa páirtithe leasmhara bunaithe ar a bhfuil ionadaithe uile na hearnála, agus tá ionadaíocht ag an Roinn, Teagasc, Bord Bia, agus IFA mar chomhaltaí comhlacha.
Ba bheart tacaíochta é an Ciste Géarchéime Gairneoireachta (HCF) a cuireadh ar fáil mar íocaíocht aonuaire do na saothróirí gairneoireachta ba mhó a raibh tionchar ag ardleibhéal costas ionchuir orthu. I measc na bhfo-earnálacha gairneoireachta ar tugadh tacaíocht dóibh faoin mbeart seo, bhí beacáin dhonna, sútha talún téite, glasraí páirce (gan prátaí a áireamh), barra sailéid páirce, úlla, glasraí glasa a ndéantar feirmeoireacht orthu go hingearach agus barraí sreinge arda i dtithe gloine.