Fógraíonn an tAire €6 mhilliún do charthanachtaí leasa ainmhithe a dháilfear ar 101 eagraíocht i mí na Samhna 2024.

“Is compánaigh iad ainmhithe a bhfuil an-chion againn orthu in Éirinn, is tosaíocht dom féin agus do mo Roinn é leas ainmhithe. Chuige sin, tá an-áthas orm a fhógairt inniu go bhfuil mé chun leanúint den leibhéal is mó de mhaoiniú riamh ó mo Roinn le haghaidh carthanachtaí leasa ainmhithe. Tabharfaidh na deontais seo tacaíocht d’eagraíochtaí maidir leis an obair ríthábhachtach a dhéanann siad fud fad na tíre, chun ainmhithe a chosaint agus a tharrtháil, chun aire a thabhairt dóibh, agus chun oideachas agus treoir a thabhairt d’fhonn cosc ar theacht chun cinn fadhbanna leasa sa todhchaí. I dtaca leis na deontais i mbliana, leanfar de bheith ag díriú ar luaíocht a thabhairt do na heagraíochtaí úd a bhí rathúil maidir le hainmhithe a athshocrú, tionscnaimh oideachais a chur ar fáil, agus feasacht maidir le húinéireacht fhreagrach peataí a chur chun cinn le linn 2024. Aithním, go raibh ar charthanachtaí leasa ainmhithe a bheith ag plé le brúnna breise arís i mbliana, agus ba mhaith liom mo bhuíochas a ghabháil le foireann agus oibrithe deonacha na gcarthanachtaí as a ndíograis.”

“Ba mhaith liom aitheantas a thabhairt don obair thábhachtach a dhéanann carthanachtaí leasa ainmhithe agus an fhoireann agus oibrithe deonacha díograiseacha atá acu, go minic faoi chúinsí an-dúshlánacha, fud fad na hÉireann. Imríonn carthanachtaí leasa ainmhithe ról criticiúil maidir le cúnamh a thabhairt d’ainmhithe a bhfuil cúnamh de dhíth orthu, agus chun feasacht a ardú i measc an phobail, agus chun leas ainmhithe a fheabhsú. Is féidir le feachtais maidir le húinéireacht fhreagrach peataí cabhrú le laghdú a dhéanamh ar líon na madraí a thréigtear nó a thugtar suas, agus dá bhrí sin, is féidir leo an brú ar dhídean madraí agus ar charthanachtaí a laghdú. Ar an ábhar seo, áiríodh leis an gClár Rialtais gealltanas chun úinéireacht fhreagrach peataí a chur chun cinn.”