Fógraíonn Airí tuilleadh gairmeacha oscailte ar Chomhpháirtíochtaí Nuálaíochta Eorpacha maidir le hAthnuachan ó Ghlúin go Glúin agus Teicneolaíochtaí Digiteacha
- Foilsithe: 7 Deireadh Fómhair 2024
- An t-eolas is déanaí: 15 Aibreán 2025
D'fhógair an tAire Talmhaíochta, Bia agus Mara, Charlie McConalogue, TD, agus an tAire Stáit sa Roinn Talmhaíochta, Bia agus Mara, an Seanadóir Pippa Hackett, dhá Ghairm eile inniu ar Chomhpháirtíochtaí Nuálaíochta Eorpacha (EIPanna) a bhaineann leis na téamaí ‘Athnuachan ó Ghlúin go Glúin a Chur Chun Cinn ar Fheirmeacha na hÉireann’ agus ‘Úsáid Teicneolaíochtaí Digiteacha ar Fheirmeacha na hÉireann a Chothú’.
Dúirt an tAire Hackett an méid seo a leanas:
“Ag leanúint ó Ghairmeacha EIP roimhe seo, tá ríméad orm an chéad bhabhta eile de na gairmeacha seo a fhógairt ar na téamaí Athnuachan ó Ghlúin go Glúin agus Úsáid Teicneolaíochtaí Digiteacha ar Fheirmeacha na hÉireann.
“Is bealach iontach iad EIPanna chun feirmeoirí agus páirtithe leasmhara eile a thabhairt le chéile chun bealaí nua agus nuálacha a fhorbairt chun dul i ngleic leis an iliomad dúshlán atá ann cheana, agus atá ag teacht chun cinn, atá roimh an earnáil talmhaíochta, agus do ghrúpaí agus do phobail áitiúla chun réitigh áitiúla ar dhúshláin áitiúla a aithint.”
Ag trácht dó ar sheoladh na gairme, dúirt an tAire McConalogue an méid seo a leanas:
“Tógfaidh an babhta nua de EIPanna faoi Phlean Straitéiseach CBT 2023 – 2027 de chuid na hÉireann ar an rath a bhí ar na 57 dtionscadal roimhe seo faoin RDP, aschuir a ndearnadh iad a chomhtháthú cheana féin sa Phlean Straitéiseach CBT reatha tríd an Scéim Timpeallachta Tuaithe Talmhaíochta agus Aeráide (ACRES). Táim ag tnúth leis an nuálaíocht, na forbairtí agus na tionscnaimh, a bheidh mar threoir do bheartais, a fheiceáil agus a bhainfear amach tríd an ngairm is déanaí seo. Clúdófar Athnuachan ó Ghlúin go Glúin agus úsáid níos mó as Teicneolaíochtaí Digiteacha san fheirmeoireacht in Éirinn leis na réimsí sin.”
Tá na hAirí ag tabhairt cuireadh do Ghrúpaí Oibríochtúla le Léirithe Spéise a chur isteach maidir leis an dá théama agus tá siad ag spreagadh rannpháirtithe a bheith nuálach lena dtograí.
Mar fhocal scoir, dúirt an tAire Hackett:
"Is é neart na samhla EIP ná go nglacann sé cur chuige ón mbun aníos, agus tá rannpháirtíocht na bhfeirmeoirí ríthábhachtach maidir leis an rath sin. Táim ag tnúth le tuilleadh gairmeacha EIP a fhógairt go luath chun aghaidh a thabhairt ar an inbhuanaitheacht timpeallachta – go háirithe an tábhacht a bhaineann le sláinte ithreach do chórais feirme sheasmhacha, chomh maith leis na dúshláin atá roimh an bhfeirmeoireacht agus í ag dul in oiriúint don athrú aeráide, go háirithe i réimse an mhaolaithe tuilte.”
CRÍOCH
Nótaí d’Eagarthóirí
Tá an tionscnamh EIP á chómhaoiniú ag an gCoimisiún Eorpach agus Rialtas na hÉireann faoin bPlean Straitéiseach CBT (CSP). Maoineoidh an Roinn Talmhaíochta, Bia agus Mara íocaíochtaí le feirmeoirí chomh maith le costais riaracháin na nGrúpaí Oibríochtúla.
Tá réimse páirtithe leasmhara (feirmeoirí, comhairleoirí, taighdeoirí, eagraíochtaí neamhrialtasacha etc.) ag teacht le chéile i ngrúpa ar a dtugtar 'Grúpaí Oibríochtúla' chun réitigh nuálacha atá forbartha ag na Grúpaí féin a thriail.
Faoi láthair, tá dhá thionscadal suaitheanta EIP ann faoin CSP, is iad sin an EIP ar Chaighdeán an Uisce agus an EIP ar Lapairí Pórúcháin.
Díreoidh an chéad dá ghairm eile seo – Gairm 4 agus Gairm 5 – ar Athnuachan ó Ghlúin go Glúin agus Teicneolaíochtaí Digiteacha, faoi seach. Maoineofar gach ceann de na tionscadail roghnaithe ar feadh tréimhse idir trí agus cúig bliana, agus beidh leithdháileadh buiséid uasta €650,000 in aghaidh an tionscadail i gceist.
Is féidir teacht ar eolas breise faoin tionscnamh Comhpháirtíochta Nuálaíochta Eorpaí agus na treoirlínte do na gairmeacha seo ar thograí ar shuíomh gréasáin na Roinne, ag gov.ie – Scéim Comhpháirtíochta Nuálaíochta Eorpaí
Is comhpháirtíocht é comhbheartas talmhaíochta an Aontais Eorpaigh (CBT) idir an tsochaí agus an earnáil talmhaíocht a chinntíonn soláthar seasmhach beatha, a chosnaíonn ioncam na bhfeirmeoirí, a chosnaíonn an timpeallacht agus a choinníonn ceantair thuaithe beo bríomhar. Cuireann tíortha an AE an CBT i bhfeidhm ar leibhéal náisiúnta le Plean Straitéiseach CBT saincheaptha don tréimhse 2023-2027.
Is é an dáta deiridh don Ghairm Léirithe Spéise seo 5 i.n. Dé Luain, an 4 Samhain 2024.