Ceapacháin ar Bhord an Bhoird Iascaigh Mhara
- Foilsithe: 3 Deireadh Fómhair 2025
- An t-eolas is déanaí: 6 Deireadh Fómhair 2025
Tá áthas ar an Aire Stáit sa Roinn Talmhaíochta, Bia agus Mara, Timmy Dooley TD, ceapachán Loretto Callaghan agus John Lynch a fhógairt chuig bord an Bhoird Iascaigh Mhara (BIM). Beidh téarmaí trí bliana ag Uasal Callaghan agus ag an Uasal Lynch araon.
Agus na ceapacháin á bhfógairt aige i gCeanncheathrú BIM i nDún Laoghaire inniu, dúirt an tAire Dooley:
“Tá áthas orm na ceapacháin seo a dhéanamh. Tugann an bheirt iarrthóirí leo taithí agus eolas fairsing ar an earnáil, rud a chabhróidh le BIM a chuspóirí a bhaint amach maidir le tionscal bia mara na hÉireann a thacú agus a fhorbairt. Tá taithí idirnáisiúnta ag Uasal Callaghan i réimse earnálacha agus tá taithí fhairsing ag an Uasal Lynch ar an earnáil iascaigh ó thaobh na straitéise agus na praiticiúlachta de araon.”
Forálann reachtaíocht BIM do bhord de shé chomhalta. Leis na ceapacháin nua seo, tá seisear anois ar bhord BIM. Mar fhocal scoir, dúirt an tAire Dooley:
“Níl aon amhras orm go ndéanfaidh an bheirt chomhaltaí nua rannchuidiú luachmhar le hobair Bhord BIM, a thug treoir straitéiseach shoiléir d’obair BIM, agus a leanann de bheith á soláthar.”
Nóta don Eagarthóir
Bunaíodh BIM faoin Acht Iascaigh Mhara 1952.Is í BIM an ghníomhaireacht Stáit Éireannach atá freagrach as tionscal bia mara na hÉireann a fhorbairt. Tacaíonn sé le hiascairí, feirmeoirí éisc agus próiseálaithe trí oiliúint, deontais, saineolas teicniúil, tionscnaimh inbhuanaitheachta agus margaíocht, agus cinntíonn sé go gcomhlíontar Rialacháin an AE agus na hÉireann ag an am céanna.Cuireann sé scéimeanna i bhfeidhm faoi Chlár Forbartha Bia Mara na hÉireann agus thar ceann na Roinne Talmhaíochta, Bia agus Mara. Tá na scéimeanna seo á gcomhmhaoiniú ag rialtas na hÉireann agus ag Coimisiún an AE agus faoi láthair tá siad faoin gCiste Eorpach Muirí, Iascaigh agus Dobharshaothraithe (CEMID). Ina theannta sin, chuir sé tacaíochtaí i bhfeidhm don earnáil bia mara faoin gCúlchiste um Choigeartú Breatimeachta a bhí ríthábhachtach chun go bhféadfadh an earnáil infheistíocht a dhéanamh san athrú claochlaitheach a bhí riachtanach chun go bhféadfadh an earnáil bia mara oiriúnú don timpeallacht oibríochtúil athraithe i ndiaidh an Breatimeachta.
Is í Loretto Callaghan POF Vzarii Therapeutics agus tá taithí idirnáisiúnta aici i gceannaireacht, i mballraíocht feidhmiúcháin agus i mballraíocht bhoird ar fud na n-earnálacha cógaisíochta, biteicneolaíochta, feistí leighis agus seachadta cúram sláinte.
Is captaen cáilithe é John Lynch agus is é Príomhfheidhmeannach Eagraíocht Táirgeoirí Éisc Dheisceart agus Oirthear na hÉireann é. Tá an tUasal Lynch ina bhall de ghrúpaí agus de choistí comhairleacha earnálacha éagsúla.
Beidh an tUasal Callaghan agus an tUasal Lynch ar bhord BIM in éineacht le Aidan Cotter (Cathaoirleach), Jean Callanan, Marie Gleeson-Prior agus George Golden.