Fógraíonn an tAire Heydon €32.4 milliún d'íocaíochtaí faoin scéim Tacaíochta Curaíochta agus Gairneoireachta
- Foilsithe: 12 Feabhra 2025
- An t-eolas is déanaí: 12 Aibreán 2025
D'fhógair an tAire Talmhaíochta, Bia agus Mara, Martin Heydon TD, inniu go bhfuil tús curtha le híocaíochtaí dar luach iomlán €32.4 milliún a eisiúint d'fheirmeoirí faoin scéim Tacaíochta Curaíochta agus Gairneoireachta.
Dúirt an tAire Heydon:
“An t-earrach seo caite, d’aithin an Rialtas an cruachás ina raibh na feirmeoirí curaíochta agus gairneoireachta mar gheall ar an drochaimsir agus ar na costais arda ionchuir. Tá an-tábhacht ag baint leis na hearnálacha curaíochta agus gairneoireachta d’earnáil agraibhia na hÉireann, agus bhíomar ag iarraidh a chinntiú go raibh tacaíochtaí ann chun cabhrú le feirmeoirí. Mar chuid de Cháinaisnéis 2025, fuarthas maoiniú chun cur le gealltanas an Rialtais, is é sin €100 a íoc in aghaidh an heicteáir chun tacú le saothróirí curaíochta agus gairneoireachta a chuir barra d’fhómhar 2024”.
Íocfar €100 in aghaidh an heicteáir do bharra curaíochta agus gairneoireachta incháilithe a dearbhaíodh in iarratais BISS 2024 na bhfeirmeoirí. Beidh na híocaíochtaí seo le feiceáil i gcuntais bhainc na bhfeirmeoirí sna laethanta amach romhainn.
Dúirt an tAire an méid seo a leanas:
“Is cuid lárnach den tionscal agraibhia í an earnáil curaíochta, agus táim tiomanta don réimse curaíochta a shocrú agus mhéadú sna blianta amach romhainn. Leagann Grúpa Curaíochta Fhís don Bhia plean síos chun cur leis an earnáil agus dhírigh cruinniú deireanach an Ghrúpa ar an obair leanúnach chun dul chun cinn a dhéanamh maidir leis seo”.
Dúirt an tAire Stáit le freagracht as Foraoiseacht, Gairneoireacht agus Sábháilteacht Feirme, Michael Healy-Rae TD:
“Tá bunchloch láidir, dhaingean ag teastáil ón Straitéis Náisiúnta Gairneoireachta chun cur leis an tionscal gairneoireachta. Tá an pacáiste tacaíochta airgeadais seo ríthábhachtach le hinmharthanacht leanúnach, eacnamaíoch na hearnála a chinntiú agus a chinntiú go maireann sé amach anseo”.
Mar fhocal scoir, dúirt an tAire Heydon an méid seo a leanas:
“Is tacaíocht thábhachtach iad na híocaíochtaí seo agus coinneoidh mé féin agus an tAire Healy-Rae ag obair le agus ar son na n-earnálacha seo.”
Is féidir le feirmeoirí ar mian leo teagmháil a dhéanamh leis an roinn maidir lena n-íocaíocht Scéim Tacaíochta Curaíochta agus Gairneoireachta, glaoch a chur ar an Líne Chabhrach Íocaíochtaí Díreacha ar 057-8674422 nó ar ríomhphost chuig tillage@agriculture.gov.ie
| Contae | Líon Iomlán na dTréad Incháilithe | € |
| Ceatharlach | 560 | €1,820,661.00 |
| An Cabhán | 30 | €45,593.00 |
| An Clár | 18 | €15,980.00 |
| Corcaigh | 1854 | €4,493,480.00 |
| Dún na nGall | 290 | €549,072.00 |
| Baile Átha Cliath | 224 | €1,518,292.00 |
| Gaillimh | 312 | €369,825.00 |
| Ciarraí | 160 | €278,154.00 |
| Cill Dara | 567 | €2,820,153.00 |
| Cill Chainnigh | 699 | €1,706,869.00 |
| Laois | 698 | €1,667,921.00 |
| Liatroim | 3 | €2,470.00 |
| Luimneach | 77 | €148,178.00 |
| An Longfort | 28 | €42,110.00 |
| An Lú | 484 | €2,086,384.00 |
| Maigh Eo | 43 | €26,918.00 |
| An Mhí | 658 | €3,266,391.00 |
| Muineachán | 63 | €65,625.00 |
| Uíbh Fhailí | 510 | €984,602.00 |
| Ros Comáin | 53 | €68,742.00 |
| Sligeach | 22 | €11,297.00 |
| Tiobraid Árann | 808 | €2,446,310.00 |
| Port Láirge | 336 | €811,185.00 |
| An Iarmhí | 230 | €621,373.00 |
| Loch Garman | 1736 | €5,369,718.00 |
| Cill Mhantáin | 405 | €1,145,335.00 |
| Iomlán | 10868 | €32,382,638.00 |
DEIREADH
Nótaí d’Eagarthóirí
Tugtar tacaíocht airgeadais faoi scéim Tacaíochta Curaíochta agus Gairneoireachta 2024 de chuid na Roinne Talmhaíochta, Bia agus Mara (RTBM) i gcomhréir le Rialachán Tarmligthe an Choimisiúin 2023/1465, ina dtugtar tacaíocht airgeadais éigeandála do na hearnálacha talmhaíochta a mbíonn tionchar ag fadhbanna ar leith a bhaineann le hinmharthanacht eacnamaíoch na dtáirgeoirí talmhaíochta orthu.
Tá an cúnamh ar fáil do gach saothróir na mbarr incháilithe liostáilte thíos. Tabhair faoi deara nach n-íocfar an t-airgead tacaíochta do bharra Próitéine a dtugtar maoiniú dóibh faoin Scéim um Chúnamh Próitéine. Ní mór don saothróir na barra incháilithe a lua ina iarratas ar Thacaíocht Bhunúsach Ioncaim i dtaobh na hInbhuanaitheachta (BISS) 2024 agus iarratais ar scéimeanna eile a bhaineann le ceantar.
Is féidir leis suas le 5 lá a ghlacadh sula mbíonn an íocaíocht sna cuntais bhainc.
Tá Téarmaí agus Coinníollacha na scéime seo ar fáil ar shuíomh gréasáin na Roinne.
Barra Incháilithe
Sadhlas Curaíochta
Bliosán
Asparagas
Mionspionáiste
Eorna - Earrach
Eorna - Geimhreadh
Biatas
Borráiste Gorm
Brocailí - Earrach
Brocailí - Geimhreadh
Bachlóga Bruiséile
Cabáiste - Earrach
Cabáiste - Geimhreadh
Brocailí Calabrach
Caimilín
Cairéid
Cóiliseacha - Earrach
Cóiliseacha - Geimhreadh
Soiliriac
Soilire - Earrach
Soilire - Geimhreadh
Cúirséid
Biatas Farae
Gairleog
Cainneanna - Earrach
Cainneanna - Geimhreadh
Leitís
Grán buí
Mearóg
Barra Measctha (Gairneoireacht)
Coircí - Earrach
Coircí - Geimhreadh
Ráib Olashíl - Earrach
Ráib Olashíl - Geimhreadh
Oinniúin
Cabáiste Síneach
Meacan bán
Spionáiste Buan
Prátaí - Luath
Prátaí - Príomhbharr
Prátaí - Síol
Puimcíní
Raidis
Rúbarb
Ruachán
Seagal
Scailliúin
Seallóid
Scuais
Biatas Siúcra
Svaeid
Grán milis
Triteacál - Earrach
Triteacál - Geimhreadh
Tornapaí
Cruithneacht - Earrach
Cruithneacht - Geimhreadh
Is féidir le feirmeoirí glaoch ar an Deasc Chabhrach ag 057-8674422. Is féidir le feirmeoirí aon fhiosruithe a d’fhéadfadh a bheith acu a chur isteach ar líne freisin trí www.agfood.ie nó trí ríomhphost a sheoladh chuig tillage@agriculture.gov.ie